Recogimento di “Cosnan Deseabel” den Polonia

SEGUN informe, Polonia ta un país católico. Segun datos oficial, 93 porciento dje pueblo ta pertenece ne Iglesia católico. Sin embargo, cambio político i social reciente a haci un impacto notable riba e pueblo i nan bida religioso. Investigacion ta indica cu solamente rond di 50 porciento di esnan entrevistá ta considera nan mes di ser católico practicante.

Den Mei di 1989 e gobierno a reconoce Testigo di Jehova como un organizacion religioso den Polonia. Desde e tempo ei, mas cu 11.000 hende nobo a uni cu Testigo di Jehova como publicador dje bon nobo di Reino. Awor mas cu 106.000 publicador di Reino ta asocia cu mas cu 1.300 congregacion, i 200.422 hende a asisti ne celebracion dje Conmemoracion dje morto di Cristo na 1991. Asina, e recogimento profetizá di ‘cos deseabel dje nacionan’ ta sosode den Polonia. (Ageo 2:7) Recientemente, título di noticia a menciona asamblea internacional di Testigo di Jehova celebrá den Polonia. Pero un bista di algun pueblo mas chikito den e país por mustra specialmente con e trabao di recoge ta sigi den e país.

Pionero ta Habri e Camina

Sztum ta un pueblo di rond di 10.000 hende situá cerca e lugar unda e rio Vistula ta basha den Lamá Báltico. E pueblo pa mashá tempo a ser considerá como un territorio yen di piedra den loke ta toca e trabao di predica. Na 1987 tabatin ocho publicador so den e becindario. Sin embargo, cosnan a cuminza cambia ora pionero, of proclamador di Reino di tempo completo, a yega. Ne reunion di cinco, celebrá den un teater, 100 hende interesá a asisti! Nan a forma un congregacion despues di dos aña di esfuerzo diligente. Awor 90 publicador tin nan mes Salón di Reino, i 150 hende ta asisti na nan reunion regularmente.

Ta di spera cu oposicion a bini pronto for dje Iglesia católico. Un soeur “specialista” a tira speech difamatorio contra Testigo di Jehova, i a acusánan di siña doctrina falso. Pero, manera ta sosode tanto bez, esei a resulta malu pa nan mes. Discurso di dje solamente a haci hende deseá di conoce e berdad. Hopi di nan a siña e berdad i awor ta pionero regular! Nan ta bisa: ‘Ora nos tabata siña e berdad, nos a kere cu tur hende cu kier bira Testigo di Jehova mester bira mescos cu nan maestro, locual kier men bira pionero.’ Pues, e spiritu di pionero ta yena henter e congregacion.

Como resultado, nan ta conduci mas cu 180 estudio bíblico di cas den e territorio. Usando e buki Bo por biba pa semper den Paradijs riba tera, nan asta a siña algun hende leza. Ne mesun tempo, nan a siña e berdad. Estudio bíblico di diez minut ta ser conducí regularmente cu un grupo di prisionero dje prisón local ora nan ta sali pa bari caya. Uno di nan a bini pa defende un testigo ora un muher cu tabata pasa a cuminza zundré. El a corre cerca e ruman, a kita e buki Biba pa semper for di su man, a hizé, i a puntra e muher zundrador: “Bo no por leza? Kico tin skirbí aki? Bo por biba pa semper den Paradijs riba tera! Bo a yega di tende di tal cos? Pakico bo ta insulta Dios i adorador di dje?”

E Tópico di Conbersacion dje Pueblo

Kruszwica, e capital legendario di Polonia di antes, ta un fortaleza católico. Asta meimei di 1990, tabatin solamente un poco Testigo di Jehova den su 9.300 habitante. Pero, e bendicion ricu di Jehova tabata riba esfuerzo di proclamador di Reino.

Riparando e hipocresía di nan lider spiritual, mas i mas hende—specialmente e hovenan—a acudi na Testigo di Jehova pa un solucion. Den mashá poco tempo, nan a cuminza 20 estudio bíblico di cas. E pastor dje parokia a duna algun predicashi malicioso contra Testigo di Jehova, pero esei no a desanima hende sincero di asisti na nan reunion. Testigo di Jehova a bira e tópico principal di conbersacion den tienda i parque i asta den misa. Mitá aña despues dos grupo grandi di estudio di buki a wordu formá. Awor Kruszwica tin un congregacion mashá activo di mas cu 35 adorador di Jehova Dios. Nan ta conduci 75 estudio bíblico di cas i ta keda ocupá treciendo e “cosnan deseabel” cu na antes tabata catibo di religion falso.

Entre eseinan ta Bogdan di 23 aña di edad, un miembro di un famía fuertemente católico. El a bisa: “Mi tabata bebe, huma, i hiba un bida inmoral. Nan a yamámi bandido i anarquista, i a parce cu ningun hende a preocupa. Pero, ora mi a cuminza studia e Bijbel, mi mama a menaza di bebe veneno. Mi no por a wanta tur e presion i mi a corta tur contacto cu Testigo di Jehova. Despues, cu e yudanza amoroso di pionero special, mi por a librámi di tur mal costumber. Desde cu mi a bautiza ne asamblea di districto na 1991 ‘Stimador di Libertad,’ mi a pone e sirbishi di tempo completo como mi meta den bida i a traha como pionero auxiliar despues di esei.”

