Capítulo 35

Ta importa loke mi ta leza?

REY Salomón a duna e advertencia: “No tin fin di trahamento di hopi buki, i hopi tempo dedicá na nan ta cansancio di carni.” (Eclesiastés 12:12) Salomón no tabata purba di kita hende di leza buki; e solamente tabata dunábo conseho di ser selectivo.

René Descartes, filósofo francés di siglo diesiete, a bisa: “Ora bo ta leza bon buki, ta mescos cu tene conbersacion cu hende di bon crianza cu a biba den pasado. Nos asta por yama esei conbersacion selectiva den locual e autor ta expresa solamente su pensamento di mas noble.” Pero, no ta bale la pena pa “tene conbersacion” cu tur autor, ni tur nan pensamento no ta “noble.”

Atrobé e principio bíblico citá hopi bez ta drenta den e wega: “Mal asociacion ta daña costumber útil.” (1 Corintio 15:33) Sí, hende cu ken bo ta asocia por moldeá bo personalidad. Bo a yega di pasa tanto tempo cu un amigo cu bo a haya cu bo tabata cuminza actua, papia, i asta pensa manera bo amigo? Wel, lezamento di buki ta mescos cu pasa hopi ora den conbersacion cu e hende cu a skirbié.

Pues, e principio di Jesús skirbí den Mateo 24:15 ta pertinente: “Laga lector usa perspicacia.” Siña analiza i pisa loke bo ta leza. Tur hende ta sufri di un cierto cantidad di prehuicio i no ta semper onrado totalmente den nan pintamento di echonan. P’sei, no acepta incondicionalmente tur loke bo ta leza of ta tende: “Hende sin experencia ta pone fe den tur palabra, pero hende sabí ta considera su pasonan.”​—Proverbio 14:15.

Bo mester keda specialmente cauteloso den lezamento di cualkier cos cu ta siña un filosofía di bida. Por ehempel, revista pa tiener ta yen di conseho tocante tur cos, desde e promé amistad te na relacion sexual sin casa​—sin embargo, esei no ta semper conseho pa hende cristian usa. I kico di buki cu ta profundiza pregunta filosófico pisá?

E Bijbel ta adverti: “Tene cuidao: kizás por tin hende cu por hibábo como su víctima usando filosofía i engaño bano segun e tradicion di hende . . . i no segun Cristo.” (Colosense 2:8) E Bijbel, i buki basá riba e Bijbel, tal como esaki, ta ofrece conseho hopi mas mihor.​—2 Timoteo 3:16.

Novela romántico ta lectura inocente?

Lezamento di novela romántico a bira un bicio pa mas cu 20 miyón hende na América so. Naturalmente Dios a pone den hende homber i muher un deseo pa enamora i casa. (Génesis 1:​27, 28; 2:​23, 24) Pues, no ta un sorpresa cu romance ta un rasgo prominente den casi tur fantasía, i esei no ta necesariamente ofensivo. Algun novela romántico asta a alcanza e nivel di excelente literatura. Pero siendo cu novela di mas edad ta ser considerá awendia como ouderwets, skirbidor ta haya cu ta probechoso pa saca un cantidad di novela romántico di otro caliber. Ainda algun ta usa sitio histórico of lugar bieu pa aumenta e drama i ambiente dje cuenta. Otronan ta usa moda i sitio moderno. No obstante, cu algun variacion chikito, tal novela romántico moderno ta sigi casi e mesun rutina bien conocí: heroé i heroína ta vence obstáculo formidable cu ta menaza nan romance recién nací.

Heroé típico ta un homber fuerte, asta arrogante, yen di confianza propio. Pero, probablemente e heroína ta delicado i vulnerable, i hopi bez tin 10 of 15 aña menos cu e heroé. I aunque e heroé hopi bez ta traté cu menosprecio, e heroína ta haya cu e ta irresistible.

Hopi bez tin un enamorá rival. Aunque e ta bondadoso i ta mustra consideracion, e no ta interesá ni no ta excitá e heroína. Pues e heroína ta usa su encanto mañoso pa forma e heroé den un persona suave cu awor ta declara su amor fast den dje. Ya cu tur duda di antes ta pordoná i lubidá, nan tin un casamento dichoso i ta biba den felicidad pa semper hamás . . .

Berdadero amor ta manera novela?

Lezamento di fantasía asina por nebliná bo bista dje realidad? Bonnie, cu a cuminza leza novela romántico na edad di 16 aña, ta corda: “Mi a busca un jonkuman cu tabata halto, cu cabei pretu i un nechi tipo; uno cu tabata excitante, cu un personalidad dominante.” El a admiti: “Si mi a sali cu un jonkuman i e no tabata kier tenémi i dunámi zunchi, e tabata fastioso, aunque el a mustra bondad i consideracion. Mi tabata kier e excitacion di locual mi a leza den novela.”

