‘E Ora di Huisio’ A Yega

REVELASHON, e último buki di Beibel, ta informá nos di e echo ku tin un angel bulando meimei di shelu ku bon notisia òf “evangelio eterno pa prediká.” E angel ta bisa na bos haltu: “Teme Dios i dun’é gloria, pasobra e ora di su huisio a yega.” (Revelashon 14:6, 7) E ‘ora di huisio’ ei ta enserá tantu e proklamashon komo e ehekushon di Dios su huisio. Un “ora” ta un periodo di tempu relativamente kòrtiku. E ta bini komo kulminashon di “e último dianan.” Nos ta biba den e tempu ei awor.—2 Timoteo 3:1.

Yegada di ‘e ora di huisio’ ta bon notisia pa amantenan di hustisia. Lo e ta un tempu ora ku Dios lo trese alivio pa su sirbidónan ku ta sufri na man di e mundu violento i sin amor aki.

Aworakí—promé ku ‘e ora di huisio’ terminá den destrukshon di e aktual sistema di kosnan malbado—Beibel ta urgi nos pa “teme Dios i dun’é gloria.” Abo ta hasiendo esei? Esaki ta nifiká hopi mas ku djis bisa: “Mi ta kere den Dios.” (Mateo 7:21-23; Santiago 2:19, 20) E debido temor di Dios mester pone nos demostrá un rèspèt profundo p’e. E mester pone nos kita for di maldat. (Proverbionan 8:13) Tambe e mester yuda nos stima loke ta bon i odia loke ta malu. (Amos 5:14, 15) Si nos ta onra Dios, nos lo skuch’é ku gran rèspèt. Nos lo no ta asina okupá ku otro kos ku nos no tin tempu pa lesa su Palabra, Beibel, ku regularidat. Nos lo konfi’é tur momentu i ku henter nos kurason. (Salmo 62:8; Proverbionan 3:5, 6) Hende ku realmente ta onr’é ta rekonosé ku komo Kreadó di shelu i tera, e ta e Soberano Universal, i ku amor nan ta someté nan mes na dje komo Esun ku tin derecho di goberná nan bida. Si nos realisá ku nos lo tin ku presta mas atenshon na e kosnan aki, laga nos hasi esei sin tarda.

E tempu di ehekutá huisio ku e angel a papia di dje ta konosí tambe komo ‘e dia di Yehova.’ Un “dia” similar a bini riba Yerusalèm di antigwedat na aña 607 promé ku nos era pasobra su habitantenan no a hasi kaso di e spièrtamentunan di Yehova mediante su profetanan. Dor di pensa den nan mes ku Yehova su dia no tabata serka, nan a pone nan bida den mas peliger. Yehova a spièrta nan: “E ta serka i e ta bin masha lihé mes.” (Sofonias 1:14) Un otro ‘dia di Yehova’ a bini riba Babilonia di antigwedat na aña 539 promé ku nos era. (Isaias 13:1, 6) E habitantenan di Babilonia tabatin konfiansa den nan fortifikashonnan i den nan diosnan, i p’esei nan a ignorá e spièrtamentunan ku e profetanan di Yehova a duna. Pero den un solo anochi, e medo- i personan a konkistá e gran Babilonia.

Kiko nos ta konfrontá awe? Un otro ‘dia di Yehova’ pero di alkanse hopi mas largu. (2 Pedro 3:11-14) Dios a deklará su huisio kontra ‘Babilonia e Grandi.’ Segun Revelashon 14:8, un angel ta deklará: “El a kai! Ata e gran Babilonia a kai.” Esei a tuma lugá kaba. Babilonia no por frena adoradónan di Yehova mas. Su korupshon i embolbementu den guera a wòrdu saká na kla tur kaminda. Awor su destrukshon final ta serka. Pa e motibu ei Beibel ta urgi hende na tur parti: “Sali for di dje [Babilonia e Grandi] . . . pa bo no partisipá den su pikánan i pa bo no risibí di su plaganan; pasobra su pikánan a montoná yega te na shelu, i Dios a kòrda su inikidatnan.”—Revelashon 18:4, 5.

Kiko ta Babilonia e Grandi? Esei ta e sistema mundial di religion ku tin e karakterístikanan di Babilonia di antigwedat. (Revelashon, kapítulo 17, 18) Konsiderá algun similaridat:

• E saserdotenan di Babilonia di antigwedat tabata profundamente metí den e nashon su asuntunan polítiko. Esei ta e kaso tambe di mayoria religion djawe.

• E saserdotenan di Babilonia hopi bes a fomentá e gueranan di e nashon. Religion di tempu moderno hopi bes a hiba delantera den bendishoná sòldá ora ku e nashonnan tabata bai guera.