Slawomir di bintiun aña di edad tabata inbolucra den spiritismo i satanismo, locual el a rechaza despues di a mira cu e Bijbel ta condena tal costumber. Segun ele: “Pero Satanás a persisti. Un anochi e toca disco a cuminza toca sin cu mi a cendé, i mi a tende música satánico, aunque mi a saca for di cas tur cos relacioná cu adoracion di Diabel. Mi a haci oracion na Jehova Dios, i el a yudámi recobra mi equilibrio spiritual. Un sikiater cu mi tabata consulta pa complace mi mayornan a ­reconoce mehoramento radical den mi estado i a conclui cu mi tabata sano di salud. El a skirbi riba mi registro: ‘Testigo di Jehova a curé.’”

Resistiendo e Spiritu di Mundo

Zuidwest di Kruszwica ta Środa Śląska. “Cosnan deseabel” ta presenta també den e pueblo chikito ei di 9.000 hende. Cuater aña pasá, tabatin un hermana spiritual so bibando ei. Pero, awor e cantidad di publicador di Reino a aumenta te 47. Hopi Testigo di Jehova na antes tabata den e trampa di spiritismo, drogadiccion, i inmoralidad. Nan ta kere cu esei tabata debí principalmente ne bashí spiritual cu a existi den nan religion cu solamente por condena hende spiritualmente i no por yúdanan. Testigo di Jehova ta ofrece hende berdadero alivio.

E hovenan den e congregacion a haci scol nan territorio personal pe trabao di predica. Segun Kasia di 18 aña di edad, “Hopi bez compañé di scol a bisámi: ‘Bo ta perde bo hubentud.’ Pero mi a evita hopi dificultad, i mi bida tin un nificacion. Mi ta conduci varios estudio bíblico na scol i no ta neglisha ni mi huiswerk ni mi estudio personal. Mucha muher cu ta bisa cu mi ta ‘perde mi hubentud’ tin yiu caba, i ta luchando cu un cantidad di problema.”

Publicacion di Watch Tower ta bira mashá popular den scol local. Por ehempel, un jufrow siñando polaco a bisa alumno pa sigi e idioma senciyo di nos revista Despertad! como un modelo den skirbimento di nan opstel. Ewa, un pionero auxiliar, ta haya e foyeto La escuela y los Testigos de Jehová mashá útil. “Ami realmente ta aprecia e publicacion. Mi maestronan ta conocé bon. Mi nunca tin problema di haya vrijstelling for di klas pa mi asisti na asamblea grandi.” Tal actitud excelente di parti di hovenan ta haci e curazón di Jehova Dios alegrá.—Proverbio 27:11.

Criminal sin Gevoel ta Cambia

Pariba di Środa Śląska ta Strzelce Opolskie, unda tin dos prisón. Uno di nan ta un prison di siguridad máximo pa criminal incorrigible. Testigo di Jehova ta bishita regularmente e dos institucion penal pa hiba e berdad na prisionero, hopi di locual també ta catibo di Babilonia e Grandi, e imperio mundial di religion falso.—Revelacion 18:1-5.

Testigo di Jehova ta studia e Bijbel cu preso individual i cu grupo chikito, algun di locual a bautiza. Aunque nan tin cu cumpli cu nan sentencia, nan ta predicando activamente e bon nobo na otro preso. Un prisionero preparando pa bautismo a haci tanto cambio notable cu autoridad dje prisón a lagué bai cas un bez pa siman. Otronan a skirbi nan famía expresando nan determinacion di sali for di prisón, no como criminal, sino como Testigo di Jehova.

Un oficial principal di un prisón a keha cu pastor católico tabata bini pero no a logra nada. El a puntra Testigo di Jehova: “Kico ta haci posibel pa boso cambia i rehabilita e hendenan aki?” Un carta di un prisionero mandá pa su famía ta contestá: “Aki den prisón, Testigo di Jehova a bisámi tocante e maraviyoso promesa di Dios tocante e gobierno nobo, e Reino di Jehova Dios, cu lo goberna riba tera pronto. Aki den prisón mi tabatin tempo pa analiza mi moda di biba na antes den e luz dje Bijbel. Ya cu mi a saca conclusion amarga, e deseo a drentámi di bira un hende liber i hayámi un ciudadano dje Reino di Dios. Awe mi ta un Testigo di Jehova bautizá.”

Den e otro prisón, hopi preso tin sentencia di 25 aña pa asesinato. Un estudio bíblico regular ta ser conducí cu 12 homber. Uno di nan a dedica su bida na Jehova Dios i a bautiza, i otronan ta planeá pa dal e mesun paso. Apreciando e bon resultado dje moda educativo di Testigo di Jehova, e oficial principal dje prisón a bisa: “Mi no tin 12 preso. Mi tin 600. Hacími e fabor di yudámi rehabilitánan. Lo mi suminstra na boso tur loke boso mesté, pero haci fabor di prepara e programa. Atende na nan!”

