Con e Evangelio por benefciábo?
ALGUN hende—asta hende ateísta—ta aprecia e balor literario dje Bijbel. Sin embargo, mashá poco hende realmente ta lezé afin di aplica loke e ta bisa. Además, siendo cu e bon nobo cu e ta contene ta di casi dos mil aña pasá, hopi hende ta kere cu e mester ta modernizá, hací corriente. E Evangelio ta ouderwets of sin balor? Di ningun manera.
Tin miyones di hende homber i muher, hoven i bieu cu sa cu e Bijbel ta un fuente balioso di yudanza. Den su introduccion e Bijbel na inglés moderno, Today’s English Version, ta bisa: “E Bijbel no ta simplemente gran literatura pa ser admirá i reverenciá; e ta Bon Nobo pa hende na tur parti—un mensahe pa hende comprende i també aplicá den nan bida diario.”
Kico e Evangelio ta nifica pa bo? Bo ta usé como guía den bo bida diario? Considera con e bon nobo a beneficiá algun hende cu a scuché den e promé siglo i con algun hende a beneficiá di dje den nos tempo.
Evangelio ta yuda hende
Den e tempo di Jesús e bon nobo a atraé hende tal como piscador diligente i ama di cas i nan a siña e berdad tocante e propósito di Dios pa hende. E bon nobo a cambia nan bida radicalmente i hopi bez a dúnanan alivio profundo. Por ehempel, María Magdalena a haya curacion for di dominacion di demoño. Zaqueo, un excobrador di belasting, a bandona su bida di haragán. (Lucas 8:2; 19:1-10) Hende ciegu i leproso a haya yudanza ora nan a acudi na Jesús, esun cu a predica e bon nobo. (Lucas 17:11-19; Juan 9:1-7) Jesús por a bisa hustamente: “Hende ciegu ta mira atrobé, i hende coho ta camna, hende leproso ta ser hací limpi i hende surdo ta tende, i hende morto ta ser lantá, i hende pober ta haya e bon nobo declará na nan.”—Mateo 11:5.
Sin embargo, mas importante cu nan curacion, tabata e manera cu e bon nobo a cambia e bida di hopi hende cu tabatin desbentaha. Hende cu curazón onrado a yena cu speranza pe futuro. Nan a pone nan confianza den e Reino di Dios—algo mihor cu cualkier evangelio social. (Mateo 4:23) E morto di Jesús no a anula nan speranza. Dunando detaye di loke a pasa asta despues di su morto, Echo 5:42 ta bisa tocante su disípelnan: “Tur dia den e tempel i di cas pa cas nan a sigi sin para siñando i declarando e bon nobo tocante Cristo, Jesús.” Den e promé siglo, hende di hopi país a recibi yudanza spiritual pasobra nan a reacciona na tal predicamento.
E Reino tabata e mihor noticia den e tempo ayá. E mensahe di Reino ta bon nobo ainda?
Kico e bon nobo ta nifica awe?
Si bo ta anhela un mundo di paz i siguridad, anto e noticia dje Reino siguramente ta bon. Realmente, den un mundo cu cientos di miyones di hende faltando cuminda i muriendo di hamber, cu maleza spantoso amenazando tur hende, cu un aumento alarmante di crimen, i cu e plamamento di instabilidad político, esei ta e único berdadero bon nobo duradero. E ta representa e único speranza pa berdadero mehoramento.
P’sei mes Jesús a profetiza tocante nos tempo: “E bon nobo di reino lo ser predicá den tur e tera habitá como testimonio pa tur nacion; anto e fin lo yega.” (Mateo 24:14) E palabra ei ta ser cumplí na moda notable mientras cu Testigo di Jehova ta predica e bon nobo den mas cu 200 tera. Un publicacion católico, Nova Evangelizaçao 2000, a encomenda Testigo di Jehova pa esei, bisando: “Unda nos ta haya Testigo di Jehova? Na porta di cas. I pa ser un Testigo di Jehova, además di pertenece na Jehova, bo tin cu ser un testigo. P’sei, nos ta háyanan trahando, anunciando, presentando, loke nan a experimenta.”
Sin embargo, ningun hende ta beneficiá automáticamente dje bon nobo. E ta yuda solamente hende cu ta scucha i ta obedece. Pa demonstra esei, Jesús a conta e comparacion dje homber cu a sali pa sembra simía. E diferente clase di tera unda e simía a cai a ilustra e diferente sorto di condicion di curazón cu scuchador dje bon nobo ta demonstra. Jesús a bisa: “Ora hende ta tende e palabra dje reino pero no ta capta e sentido di dje, e malbado ta bini i ta kita loke a wordu sembrá den su curazón . . . En cuanto esun sembrá riba tera excelente, esei ta esun tendiendo e palabra i captando e sentido di dje, cu realmente ta pari fruta i ta produci, esaki cien pa uno, esei sesenta, i e otro trinta.”—Mateo 13:18-23.
Mescos cu den e promé siglo, e mayor parti di hende djawe ta haci poco esfuerzo pa comprende e bon nobo. Nan no ta capta e sentido di dje, i p’sei nan ta perde e oportunidad. Otronan ta mustra aprecio pe bon nobo i ta siña con pa pone nan bida na armonía cu e boluntad di Dios. Dje manera ei nan ta ser bendicioná. Bo ta pertenece na cua grupo?