• E doktrina- i práktikanan di Babilonia di antigwedat a hiba e nashon na inmoralidat hopi baho. Awendia, ora ku lidernan religioso a pusha Beibel su norma di moralidat un banda, inmoralidat ta reina tantu den e gremio di klero komo di laiko. Ta bon pa tuma nota ku debí na e echo ku Babilonia e Grandi ta prostituí su mes ku e mundu i su sistemanan polítiko, Revelashon ta pint’é manera un muhé di mala bida.

• Tambe Beibel ta bisa ku Babilonia e Grandi ta biba “den luho.” Den Babilonia di antigwedat, e organisashon di e tèmpel a optené kantidat grandi di tereno, i e saserdotenan a bira prominente den aktividatnan komersial. Awe, fuera di lugánan di adorashon, Babilonia e Grandi ta doño di masha hopi negoshi i propiedat. Su siñansanan i su dianan di fiesta ta trese hopi rikesa p’e i pa otronan den e mundu komersial.

• Uso di imágen, magia i bruheria tabata komun den Babilonia di antigwedat, meskos ku ta e kaso awe den hopi lugá. Nan a konsiderá morto komo un pasashi pa un otro bida. Babilonia tabata yen di tèmpel i kapia na onor di su diosnan, pero e habitantenan tabata oponé adoradónan di Yehova. E mesun kreensianan i práktikanan ta identifiká Babilonia e Grandi.

Den tempu di antigwedat, Yehova a maniobrá nashonnan polítiko i militar poderoso pa kastigá esnan ku persistentemente a despresiá Yehova i su boluntat. Ta p’esei e asirionan a destruí Samaria na aña 740 promé ku nos era. Babilonia a destrosá Yerusalèm na aña 607 promé ku nos era i despues e romanonan a bolbe destruyé na aña 70 di nos era. E medo- i personan na nan turno, a konkistá Babilonia na aña 539 promé ku nos era. Pa nos tempu, Beibel ta predisí ku gobièrnunan polítiko, meskos ku un bestia salbahe, lo ataká “e prostituta” i kit’é sunú, sakando na kla ken e ta realmente. Nan lo destruyé kompletamente.—Revelashon 17:16.

E gobièrnunan mundial di bèrdat lo hasi un kos asina? Beibel ta deklará ku ‘Dios lo pone esei den nan kurason.’ (Revelashon 17:17) Esei lo ta un kos repentino, sorprendente, spantoso, no un kos gradual òf ku hende lo mira ta bini.

Ki akshon abo tin ku tuma? Puntra bo mes: ‘Ainda mi ta pega na un organisashon religioso ku ta manchá ku doktrina- i práktikanan ku ta identifik’é komo parti di Babilonia e Grandi?’ Asta si bo no ta un miembro, lo bo por puntra bo mes: ‘Mi a permití e aktitut di Babilonia e Grandi influensiá mi?’ Ki klase di aktitut? Un aktitut di tolerá inmoralidat, di amor pa kosnan material i plaser mas ku amor pa Dios, òf di ignorá e Palabra di Yehova deliberadamente (asta den kosnan ku ta parse chikí). Pensa bon promé ku bo kontestá.

Pa nos tin e aprobashon di Yehova, ta masha importante pa tantu den nos akshonnan komo den e deseonan di nos kurason, nos duna prueba ku realmente nos no ta parti di Babilonia e Grandi. No tin tempu pa pèrdè. Beibel ta spièrta nos ku e fin lo bin diripiente, i ta bisa: “Babilonia, e gran stat, lo wòrdu tirá abou ku violensia [òf, “ku un lansamentu rápido,” NW], i lo no wòrdu hañá nunka mas.”—Revelashon 18:21.

Pero mas kos lo sosodé. Den un otro rasgo di e ‘ora di huisio’ ei, Yehova Dios lo pidi kuenta i rason di e sistema polítiko mundial, su gobernantenan, i tur ku ta ignorá su gobernashon legítimo mediante su Reino selestial den man di Hesukristu. (Revelashon 13:1, 2; 19:19-21) E vishon profétiko ku ta pará skirbí na Daniel 2:20-45 ta presentá gobernashon polítiko for di tempu di Babilonia di antigwedat te ku awor, komo un imágen gigantesko ku ta konsistí di oro, plata, bròns, heru i klei. Relashoná ku nos tempu, e profesia a bisa: “E Dios di shelu lo lanta un reino ku nunka lo no wòrdu destruí.” I enkuanto loke e Reino ei lo hasi ainda durante Yehova su ‘ora di huisio,’ Beibel ta deklará: “E lo garna i pone un fin na tur e reinonan aki [trahá dor di hende], ma e mes lo dura pa semper.”—Daniel 2:44.