Esei ta exactamente loke e rumanan a haci. Nan a presenta un programa bíblico tratando cu e propósito di bida, e speranza pe futuro, i e importancia di bandona mal costumber. Nan també a conta experencia di un prisionero di antes cu a bira un Testigo di Jehova i cu tempo tabata nombrá como anciano di congregacion. E testigonan també a duna punto sobresaliente di historia di bida di hortador di diamante i un abusador di droga cu a siña e berdad.a E 20 prisionero presente a haya e programa sumamente interesante i a haci hopi pregunta, i algun asta a pidi estudio bíblico.

Un Prueba di Fe i Awante

Lubaczów ta un pueblo chikito di 12.000 hende cerca e frontera di Ucrania. E trabao di evangelizá a bai mas lihé den 1988 ora pioneronan a drenta pa yuda e 12 publicador local. Awor tin 72 publicador activo di Reino, i 150 a asisti na celebracion di Memorial na 1991 den un Salón di Reino recién construí.

Den Juni di 1991, papa Juan Pablo II a bishita Lubaczów. Pero, esei no a haci nada pa fortalece berdadero fe den e pueblo. Hopi di nan ta bao di atake di duda i pregunta tocante e propósito di bida i e speranza pe futuro. Ora nan no por obtene contesta satisfactorio for dje clero, nan ta acudi na Testigo di Jehova. Aunque na principio e pueblo por tin remordimento di concenshi pasobra nan a bira lomba pa nan religion, e berdad bíblico cu nan ta siña ta yúdanan mira cu nan a tuma e decision correcto.

E experencia di Honorata ta típico, locual awor ta un pionero regular. Rond di un aña atrás, el a puntra e pastor den confesion tocante e nomber di Dios. E pastor a contestá: “Dios ta amor—esei ta su nomber di mas bonita.” Despues di un rato, el a agrega: “Bo ta manera un emmer di awa limpi manera cristal den locual hende a tira inkt. Efecto di esei ta imposibel pa cambia.” Asina el a haya su contesta. “Mi a decidi e ora ei di bira un Testigo di Jehova,” segun Honorata. “Esei també ta imposibel pa cambia.”

Casi tur hende cu a siña e berdad den Lubaczów tabatin cu wanta oposicion fuerte i asta fanático. Pero, esei no a stróbanan di acepta e berdad bíblico i tuma nan decision pa Jehova Dios.

Elżbieta a relata: “Na principio nan a zutámi na cas. Anto mi famía a drenta di golpi den Salón di Reino. . . . Nan a hibámi cas i a cuminza ‘administra husticia’ cu un palu bruto. Nan a golpeámi i a scopmi di cabez te na pia simplemente pa motibo cu mi tabata asocia cu Testigo di Jehova. Nan a golpeámi asina duro cu mi tabatin mester di tratamento médico urgentemente i nan a mandámi hospital. Jehova a yudámi, i mi a recobra. Mi famía a rechazámi. Ora mi a menciona esei cu e pastor, el a menospreciámi, puntrando: ‘Bo a bini pa keha simplemente debí na algun boftá?’”

Un otro hermana ta corda: “Tur aña mi a bai na Częstochowa pa camna den e Camina di Cruz, cu mi a considerá como un deber pa tur hende católico sincero. Ainda mi tin marca riba mi rudía.” Na 18 aña di edad el a siña e berdad i a bisa e pastor i su famía cu e no ta bai misa mas. E tabata golpeá severamente—“asina malu cu mi tabatin hersenschudding,” segun ele. “Pero den e hospital mi a recobra suficiente pa asisti ne asamblea di districto ‘Stimador di Libertad.’ Mi a yora di alegría ora mi a mira e berdadero unidad i amor di hende sin fanatismo—loke mi nunca a mira den Częstochowa. Ki feliz mi ta keda cu mi a experimenta e gentileza di Jehova i a siña confia den dje.” Jehova Dios ta fortalece i ta sostene tur hende cu ta tira nan carga pisá riba dje.—Salmo 55:22.

Hopi catibo di Babilonia e Grandi ta obedece awor e yamada di “sali for di dje” den e país católico aki, mescos cu nan ta haci na tur parti. Si ta e boluntad di Jehova, su pueblo intrépido lo sigi cosechá asta mas dje “cosnan deseabel” plamá den tur Polonia. Siguramente, hopi di nan lo responde ainda ne yamada: “‘Bin!’ I laga ken cu tin sed bini; laga ken cu kier tuma e awa di bida gratis.”—Revelacion 18:4; 22:⁠17.

[Nota]

[Mapa na página 24]

(Pa teksto den su formato kompletu, wak publikashon.)

POLONIA

Sztum

Poznan

Kruszwica

Varsovia

Środa Śląska

Częstochowa

Strzelce Opolskie

Lubaczów

[Plachi na página 26]

Predicando e mensahe di Reino den Kruszwica, Polonia