Kiko Abo Ta Kere?

Algun grupo religioso ku ta interpretá Beibel literalmente ta kere ku algun mil aña pasá Dios a krea tera i tur loke tin riba dje den seis dia di 24 ora. Di otro banda tin ateonan ta promové e idea ku Dios no ta eksistí, ku Beibel ta un buki di mito i ku tur forma di bida a presentá pa puru kasualidat.

Mayoria di hende tin un punto di bista ku ta mas o ménos entre e dos ideanan akí. E echo ku bo ta lesando e foyeto akí ta indiká ku probablemente abo ta un di nan. Kisas bo ta kere den Dios i ta respetá Beibel. Pero tal bes bo ta balorá tambe opinion di sientífikonan ku hopi influensia ma ku no ta kere den kreashon. I si bo ta un mayor, podisé bo ta puntra bo mes: ‘Ta kiko lo mi tin ku bisa mi yunan ora nan hasi mi pregunta tokante evolushon i kreashon?’

Kiko ta meta di e foyeto akí?

No ta nos intenshon pa ofendé hende ku ta interpretá Beibel literalmente ni tampoko esnan ku no ta kere den Dios. Mas bien, nos ta spera ku e foyeto akí por animá bo pa bolbe analisá sierto kreensia ku bo tin. E ta duna un splikashon tokante relatonan bíbliko di kreashon ku kisas bo no a konsiderá ainda. I e ta enfatisá dikon bo opinion tokante orígen di bida realmente ta hasi un diferensia.

Lo bo konfia den esnan ku ta bisa ku no tin un Kreador inteligente i ku Beibel ta inkonfiabel? Òf lo bo analisá loke Beibel ta bisa realmente? Kua di e kreensianan akí ta bale la pena pa bo pone bo konfiansa den dje? Lo bo pone fe den Beibel òf den evolushon? (Hebreonan 11:1) Pakiko no analisá e echonan?