Despues cu Bonnie a casa, el a sigi leza novela i a bisa: “Mi tabatin un bon cas i famía, pero di algun manera esei no tabata basta . . . Mi tabata kier e aventura, excitacion i emocion mencioná cu tanto tentacion den novela. Mi a kere cu nos matrimonio a falta algo.” Pero, e Bijbel a yuda Bonnie aprecia cu esposo mester ofrece esposa mas cu encanto of “excitacion.” E ta bisa: “Esposo tin cu stima nan esposa mescos cu nan mes curpa. Ken cu ta stima nan esposa ta stima nan mes, pasobra ningun homber ta odia su mes carni; sino ta alimenté i ta cuidé.”​—Efesio 5:​28, 29.

I kico di tema tanto común den novela romántico, e culminacion fantástico, i solucion fácil pa problema? Wel, nan ta leu di ser realista. Bonnie ta corda: “Ora mi tabatin pleitu cu mi casá, en bez di papia cuné i resolve e problema, mi a usa triki di heroína di novela. Ora mi esposo no a responde manera e heroé a haci, mi a rabia.” Conseho bíblico pa esposa no ta hopi mas realista i práctica ora e ta bisa, “Esposa, keda sumiso na boso esposo”?​—Colosense 3:18.

Tema sexual

Interesantemente, romance tratando cu sexo en detaye​—disponibel den biblioteca público den algun stad​—ta esnan cu tiener ta leza mas tanto. Nan por hacíbo daño? Segun Karen di 18 aña di edad: “Tal buki realmente a impulsa sintimento sexual fuerte i curiosidad den mi. E sintimento di extasía i estimulacion dje heroína den encuentro apasioná cu e heroé a hacími deseá tal sintimento també.” El a sigi bisa: “Pues, ora mi a sali cu mi enamorá, mi a purba di recrea tal sintimento. Esei a hibámi pa comete fornicacion.” Pero, su experencia tabata mescos cu esei di heroína di novela cu el a leza i di locual el a soña? Karen a descubri: “Tal sintimento ta inventá den mente di autor. Nan no ta berdadero.”

E creacion di fantasía sexual realmente ta intencion di algun autor. Considera instruccion cu un publicador ta duna autor di novela romántico: “Encuentro sexual mester concentra riba pasion i sintimento erótico cu zunchi i caricia dje heroé ta instiga.” Autor ta ser consehá també pa novela “instiga excitacion, tension i reaccion emocional i sensual den lector.” Claramente, lezamento di novela asina no por yuda hende sigi e conseho bíblico di “mata, pues, miembro di boso curpa cu ta riba tera en cuanto fornicacion, impureza, apetit sexual, deseo dañoso.”​—Colosense 3:5.

Sea selectivo

Ta mihor, anto, pa evita novela cu ta estimula sintimento inmoral of cu ta crea anticipacion irrealista. Pakico no varia i purba lezamento di otro clase di buki, tal como buki di historia of di ciencia? No cu cuenta inventá ta prohibí, pasobra hende por inventa algun cuenta cu no solamente ta diverti sino també ta educa. Pero si un novela ta enfatiza sexo, violencia irrazonabel, práctica di oculto, of “heroé” cu ta muherero, cruel, of golós, pakico perde bo tempo den lezamento di dje?

Pues, eherce cuidao. Promé cu bo ta leza un buki, examina su capa i su chaqueta; mira si tin algo ofensivo den e buki. I si apesar di precaucion e buki ta insaludabel, tene e fortaleza di dominio propio pa ceré.

Den contraste cu esei, lezamento di Bijbel i buki relacioná cu e Bijbel por yudábo, no perhudicábo. Por ehempel, un mucha muher haponés a bisa cu lezamento di Bijbel a yudé kita su mente for di sexo​—hopi bez un problema pa hovenan. “Mi semper ta warda e Bijbel cerca mi cama i tin e costumber di lezé promé cu mi ta bai drumi,” segun ele. “Ta ora cu mi ta so i no tin nada pa haci (tal como na ora di drumi) cu tin bez mi mente ta pensa riba sexo. Pues, lezamento di Bijbel realmente ta yudámi!” Sí, “conbersando” cu hende di fe mencioná den e Bijbel por dunábo berdadero fortaleza moral i aumenta bo felicidad mashá.​—Romano 15:4.

Pregunta pa consideracion Capítulo 35

◻ Pakico bo mester ta selectivo den loke bo ta leza?

◻ Pakico novela romántico ta tanto atractivo pa hopi hoven? Pero, di ki manera nan ta peligroso?

◻ Con bo por scoge informacion apropiado pa leza?

◻ Menciona algun beneficio di lezamento di Bijbel i buki basá riba e Bijbel.

[Komentario na página 287]

“Mi tabatin un bon cas i famía, pero di algun manera esei no tabata basta . . . Mi a deseá aventura, excitacion i emocion mencioná cu tanto tentacion den novela. Mi a sinti un falta den mi matrimonio”

[Plachi na página 283]

Ya cu tin tanto miles di buki disponibel, bo tin cu ser selectivo

[Plachi na página 285]

Novela romántico por ta lectura interesante, pero nan ta siña un punto di bista saludable tocante enamoracion i matrimonio?