Den Ki Rumbo Bo Bida Ta Bayendo?

• Hopi hende ta asina apsorbá den e asuntunan di bida diario ku kasi nan no ta pensa mes den ki rumbo nan bida ta bayendo.

• Beibel ta informá nos di susesonan maravioso ku ta bai tuma lugá. Tambe e ta spièrta nos ku institushonnan humano lo bai eksperensiá un kambio drástiko rònt mundu. Pa nos benefisiá di loke Beibel ta bisa i pa evitá kalamidat, ta urgente pa nos aktua desididu.

• Tin hende ku sa kiko Beibel ta bisa i ku ta purba aplik’é, pero nan ta laga preokupashonnan di bida desviá nan.

• Abo ta kontentu ku e rumbo ku bo bida ta tumando? Ora bo ta plania pa hasi kos, bo ta konsiderá ki efekto nan lo por tin riba bo metanan di largo plaso den bida?

[Kuadro/Plachi na página 9]

Kiko Ta Mas Importante pa Bo?

Kon lo bo evaluá lo siguiente? Numerá nan a base di prioridat.

Hopi di e kosnan aki tin nan debido lugá den bida, pero ora bo tin ku skohe, kiko ta bini na promé lugá? na di dos? etcetera.

․․․ Dibertishon/rekreo

․․․ Mi trabou òf mi profeshon

․․․ Mi salú

․․․ Felisidat personal

․․․ Mi kasá

․․․ Mi mayornan

․․․ Mi yunan

․․․ Un kas bunita, bon paña

․․․ Ser esun mas mihó den tur loke mi ta hasi

․․․ Adorashon di Dios

[Kuadro na página 10, 11]

Bo Desishonnan Ta Hibando Bo Kaminda Realmente Bo Ke Bai?

PENSA RIBA E PREGUNTANAN AKI

DIBERTISHON/REKREO: Loke mi ta skohe komo rekreo ta refreská mi? E ta enserá aktividatnan eksitante ku por pone mi salú na peliger òf asta hasi mi mankaron pa restu di mi bida? E ta un forma di “dibertí” ku podisé ta duna mi un par di ora di eksitashon pero ku por kousa doló di kurason permanente? Asta si e dibertishon ku mi ta skohe ta sano, mi ta dedikando asina tantu tempu na dje ku no ta sobra tempu pa kosnan mas importante?

MI TRABOU ÒF MI PROFESHON: E ta sirbi komo un medio pa mantené mi, òf en realidat mi ta su katibu? E ta eksigí asina tantu di mi ku e ta daña mi salú? Mi ta preferá di traha overtaim òf lo mi preferá di pasa tempu ku mi kasá òf ku mi yunan? Si mi doño di trabou ta eksigí pa mi hasi kos ku ta molestiá mi konsenshi òf ku ta pone ku hopi bes mi no ta sobra tempu pa aktividatnan spiritual, lo mi hasié tòg pa mi no pèrdè mi trabou?

MI SALÚ: Mi no ta preokupá kuné, òf mi ta tene kuidou pa mi no dañ’é? Ta tokante mi salú so mi ta papia? E manera ku mi ta trata mi salú ta demostrá ku mi famia ta importante pa mi?

FELISIDAT PERSONAL: Esaki ta e promé kos ku mi ta tene kuenta kuné? Mi ta pon’é promé ku e felisidat di mi kasá òf di mi famia? E manera ku mi ta busk’é ta kuadra ku e echo ku mi ta adorá e Dios berdadero?

MI KASÁ: Mi ta konsiderá mi kasá komo mi kompañero òf kompañera íntimo solamente ora ta kumbiní mi? Mi ta trata mi kasá ku onor, komo un persona ku tin derecho di tin su dignidat? Mi kreensia den Dios ta influensiá e manera ku mi ta konsiderá mi kasá?

MI MAYORNAN: Si ainda mi ta menor di edat, mi ta obediente na mi mayornan? Por ehèmpel, mi ta kontestá nan ku rèspèt, ta hasi e tareanan ku nan ta duna mi, ta yega kas na e ora ku nan ta bisa mi, ta evitá e amistatnan i aktividatnan ku nan ta spièrtá mi p’e? Si mi ta adulto, mi ta skucha mi mayornan ku rèspèt, i ta duna nan e yudansa apropiá ora esaki ta nesesario? Ta loke ta kumbiní mi ta determiná e manera ku mi ta trata ku nan òf ta e konseho di e Palabra di Dios ta determiná esei?