Beibel ta spièrta adoradónan berdadero pa no stima “e kosnan ku tin den mundu,” esta, e estilo di bida ku e mundu aki alehá for di e Dios berdadero ta promové. (1 Juan 2:15-17) Bo desishonnan i akshonnan ta demostrá ku bo ta kompletamente na fabor di e Reino di Dios? Di bèrdat bo ta pon’é na promé lugá den bo bida?—Mateo 6:33; Juan 17:16, 17.

[Kuadro na página 14]

Ki Dia e Fin Ta Bin?

“E Yu di hende lo bin na un ora ku boso no ta pensa.”—Mateo 24:44.

“Sea alerta . . . pasobra boso no sa e dia ni e ora ku e Yu di hende ta bin.”—Mateo 25:13.

“E lo no tarda.”—Habakuk 2:3.

[Kuadro na página 14]

Lo A Hasi un Diferensia si Bo Tabata Sa?

Si bo tabata sa sigur ku lo dura un par di aña mas promé ku e binidero ehekushon di huisio divino bin, esei lo a kambia e manera ku bo ta hiba bo bida? Si e fin di e sistema bieu aki ya a tarda mas di loke bo a spera, bo a laga esei influensiá bo pa ta ménos aktivo den Yehova su sirbishi?—Hebreonan 10:36-38.

E echo ku nos no sa e tempu eksakto ta duna nos oportunidat di demostrá ku nos ta sirbi Dios ku motibunan puru. Hende ku konosé Yehova ta realisá ku manifestashon di selo na último ora—djis promé ku e fin—lo no impreshoná Dios, kende ta wak loke tin den nos kurason.—Jeremias 17:10; Hebreonan 4:13.

Pa hende ku realmente ta stima Yehova, semper Yehova ta bin na promé lugá. Meskos ku otro hende, kristiannan berdadero kisas tin un trabou. Sin embargo, nan meta no ta pa bira riku sino pa nan tin sufisiente kuminda i paña i un tiki èkstra pa kompartí ku otro hende. (Efesionan 4:28; 1 Timoteo 6:7-12) Tambe nan ta disfrutá di rekreo sano i de bes en kuando un kambio den nan rutina, pero nan deseo ta pa esei refreská nan, i no djis pa hasi loke tur hende ta hasi. (Marko 6:31; Romanonan 12:2) Meskos ku Hesukristu, nan tin deleite den hasi e boluntat di Dios.—Salmo 37:4; 40:8.

Kristiannan berdadero ke biba i sirbi Yehova pa semper. E speransa ei no ta bira ménos presioso pasobra nan tin ku warda un tiki mas largu di loke algun di nan a ferwagt pa haña sierto bendishonnan.

[Kuadro/Plachi na página 15]

E Kuestion di Soberania

Pa komprondé dikon Dios ta permití asina tantu sufrimentu, nos tin ku komprondé e kuestion di soberania. Kiko ta soberania? Esei ta e posishon di outoridat supremo.

Komo ku Yehova ta e Kreadó, e tin e derecho di goberná tera i tur kos ku ta biba riba dje. Sin embargo, Beibel ta splika ku na prinsipio di historia humano, Satanas e Diabel a kuestioná Yehova su soberania. Satanas a pretendé ku Yehova a pone demasiado restrikshon, ku El a gaña nos promé mayornan tokante kiko lo pasa si nan ignorá Dios su lei i hasi kos na nan manera, i ku en realidat lo tabata mihó si nan a goberná nan mes sin Dios.—Génesis, kapítulo 2, 3.

Si Dios a destruí e rebeldenan mesora, esei lo a demostrá Dios su poder, pero esei lo no a resolvé e kuestionnan ku a lanta. En bes di destruí e rebeldenan al instante, Yehova a permití tur kreashon inteligente mira e resultado di rebelion. Apesar ku esaki a enserá sufrimentu, na mesun tempu el a duna nos un chèns di nase.

Ademas, Yehova a hasi un sakrifisio grandi pa amorosamente e perkurá pa hende ku obedes’é i ehersé fe den e sakrifisio di reskate di su Yu, lo por ser librá di piká i su konsekuensianan i biba den Paradeis. Si ta nesesario, esaki lo por ta mediante un resurekshon for di morto.

Dor ku Dios a permití tempu pa resolvé e kuestion, su sirbidónan a haña tambe chèns di demostrá ku nan por reakshoná faborabel riba Dios su amor i duna prueba di nan integridat na Yehova bou di tur sirkunstansia. Ta masha importante pa resolvé e kuestion di Dios su soberania—huntu ku e kuestion ligá kuné di integridat humano—pa por tin e debido rèspèt pa lei den universo. Sin e rèspèt ei, berdadero pas nunka lo ta posibel.a

[Nota]

[Plachi]

E sistema mundial di gobernashon polítiko lo yega na su fin