E poder dje Evangelio awendia
Experencia ta duna prueba cu comprendimento dje bon nobo ta yuda hende cu “no tabatin speranza i tabata sin Dios.” (Efesio 2:12; 4:22-24) Roberto di Rio de Janeiro tabatin mester di yudanza. Desde su hubentud el a hiba un bida corrupto, enbolbí den droga, inmoralidad, i ladronicia. Cu tempo e tabata encarcelá. Den prisón, Roberto a studia e Bijbel cu un Testigo di Jehova cu a bishité. El a progresa asina bon spiritualmente cu su sentencia tabata reducí hopi.
Despues di a sali, Roberto a contra cu un mucha muher cu na antes el a atraca i a menazá cu scopet. E també tabata studia e Bijbel cu Testigo di Jehova. Kico a pasa? Lo sigiente ta parti di un carta tocante e incidente: “Nan a contra cu otro den Salón di Reino pe promé bez despues dje asalto. E encuentro tabata emocionante. Nan dos a basha lágrima di emocion i a braza manera ruman. Awor tanto e exladrón como su víctima ta alaba Jehova.”
Un otro persona, Isabel, també tabatin mester di yudanza, pasobra e tabata famoso pa su mal genio. E tabata profundamente enbolbí den spiritismo i bruhería i demoño a tormenté. Mientras cu el a studia e Bijbel cu Testigo di Jehova, el a haya cu e bon nobo realmente a yuda. Despues di algun tempo, el a libré di control di demoño i a cambia su personalidad—finalmente dominando su mal genio. Awor e ta un cristian fiel, i ta conocí como un persona cu ta bondadoso den su tratamento cu otronan.
Sí, e bon nobo no ta simplemente un teoría. E tin berdadero poder pa transforma bida. (1 Corintio 6:9-11) E ta haci asta mas cu esei. E ta siñala també na bendicion di futuro.
Bendicion den futuro ainda
Segun e Palabra di Dios, tin prospecto maraviyoso den futuro. Nos por mira e cumplimento dje oracion di Jesús pe Reino di Dios bini i pa su boluntad ser hací na tera mescos cu den cielo. (Mateo 6:10) Pronto, e sistema di cosnan actual cu su corrupcion i violencia desanimador lo ser kitá, i e Reino di Dios, su gobierno celestial, lo reina riba hende di curazón recto cu ta dispuesto pa scucha e bon nobo i obedecé.—Daniel 2:44.
Desaroyo radical lo sigi ora hende fiel ta ser guiá pa transforma e tera na un paradijs unda hende manso lo biba pa semper. (Salmo 37:11, 29) Siguramente ta bon noticia cu crimen, maleza, hamber, contaminacion, i gera lo desparce pa semper! Bo por imaginábo i bo famía bibando den e mundo nobo den paz i salud perfecto sin miedu di maleza of morto?—Revelacion 21:4.
Ta cierto cu hopi hende ta considera bon nobo asina como co’i kens i imaginario. Pero, nan ta haci equibocacion. E bon nobo ta fundá riba prueba di mas fuerte, i el a cambia e bida di miyones di hende caba. P’sei, nunca keda intimidá si otro hende no ta kere.
Imaginábo un persona prudente cu a cumpra terreno den un sector bao di construccion, sperando ganashi for di su inversion. Hende ta condené si e ta inverti su placa asina? No. Muy probablemente hende ta bisa cu el a dal un paso sabí. Anto, pakico no sea prudente en cuanto e Reino i inverti, den un sentido, den e bon nobo? Siendo cu aceptacion dje bon nobo ta nifica salbacion, ningun otro inversion por paga mas ganashi.—Romano 1:16.
Con bo por inverti den e bon nobo? Promé, keda dispuesto pa laga Dios siñábo. Anto anda di acuerdo cu loke bo ta siña. Sigi requisito básico, tal como esnan cu e profeta hebreo di antigua a menciona: “Kico Jehova ta pidi di bo en buelta sino eherce hustica i stima bondad i ser modesto camnando cu bo Dios?” (Miqueas 6:8) Tempo i esfuerzo ta necesario pa siña camna cu Dios. No obstante, Testigo di Jehova, cu a yuda Roberto i Isabel, ta keda contentu pa yudábo haci esei—mescos cu nan a yuda miyones di otro hende através dje añanan.
Mientras cu bo ta spera cumplimento di promesa di Dios, cultiva bo inversion bibando di acuerdo cu e bon nobo, disfruta di paz di mente i edifica un relacion mas estrecha cu Dios. Bo inversion lo keda sigur—ningun depresion económico ni revolucion político por menazé. I finalmente, lo e paga un ganashi maraviyoso. Esei ta cua ganashi? Apóstol Juan a skirbi: “Mundo ta pasando forbij i també su deseo, pero ken cu ta haci e boluntad di Dios ta permanece pa semper.”—1 Juan 2:17.
[Plachi na página 7]
Simía dje bon nobo ta cai riba diferente sorto di tera
[Rekonosementu]
Garo Nalbandian