MI YUNAN: Mi ta sinti mi responsabel pa siña mi yunan e debido norma- i balornan moral, òf mi ta ferwagt ku ta skol tin ku hasi esei? Mi ta pasa tempu ku mi yunan, òf mi ta ferwagt pa ko’i hunga, televishon òf kòmpiuter tene nan okupá? Mi ta disipliná mi yunan tur biaha ku nan ignorá e rekordatorionan di Dios, òf mi ta hasié prinsipalmente ora mi ta rabiá?

UN KAS BUNITA, BON PAÑA: Kiko ta determiná kuantu atenshon mi ta duna na mi aparensia i pertinensianan? Ta e impreshon ku mi ta spera di hasi riba mi bisiñanan? e bienestar di mi famia? òf e echo ku mi ta un sirbidó di Dios?

SER ESUN MAS MIHÓ DEN TUR LOKE MI TA HASI: Mi ta sinti ku ta importante pa hasi kos na un manera bon? Mi ta hasi esfuerso pa ta esun mas mihó? E ta molestiá mi ora un otro hende hasi un kos mihó ku mi?

ADORASHON DI DIOS: E aprobashon di Dios ta mas importante pa mi ku e aprobashon di mi kasá, mi yunan, mi mayornan òf mi doño di trabou? Lo mi ta dispuesto pa pusha mi sirbishi na Dios na di dos lugá, afin di mantené un estilo di bida kómodo?

KONSIDERÁ E KONSEHO DI BEIBEL KU SUMO ATENSHON

Ki lugá Dios ta okupá den bo bida?

Eklesiastés 12:13: “Teme Dios i warda su mandamentunan, pasobra esaki ta aplikabel na kada persona” [òf, “ta henter e obligashon di hende,” NW].

PUNTRA BO MES: Mi bida ta demostrá ku mi ta pensa asina? Obedensia na Dios su mandamentunan ta determiná kon mi ta atendé mi responsabilidatnan na kas, na trabou òf na skol? Òf ta otro interesnan òf e preshonnan di bida ta loke ta determiná si mi ta apartá tempu pa Dios?

Ki klase di relashon bo tin ku Dios?

Proverbionan 3:5, 6: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.”

Mateo 4:10: “Adorá SEÑOR bo Dios, i sirbi e so.”

PUNTRA BO MES: Ta asina mi ta sinti pa ku Dios? Mi aktividatnan diario, i tambe e manera ku mi ta trata situashonnan difísil, ta demostrá tal konfiansa i deboshon?

Kon importante lesamentu i studiamentu di Beibel ta pa bo?

Juan 17:3: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”

PUNTRA BO MES: E importansia ku mi ta duna na lesa e Palabra di Dios i meditá riba dje ta demostrá ku di bèrdat mi ta kere loke e teksto ei ta bisa?

Kon importante ta pa bo pa asistí na reunionnan di e kongregashon kristian?

Hebreonan 10:24, 25: “Laga nos konsiderá kon pa stimulá otro pa stima i hasi bon obra, i no laga di asistí na nos mes reunionnan, . . . i muchu mas ainda, ora boso ta mira ku e dia ta yegando serka.”

Salmo 122:1: “Mi tabata kontentu ora nan a bisa mi: ‘Laga nos bai na e kas di SEÑOR.’”

PUNTRA BO MES: E manera ku mi ta biba ta demostrá apresio pa e instrukshon aki ku tin den e Palabra di Dios? Durante e luna ku a pasa, tin reunion kristian ku mi a falta pasobra mi a pone otro kos promé ku nan?

Bo ta partisipá ku selo den e aktividat di papia ku otro hende tokante Dios i su propósito?

Mateo 24:14: “E evangelio aki di e reino lo wòrdu prediká den henter mundu komo un testimonio . . . , i e ora ei e fin lo yega.”

Mateo 28:19, 20: “Bai i hasi tur e nashonnan disipel di mi, . . . i siña nan pa kumpli ku tur loke mi a ordená boso.”

Salmo 96:2, 3: “Kanta na SEÑOR, bendishoná su nòmber; proklamá e bon nobo di su salbashon dia tras dia.”

PUNTRA BO MES: E aktividat aki di bèrdat tin e lugá ku e meresé den mi bida? Mi esfuerso pa partisipá den dje ta demostrá ku mi ta konvensí di e seriedat di e tempu den kua nos ta biba?