Kico Ta Pasa Ora Bo Muri?

Morto ta net lo contrario di bida. Morto ta manera un soño profundo. (Juan 11:11-14) E mortonan no por tende, mira, papia ni pensa nada. (Eclesiástes 9:5, 10) Religion falsu ta siña cu e mortonan ta bai na un mundu spiritual pa biba cu nan antepasadonan. Esei no ta loke Bijbel ta siña.

Esnan cu a muri no por yuda nos, ni nan no por haci nos daño. Ta comun pa hende efectuá rito i sacrificio cu nan ta kere lo agradá esnan cu a muri. Esaki ta un práctica cu ta desagradá Dios pasobra e ta basá riba un di Satanas su mentiranan. E no por agradá e mortonan tampoco, ya cu nan ta sin bida. Nos no mester teme ni adorá e mortonan. Nos mester adorá Dios so.—Mateo 4:10.

E mortonan lo biba atrobe. Jehova lo lanta e mortonan pa biba riba un tera paradísico. E tempu ei ta den futuro ainda. (Juan 5:28, 29; Echonan 24:15) Mes sigur cu abo por lanta un persona for di soño, Dios por lanta esnan cu a muri.—Marco 5:22, 23, 41, 42.

E idea cu nos no ta muri, ta un mentira cu Satanas e Diabel a plama. Satanas i su demoñonan ta pone hende pensa cu spiritu dje mortonan ta bibu i cu ta nan ta causa malesa i otro problemanan. Tin bes Satanas ta gaña hende mediante soño i vision. Jehova ta condená esnan cu ta purba papia cu e mortonan.—Deuteronomio 18:10-12.