Informe di Proclamador di Reino

Jehova Dios ta Recompensa un Hoven Fiel

HOVENAN fiel ta mashá precioso den e bista di Jehova. E sigiente experencia di un hoven fiel mester anima otro hovenan pa warda nan integridad mientras cu nan ta sirbi Jehova Dios.

Den Argentina un mucha homber di 11 aña di edad i su ruman menor a studia e buki E berdad cu ta hiba na bida eterna cu nan abuela. E mayornan dje dos mucha a opone esei un bez, i a prohibi e muchanan di bai Salón di Reino. Pa algun tempo, pa nan asisti na reunion, e muchanan a sali for di bentana dje baño, a baha den e curá, i djei a pasa riba e muraya ne curá dje beciña i a bai Salón di Reino. Anto un hende a bisa nan mama cu nan tabata asisti na reunion di Testigo di Jehova. E mama a amenazánan cu zota, i esei a spanta e ruman menor, cu no a studia mas. Pero esun mayor a persisti. El a logra asisti na reunion pa cinco aña sin cu su mayornan sa.

Ora e tabatin 16 aña di edad, e kier a tuma un curso den scol segundario cu nan no a ofrece den su pueblo. Leu for di su cas, e tabatin mas libertad pa sigi den e berdad. Su mayornan a consinti pa lagué bai, i tur cos a bai bon pa tres luna. Anto e director dje scol a informa su mayornan cu nan yiu a nenga di saluda e bandera i canta e himno nacional. Dilanti di un auditorio consistiendo dje director, su mayornan, un secretario, un abogado, i diez profesor, e hoven por a duna un testimonio excelente di pakico su concenshi no a permitié participa den tal acto. (Éxodo 20:4, 5) E mayornan a keda furioso. E mama a obtene un revolver cu intencion di mata e abuela, cu el a considera responsabel. Pero, e nunca por a hayé so.

Mas tardi, bao di sugerencia di un amigo dje famía i cu aprobacion di director dje scol, e mayornan a decidi di pone e hoven den un clínica pa hende mentalmente enfermo, pensando cu tratamento sikiátrico por hacié bandona su fe. Personal dje clínica a hiba e hoven na un lugar 100 kilometer di distancia den un auto i a duné indjeccion grandi di insulina i otro droga te cu el a perde tino. Ora el a lanta, e tabata completamente desorientá, no a conoce ningun hende, i a manifesta amnesia parcial. Despues di varios examinacion, docter no por a haya ningun desordu mental den dje. Pero, e clínica a sigi duné tratamento. Ora e tabata na tino, e hoven a pidi Jehova Dios continuamente pa no bandoné i a rogué pa duné e fortaleza pa wanta. Jehova Dios sí a protehé, i cu tempo e clínica a lagué sali.

Na un ocasion e director di scol a puntra e hoven si e tabata cla pa nenga su fe. Ora e hoven a bisa cu no, e director a bisa e mayornan pa hibé ne clínica di nobo pasobra e tabata mas loco cu nunca. E mayornan a hibé na un pension i a bisa e doño pa percura pe no bai na reunion di Testigo di Jehova. Despues cu e mayornan a bai, ki un sorpresa e hoven a recibi! Doño dje pension tabata Testigo di Jehova! Finalmente e mayornan a descontinuá e tratamento sikiátrico, kedando convencí cu docter a gáñanan. Mientras tanto, e Corte Supremo di Argentina a dicta cu yiu di Testigo di Jehova no por ta expulsá for di scol si nan nenga di saludá e bandera.

Tal prueba a beneficiá e hoven fiel? Sí. El a bisa: “Mi a logra duna testimonio extenso na docter, profesor, compañé di scol, mayornan, i pariente, realmente, na henter e stad. Mi mayornan a suaviza un tiki i tin un mihor concepto di Testigo di Jehova. Awor, ora mi ta reflexiona riba mi hubentud, mi ta mira ki maraviyoso i tierno nos Dios tá cuidando esnan cu ta sigi leal na dje. Ta exactamente manera e salmista a bisa den Salmo 27:10: ‘En caso cu mi mes tata i mi mes mama ta bandonámi, asta Jehova mes ta recibími.’”

E hoven tin 23 aña di edad awor, ta casá, i ta mashá activo den e sirbishi di Jehova Dios. Berdaderamente, e poder sostenedor di Jehova Dios ta sin límite.—Salmo 55:22.