Ora Tin Speransa I Amor Atrobe

MAYORNAN, maestronan i otronan cu ta atendé cu adolesente ta realisá cu ni nan ni hóbennan ni ningun otro hende por cambia mundu. Tin forsanan activo cu ta manera olanan di marea cu ningun hende por para. Pero tog tin hopi cos cu nos tur por haci pa yuda haci hóbennan mas felis, mas sano i mihó adaptá na sociedad.

Ya cu ta mihó prevení cu cura, mayornan mester pensa seriamente con nan estilo di bida i prioridadnan por forma e actitud i conducta di nan yunan. Un ambiente amoroso na cas ta duna e siguridad cu por prevení mihó un conducta autodestructivo. Un dje cosnan cu hóbennan tin mas mester di dje ta un hende cu kier scucha nan. Si mayornan no ta scucha, kisas hende ménos deseá sí.

Kico esaki ta nificá pa mayornan awe? Traha tempu pa bo yunan ora nan tin mester di dje, esta, ora nan ta hóben. Pa hopi famia esaki no ta fácil. Nan ta lucha pa tene cabes riba awa, i tur dos mayor mester traha ya cu no tin otro alternativa. Esnan cu tabata dispuesto i capas pa haci sacrificio pa asina tin mas tempu pa nan yunan, hopi bes a cosechá e recompensa di mira nan yunan logra mas den bida. Sin embargo, manera a ser remarcá anteriormente, tin biaha asta apesar dje mihó esfuersonan di parti di mayornan, nan yunan por haña nan den problemanan serio.

Amigu i Otro Adultonan Por Yuda

Guera, violacion i abusu di hóbennan ta rekerí pa adultonan cu ta ègt interesá den nan, haci esfuersonan extraordinario pa limitá e daño. Hóbennan traumatisá pa experencianan negativo asina kisas no ta reaccioná bon ni na e esfuersonan pa yuda nan. Tal bes esaki lo por nificá un gran inversion di bo tempu i esfuerso. Sigur no ta masha sabí ni amoroso pa menospreciá nan ni rechasá nan. Nos por haci un tiki mas esfuerso pa mustra mas dje bondad i amor cu esnan cu ta core rísico tin mester?

No ta mayornan so, sino tambe amigu i asta rumannan mester ta masha atento pa ripará tendencianan den e hóbennan cu lo por indicá un estado emocional frágil i kisas desbalansá. (Mira e cuadro “Yudansa Profesional Ta Necesario,” página 8.) Si tin algun indicacion, soru pa bo scucha. Si ta posibel, purba saca afó for di hóbennan afligí kico nan ta pensa dor di haci preguntanan bondadoso, i asina sigurá nan di bo amistad genuino. Amigu i conocínan di confiansa lo por yuda mayornan trata cu situacionnan difícil; pero, claro, nan mester soru pa nan no tuma e papel dje mayornan over. Hopi bes e tendencia di hóbennan pa cometé suicidio ta un gritu desesperá pa haña atencion, atencion dje mayornan.

Un dje mihó regalonan cu un hende por duna hóbennan ta un speransa sólido di un futuro felis, un incentivo pa biba. Hopi hóben a bin reconocé cu Bijbel ta papia e berdad ora e ta primintí un mihó sistema mundial cu lo bini pronto.

Rescatá di un Posibel Suicidio

For di Hapon, un mucha muher cu a pensa hopi biaha di cometé suicidio a bisa lo siguiente: “Cuantu biaha mi a deseá di tuma e paso ei. Tempu mi tabata chikitu, un hende di confiansa a abusá sexualmente di mi. . . . Mi a yega di skirbi asina tantu nota cu ta bisa ‘mi kier muri’ cu mi a perde conteo di nan. Mi a bira un Testigo di Jehova, i awor mi ta sirbi como un evangelisadó di tempu completo, pero ainda de bes en cuando e gana ei ta lanta. . . . Pero Jehova a permití mi keda na bida, i ta parce como si fuera e ta bisando mi suavemente: ‘Sigui biba.’ ”

Un mucha muher di 15 aña for di Rusia a splica: “Tempu mi tabatin ocho aña, mi a cuminsá haña e sintimentu cu niun hende mester di mi. Mi mayornan no tabatin tempu pa papia cu mi, anto mi a purba solucioná mi problemanan mi mes. Mi a cera den mi mes. Henter ora mi tabata haci guera cu parientenan. Anto, e pensamentu di cometé suicidio a bini na mi mente. Esta contentu mi tabata cu mi a topa Testigonan di Jehova!”

