Briya Como Iluminador den Mundo

DEN un mundo cu hende inmoral i perverso ta corrumpi, berdadero hende cristian mester ta fuente di luz mundialmente. Nan tin cu ser iluminador den un mundo di scuridad. (Filipense 2:15) Hopi miles di hende ta dispuesto pa haci esei como pionero, of predicador di tempo completo. Un gran cantidad di nan a sirbi como pionero pa hopi aña i a recibi recompensa mirando tur sorto di hende haci cambio den nan bida pa bira berdadero disípel di Jesucristo.—Mateo 28:19.

Pa anima pionero asina pa sigi den e sirbishi sagrado i mehora nan aptitud di siña otro, Testigo di Jehova a organiza Scol di Sirbishi di Pionero. Esei ta un curso pa diez dia basá riba e Bijbel i prepará pa yuda pionero den tres campo: camna cu Jehova como sigidor di Jesucristo; abunda den amor pa tur e asociacion di rumanan; briya como iluminador den mundo.

E Scol di Pionero den e República Centroafricano

Den Bangui, e capital dje República Centroafricano, 48 studiante i 2 instructor a reuni durante Augustus di 1991. Studiante tabatin cu recibi instruccion i sugerencia práctica pa nan trabao. Kico tabata tanto excitante tocante e klas di Bangui?

Entre otro cosnan, 21 studiante tabata asisti na scol seglar ainda. Toch, nan por a aparta tempo pe sirbishi di pionero regular. Nan a dedica luna di vacacion, fin di siman liber, i óranan djatardi pa predica i siña otro hende.

E hovenan a mira e importancia di sirbi nan Creador awor. (Eclesiastés 12:1; compara cu 1 Corintio 7:29.) Un echo notable tá cu 12 di nan tin mayornan cu no ta hende creyente. Na cas, ta nan so den e berdad. E tata di dos mucha homber, ruman carnal, a sácanan for di cas pa motibo di nan fe. Un pareha hoven den e congregacion a habri nan porta pa recibi e dos mucha.

E caso di Michée i Sulamithe Kaleb tabata diferente. Nan dos ta pionero i també ta bai scol, pero nan mayornan ta Testigo di Jehova. Realmente, nan tata tabata studiante den e mesun klas!

Congregacion den Bangui també a participa den e scol, solamente di diferente manera. Nan a atende na necesidad material, tal como cuminda. Pe klas tin cuminda, nan a contribui placa i també galiña, sucu, arroz, i yuca.

Congregacion den e becindario a organiza e cushina pa prepara cuminda senciyo pero delicioso. E República Centroafricano ta famoso pa su ngunza, un cuminda cu tur hende ta gusta. Su receta? Foyo di yuca, azeta di coco, ceboyo, hopi konoflo, hopi pindakas, i pacenshi pa lagué cushiná bon. Cada grupo tabatin nan manera special pa prepara esei. E tabata un gran éxito; ningun hende a nengué.

Dos otro klas tabata celebrá pafó di Bangui, uno den Bouar i e otro den Bambari, haciendo un total di 68 studiante. Durante e último dos aña, e República Centroafricano a mira un aumento dje cantidad di pionero. Durante Januari di 1992 tabatin 149 pionero regular i 17 pionero special hunto cu 78 pionero auxiliar. Esei a resulta den un aumento di actividad den tur e país cu máximo nobo di publicador, ora, rebishita, i estudio bíblico. Ora cu tin mas trahador, tin mas cosecha.—Isaías 60:21, 22; Mateo 9:37, 38.

Nos ta duna agradicimento na Jehova Dios pa tal percuracion i na su organizacion terrenal pe preparacion di tal klas. Nan ta yuda tanto studiante como instructor pa briya como iluminador den e mundo scur aki.

[Plachi na página 24]

Bintiun studiante dje scol di pionero ta asisti na scol segundario ainda

[Plachi na página 25]

E dos hoven ei tabata sacá for di cas pa causa dje berdad