“Nan No A Hasi Kaso”

IGNORÁ spièrtamentu por resultá den desaster.

E stat Darwin, Oustralia, tabata den pleno preparashon pa dianan di fiesta na 1974 ora ku sirenanan a duna spièrtamentu ku tin un siklon na kaminda. Pero pa kasi 30 aña ningun siklon no a kousa daño na Darwin. Dikon esei lo a sosodé nèt awor? Mayoria habitante no a konsiderá e peliger komo algu realmente serio sino te ora ku bientunan feros a kuminsá ranka dak i muraya di kas bai kuné kaminda nan tabata tur di kremp den otro. Pa su siguiente mainta, e stat tabata un ruina.

Na novèmber 1985, un volkan na Colombia a eksplotá. Sneu i eis ku a dirti a kousa un avalancha di lodo ku a dera mas ku 20.000 habitante di e stat Armero. Akaso no tabatin spièrtamentu di antemano? Wèl, e seru tabatin lunanan ta sakudí. Sin embargo, komo ku e hendenan di Armero a kustumbrá biba kantu di un volkan, mayoria di nan no a preokupá. Outoridatnan a risibí spièrtamentu ku pronto un desaster lo tuma lugá, pero nan no a hasi kasi nada pa spièrta e poblashon. Mas bien nan tabata hasi anunsio na radio pa kalma e pueblo. Nan a usa e loutspikernan na misa pa urgi hende pa keda trankil. Durante anochi, tabatin dos eksploshon espektakular. Abo lo a bandoná bo pertinensianan i hui? Masha poko hende a purba hasi esei, te ku tabata demasiado lat.

Hopi bes geólogonan ta pronostiká ku basta eksaktitut unda temblornan lo tuma lugá. Pero masha poko bes nan por pronostiká ki ora presis lo e tuma lugá. Na 1999, temblornan rònt mundu a kosta bida di 20.000 hende. Hopi di esnan ku a muri a pensa ku esei lo no a sosodé nunka ku nan.

Kon Abo Ta Reakshoná Riba Spièrtamentunan Ku Ta Bin for di Dios Mes?

Hopi tempu di antemano Beibel a deskribí na un manera bibu e susesonan ku lo a identifiká e último dianan. En konekshon ku esei, Beibel ta urgi nos pa konsiderá “e dianan di Noe.” “Den e dianan ei promé ku e diluvio,” hende tabata okupá ku e aktividatnan akustumbrá di bida diario, ounke sin duda nan tabata preokupá pa e violensia ku a reina. Pa loke ta e spièrtamentu ku Dios a duna mediante su sirbidó Noe, “nan no a hasi kaso te ku e diluvio a bini i a bari nan tur.” (Mateo 24:37-39, NW) Abo lo a hasi kaso di e spièrtamentu? Bo ta hasi kaso di dje awor?

Kiko si bo tabata biba den Sodoma, serka di Laman Morto, den e dianan di e hòmber Lòt, un subrino di Abraham? E área di kunuku pafó di e stat tabata manera un paradeis. E stat tabata gosa di prosperidat. E hendenan no tabatin ningun preokupashon. Den e dianan di Lòt, “nan tabata kome, nan tabata bebe, nan tabata kumpra, nan tabata bende, nan tabata planta, nan tabata traha kas.” E sosiedat den kua nan a biba tabata tambe sumamente inmoral. Abo lo a tuma na pechu e spièrtamentu ku Lòt a duna kontra práktikanan malbado? Abo lo a skucha ora el a bisa ku Dios ta determiná pa destruí e stat di Sodoma? Òf lo bo a konsiderá e asuntu manera un chansa, manera Lòt su futuro yernonan a mir’é? Òf kisas lo bo a kuminsá hui pero despues bira bèk, manera e esposa di Lòt a hasi? Ounke otro hende no a tuma e spièrtamentu na serio, riba e dia ku Lòt a sali for di Sodoma “a yobe kandela i suafel for di shelu i a destruí nan tur.”—Lukas 17:28, 29.

Mayoria di hende den nos tempu no ta hasi kaso. Pero e ehèmpelnan aki a keda konserbá den e Palabra di Dios komo un spièrtamentu pa nos, pa animá nos pa KEDA VIGILÁ!

[Kuadro/Plachi na página 22]

Realmente Tabatin un Diluvio Mundial?

Hopi krítiko ta bisa ku Nò. Pero Beibel ta bisa ku Sí.

Hesukristu mes a papia tokante dje. E tabata na bida tempu ku e Diluvio a tuma lugá, i for di shelu el a mir’é sosodé.

[Kuadro/Plachi na página 23]

Sodoma i Gomora di Bèrdat A Ser Destruí?

Arkeologia ta duna prueba di e suseso aki.

Historia di mundu ta menshon’é.

Hesukristu a konfirmá e suseso, i 14 buki di Beibel ta referí na loke a sosodé.