I for di Australia nos a ricibí e comentarionan alentador aki di Cathy, cu awor tin trint’i picu aña. Su palabranan ta mustra cu di berdad desesperacion por bira speransa: “Mi tabata pensa constantemente riba diferente método pa pone un fin na mi bida i finalmente mi a intentá suicidio. Mi kier a scapa dje mundu aki, cu ta yen di dolor, rabia i banidad. Mi a sintí mi atrapá den un ‘neshi di araña,’ anto depresion a hacié difícil pa mi sali djei. P’esei e tempu ei suicidio a parce di ta un solucion.

E promé biaha cu mi a tende dje posibilidad cu e tera lo bira un paradijs, cu un bida di pas i felicidad pa tur hende, mi a ègt anhelá p’e. Pero el a parce djis un soño imposibel. Sin embargo, poco-poco mi a cuminsá comprendé Jehova su punto di bista tocante bida i mi a mira con precioso cada un di nos ta den su bista. Mi a cuminsá sintí mi sigur cu tin un speransa pa futuro. Por fin mi a haña un manera pa sali for dje ‘neshi di araña’ ei. Pero tabata hopi difícil pa logra sali for di dje. Tin biaha mi ta manera cai den un depresion, i e ora ei mi ta sintí mi teriblemente confundí. Pero, mi a laga mi bida drei rond di Jehova Dios, loke a permití mi hala masha cerca di dje, i esei a hací mi sintí mi protehá. Mi ta gradicí Jehova pa tur loke el a haci pa mi.”

No Mas Morto Hubenil

Dor di studia Bijbel, un hóben por bin comprendé cu tin algu mihó pa anticipá. Esei ta loke e apostel cristian Pablo ta yama “e berdadero bida.” El a consehá e yoncuman Timoteo: “Duna ordu na esnan cu ta ricu . . . pa pone nan speransa, no den rikesa insigur, sino den Dios, cu ta percurá pa nos tur cos ricamente pa nos por disfrutá di nan; pa obra loke ta bon, pa ta ricu den obranan excelente, . . . atesorando pa nan mes cu siguridad un fundeshi excelente pa futuro, pa nan por haña un gara firme riba e berdadero bida.”—1 Timoteo 6:17-19.

Eigenlijk, Pablo su conseho ta pa nos trata otro hende i yuda nan haña un speransa sólido pa futuro. “E berdadero bida” ta loke Jehova a primintí den su mundu nobo di “shelu nobo i un tera nobo.”—2 Pedro 3:13.

Hopi hóben cu un tempu tabata core rísico di cometé suicidio, a bin comprendé cu uso di droga i un estilo di bida inmoral no ta nada otro cu un caminda largu manera spiral cu ta caba na morto, i cu suicidio ta djis pa corta caminda pa yega einan. Nan a bin realisá cu e mundu aki, cu su gueranan, odio, abusu i falta di amor, lo pasa bai un djis. Nan a siña cu e sistema di mundu aki no por ser salbá. Nan ta kere masha fuertemente cu e Reino di Dios ta e único berdadero speransa, pasobra lo e introducí un mundu nobo unda no solamente hóbennan, sino tambe henter humanidad obediente lo no tin cu muri nunca, no, ni lo no kier muri nunca.—Revelacion 21:1-4.

[Kuadro na página 8]

Yudansa Profesional Ta Necesario

The American Medical Association Encyclopedia of Medicine ta bisa cu “mas cu 90 porciento di casonan di suicidio ta sosodé como resultado di un enfermedad sikiátrico.” E ta mencioná enfermedadnan manera depresion severo (rond di 15 porciento), eskisofrenia (rond di 10 porciento), dependencia riba alcohol (rond di 7 porciento), trastorno di personalidad antisocial (rond di 5 porciento) i algun forma di neurósis (ménos cu 5 porciento). E ta consehá: “Mester tuma tur ­intento di suicidio na serio. Binti pa trinta porciento di hende cu ta intentá suicidio ta ripití nan intento denter di un aña.” Dr. Jan Fawcett ta skirbi: “Mas cu 50 porciento dje suicidionan [na Merca] ta ser cometí dor di personanan cu no tabatin contacto cu un profesional di salú mental.” I un otro fuente ta bisa: “E aspecto mas ­importante di tratamentu ta pa e persona bai un sikiatra mas pronto posibel pa yuda resolvé e depresion tras dje intento.”