Rechasa Religion Falsu!

Satanas i su demoñonan no kier pa bo sirbi Dios. Nan kier kita tur hende cu nan por for di Dios. Con nan ta purba di haci esaki? Un manera ta mediante religion falsu. (2 Corintionan 11:13-15) Un religion ta falsu si e no ta siña e berdad di Bijbel. Religion falsu ta manera placa falsu—e por parce auténtico, pero e no ta bal nada. E por causa bo hopi problema.

Falsedad religioso nunca por agradá Jehova, e Dios di berdad. Tempu Jesus tabata riba tera, tabatin un grupo religioso cu kier a mat’é. Nan a pensa cu nan manera di adorá tabata e método corecto. Nan a bisa: “Nos tin un solo Tata, Dios.” Jesus a bai di acuerdo cu esei? No! El a bisa nan: “Boso ta di boso tata e Diabel.” (Juan 8:41, 44) Awe hopi hende ta pensa cu nan ta adorá Dios, pero en realidad nan ta sirbi Satanas i su demoñonan!—1 Corintionan 10:20.

Mescos cu un palu putrí ta producí mal fruta, religion falsu ta producí hende cu ta haci malu. Mundu ta yen di problema pa motibu di e cosnan malu cu hende ta haci. Tin inmoralidad, pelea, hortamentu, opresion, matamentu i violacion sexual. Hopi hende cu ta haci e cosnan malu aki tin un religion, pero nan religion no ta motivá nan pa practicá loke ta bon. A ménos cu nan stop di haci malu, nan no por ta amigu di Dios.—Mateo 7:17, 18.

Religion falsu ta siña hende resa na ídolo. Dios ta bisa pa no resa na ídolo. Esaki ta razonabel. Lo bo gusta si un persona nunca ta papia cu bo pero ta papia solamente cu bo potret? E persona ei por ta bo berdadero amigu? No, claro cu no. Jehova kier pa hende papia cuné, no cu un imágen of potret sin bida.—Exodo 20:4, 5.

Religion falsu ta siña cu mata otro den tempu di guera no ta nada malu. Jesus a bisa cu e amigunan di Dios lo stima otro. Nos no ta mata hende cu nos ta stima. (Juan 13:35) Ta asta robes pa mata mal hende. Ora e enemigunan di Jesus a bini pa arest’é, e no a laga su disipelnan bringa pa proteh’é.—Mateo 26:51, 52.

Religion falsu ta siña cu hende malbado lo sufri den un fiernu di candela. Sin embargo, Bijbel ta siña cu picá ta hiba na morto. (Romanonan 6:23) Jehova ta un Dios di amor. Un Dios amoroso lo tormentá hende pa semper? Claro cu no! Den Paradijs, lo tin un solo religion, esun cu Jehova ta aprobá. (Revelacion 15:4) Ningun religion basá riba Satanas su mentiranan lo existí mas.