Testigo di Jehova—E Organizacion Tras dje Nomber

DIA 6 di October di 1990, e multitud di casi 5.000 reuní den e Salón di Asamblea di Testigo di Jehova den Jersey City, New Jersey, EUA, pe reunion anual di Watch Tower Bible and Tract Society tabata puesto pa haya un sorpresa. E presidente dje programa, John E. Barr, a anunciá ne auditorio e presentacion di un video di 55 minut titulá Los testigos de Jehová: la organización tras el nombre. Esei ta e promé video cu e Sociedad a producí i siguramente lo no ta e úl­timo.

E video ta mustra con e pueblo di Jehova ta organizá pa duna testimonio dje nomber divino i publica e “bon nobo di reino.” (Mateo 24:14) E ta destacá e oficina central den Brooklyn, New York, i facilidad na Watchtower Farms. Nan a produci mas cu 500.000 caset na inglés, i awor ta disponibel (of lo ser pronto) na 26 otro idioma.a

Cua Reaccion Tabatin?

Con hende cu no ta Testigo di Jehova a reacciona ne video? Un homber di negoshi a skirbi:

“Mi a haya cu e cinta ta di mashá bon calidad. Mi a keda specialmente impresioná cu e claridad i composicion profesional dje imagen. Mi a lubida cu e tabata un video i a miré mas como un película. E cinta tin cu ser mashá útil pa splica e propósito di boso oficina central den New York. Pa bien pe produccion sobresaliente.”—J. J.

Hende cu ta studia e Bijbel cu Testigo di Jehova a beneficiá dje video. Lo sigiente ta splica pakico:

“Mi ta studia e Bijbel cu un hoven di 20 aña di edad i cu ta asisti ne universidad. E ta preocupá tocante e situacion mundial cu ta empeora. Pero, despues di a mira e video i tur e hovenan excelente cu ta sirbi den Betel cu un berdadero propósito den nan bida, su actitud a cambia completamente. El a asisti na nos Dia Special dje Asamblea i a pidi un estudio bíblico dos bez pa siman. Un otro studiante di Bijbel, un profesora di siñanza segundario, a fia e video pa mustra su famía. Nan a kere cu Testigo di Jehova ta solamente un organizacion débil, impopular, i chikito. Nan a keda asombrá cu e alcance mundial di nos trabao i éxito cu nos tin, gracias na Jehova.”—J. B.

“Mi no por expresa cu palabra e gozo cu mi a sinti ora un señora cu locual mi ta studia e Bijbel a cuminza yora di gozo i agradicimento despues di a mira e video. El a bisa cu awa den wowo: ‘Con hende por keda sin mira cu esaki sí ta e organizacion di e berdadero Dios, Jehova? Mi nunca tabata sa cu ta existi hende asina.’ Anto el a bisa: ‘Mi kier bautiza.’”—C. D.

“Nos tabatin hopi éxito hungando e ­video pa studiante di Bijbel. Ayeranochi esposo di un señora cu ta studia e Bijbel cu mi casá a bishitános. E tabata mashá contra. El a wak e video. Despues el a haci pregunta i a bai cu un Bijbel i e buki di estudio bíblico Bo por biba pa semper den Paradijs riba tera. Na antes el a kima tur literatura bíblica di su señora!”—D. H.

Hovennan també ta gusta e video mashá, manera e sigiente comentario ta mustra:

“Mi tin seis aña i mei. Mi a gusta e parti tocante e Bijbel i ora cartón a pasa lihé.”—K. W.

“Nos yiunan a bisa cu e ta mihor cu cualkier programa cu nan a mira na TV.”—R. C.

“Despues di a mira e video pe segunda bez, nos yiu di cinco aña di edad, cu a presta mashá atencion na tur parti di dje, a puntra, ‘Nos por wak esei tur dia?’ Nos yiu di tres aña a bisa, ‘Mi kier bai Betel i traha buki!’”—M. E.

“Mi yiunan, Robin i Shannan, di 9 i 12 aña di edad, ta sigi hunga e video bez tras bez. Mi yiu di mas chikito despues di a wak e video a bisa, ‘Mi ta gusta sali den e sirbishi di feld. E ta dushi.’ Nos ta kere cu e video ta tene un efecto directo riba e bida di nos famía. Ta ki refrescante pa pone un programa di television cu bo por mira cu trankilidad!”—N. B.

“Mi tin 13 aña i mei di edad. E video nobo a yudámi mira cu e percuracion maraviyoso di Jehova Dios no ta bini di mes. Ta un privilegio pa pertenece ne pueblo di Dios.”—K. W.

“Mi tin 16 aña di edad, i e video a yuda concienciámi di cu nos ta haci un trabao di alcance mundial.”—A. M.

“Nos yiunan a bisa cu nan a perde interés den programa di television despues di a mira loke por ta e berdadero programa teocrático. Además, el a fortalece nan deseo di drenta den e sirbishi di tempo completo.”—L. M.

També, el a motiva esnan cu tabata Testigo di Jehova pa hopi aña.

“Si e video a tene tanto efecto riba nos cu ta Testigo di Jehova, cuanto mas lo e afecta otro hende? Ora e sistema aki ta bira insoportabel, mi ta aparta un ora di mi tempo pa bishitá Betel den e bon ambiente dje sala di mi cas!”—K. B.

“Despues di a mira e cuidao i precision cu nan ta dedica na tur e trabao, mi a sinti e deseo di bai den mi camber i braza tur mi literatura bíblica.”—L. P.

Nos ta animábo també pa aparta tempo pa wak e video Los testigos de Jehová: la organización tras el nombre. Lo e dunábo un perspectiva diferente di bida i yudábo tene confianza den un futuro sigur.

[Nota]