Tin un Camina di Escape for dje Estado Pecaminoso di Humanidad?

CHISAKO, un mama i su cuater yiu tiener, tabatin e trabao di tene limpi excusado público den un stad 600 km for di su cas. Durante su trabao el a canta un sutra (sermón budista), aunque e no a comprendé. Esei tabata un costumber di un grupo religioso purbando di descubri esencia di tur religion.

Chisako ta corda cu “Aunque mi a sigi costumber penoso, mi no por a cambia mi personalidad. Profundo den mi curazón, mi no por a pordona otro hende ni stímanan cu un motibo sincero.”

Asta den tera oriental, unda e mayor parti di hende no tin ningun concepto dje picá cu e Bijbel ta siña, e tendencia di peca ta remorde e concenshi di hopi hende, manera a sosode Chisako. (Romano 2:14, 15) Ken no ta sinti remordimento ora nan no ta mustra bondad na hende den un situacion lastimoso of ta sinti duele pa palabra cu nan no mester a papia? (Santiago 4:17) I no ta berdad cu e maldito celo ta presente tanto den hende bieu como den hovenan?

Pakico hende ta sinti remordimento asina? Pasobra, sea cu nan sa of no, nan tin un sintimento padén di maldad, di picá. Realmente, sea cu hende ta conoce siñanza bíblico tocante picá of no, tendencia pecaminoso ta afecta nan tur. Un experto riba e asunto a yega ne sigiente conclusion: “Tur a peca i no ta alcanza e gloria di Dios.”—Romano 3:23.

Picá Por ta Kitá?

Hopi hende djawe, specialmente den cristiandad, ta haci esfuerzo pa kita for di nan concenshi e sintimento di culpa cu picá ta causa. “E palabra mes ‘picá’ . . . casi a desparce,” segun Dr. Karl Menninger den su buki na inglés Kico a pasa picá? Sin embargo, pecador evitando e palabra “picá” ta mescos cu hende di edad evitando e palabra “bieu.” Nos tin cu acepta e echo cu nos tin tendencia pecaminoso i mester ta rescatá for di tal estado miserabel. Pero, ken por rescatános?

Apóstol cristian Pablo a haci e mesun pregunta despues di a admiti su mes tendencia di peca contrario cu su mes deseo: “Homber ­miserabel cu mi tá! Ken por librámi for dje curpa cu ta padeciendo e morto aki?” Anto Pablo a sigi contestá: “Gracias na Dios mediante Jesucristo nos Señor!” Pakico? Pasobra Dios a haci arreglo pa pordón di picá mediante e sacrificio di rescate di Jesús.—Romano 7:14-25.

No obstante, hopi dje 3.500.000.000 hende no cristian di mundo (dobel e cantidad di hende yamá cristian) ta haya e idea di un rescate mashá difícil pa acepta. Por ehempel, e doctrina dje rescate a bira e piedra di tropiezo principal pa un mohamedano bibando den Hapón cu a studia e Bijbel pa un tempo. Pa hopi hende oriental e idea cu un solo homber por muri pa tur hende ta demasiado.

Esei ta di comprende, ya cu algun hende den cristiandad ta haya cu tal doctrina fundamental ta difícil pa comprende. E New Catholic Encyclopedia ta reconoce cu e “teología dje rescate en parti ta keda inalcanzable i ta sigi ser un problema den teología.”

E palabra dje autor religioso N. H. Barbour ta saca na cla extento dje confusion cu tin riba e doctrina: “E morto di Cristo no por a paga e debe pe picá di hende, no mas cu un tata terrenal por considera hincamento di feneta den e curpa di un musca i causa su sufrimento i morto como un pago husto pe mal conducta di su yiu.” Den e tempo ei Barbour tabata socio di Charles T. Russell, cu a mira e necesidad urgente pa defende e siñanza dje rescate. Russell a alehá for di Barbour i na 1879 a cuminza publica un revista nobo, cu despues a bira e revista aki cu bo ta leza. Desde principio, E Toren di Vigilancia tabata defensor dje sacrificio di rescate di Jesucristo.

Pero, hende sin fundeshi “cristian” por hamás acepta e doctrina? Pa averigua esei, láganos examina cu mas atencion e siñanza di cu un solo hende a muri pa tur.