Hesus A Bira e Mesías

Huan tabata prediká i bisa e hendenan: ‘Un persona ku ta mas importante ku mi lo bini.’ Tempu ku Hesus tabatin mas o ménos 30 aña, el a sali for di Galilea i bai riu Yordan. Huan tabata batisá hende na riu Yordan. Hesus tabata ke pa Huan batis’é, pero Huan a bis’é: ‘No ta ami mester batisá bo. Ta abo mester batisá mi.’ Hesus a bisa Huan: ‘Yehova ke pa bo batisá mi.’ Pues, nan a drenta riu Yordan, i Huan a hinka Hesus kompletamente bou di awa.

Despues ku Hesus a kaba di batisá, el a hasi orashon. Na e momento ei, shelu a habri, i spiritu santu di Dios a baha riba Hesus manera un palomba. Anto Yehova a papia for di shelu i bisa: ‘Abo ta mi Yu stimá. Bo tin mi aprobashon.’

Ora spiritu santu di Yehova a baha riba Hesus, Hesus a bira Kristu, òf e Mesías. Awor Hesus por a kuminsá hasi e trabou ku Yehova a mand’é hasi riba tera.

Asina ku Hesus a kaba di batisá, el a bai den desierto i keda 40 dia den desierto. Despues, el a bai bèk serka Huan. Ora Hesus tabata kana bai serka dje, Huan a bisa: ‘Ata e Lamchi di Dios ku lo kita piká di mundu.’ Huan kier a laga hende sa ku Hesus tabata e Mesías. Bo sa kiko a pasa ku Hesus ora e tabata den desierto? Ban wak.