Suicidio—un Plaga Entre Hobennan

COMO si fuera guera, asesinato i atrocidad no ta suficiente pa caba cu nos hóbennan, tin un autodestruccion den forma di suicidio hubenil. Droga i alcohol ta destrosá mente i curpa di hóbennan, causando hopi morto hubenil. Loke nos ta mira mas i mas ta cu e víctima a muri di un overdósis di droga, sea deliberadamente of sin cu esei tabata e intencion.

Morbidity and Mortality Weekly Report di 28 di april 1995, a bisa cu “na Merca suicidio ta e di tres causa principal di morto entre adolesentenan entre 15 pa 19 aña.” Dr. J. J. Mann ta skirbi den The Decade of the Brain (E Década Intelectual): “Tur aña, mas cu 30.000 mericano [na 1995 e cifra tabata 31.284] ta cometé suicidio. Ta tristu pa bisa, pero por lo general ta hóbennan ta víctima . . . Dies biaha mas tantu hende cu e 30.000 ei ta intentá suicidio, pero ta keda na bida. . . . Sikiatranan ta pasa hopi trabou pa identificá e pashentnan cu tin chens di cometé suicidio, ya cu no ta fácil pa nan haci un distincion entre pashentnan cu depresion severo cu lo trata na cometé suicidio i esnan cu lo no hacié.”

Simon Sobo, hefe di sikiatria na e Hospital New Milford, Connecticut, Merca, a comentá: “Tabatin mas intento di suicidio den e primavera aki [1995] cu ami a mira den e 13 añanan cu mi ta aki.” Na Merca, miles di tiener ta purba cometé suicidio tur aña. Cada intento ta un yamada pa yudansa i atencion. Ken lo t’ei pa duna un man promé cu ta muchu lat?

Un Problema Mundial

Na hopi otro parti di mundu e situacion no ta masha diferente. Na India, segun India Today, un 30.000 hóben a cometé suicidio durante 1990. Na Cánada, Finlandia, Francia, Hulanda, Israel, Nueva Zelandia, Spaña, Suisa i Tailandia, e tasa di suicidio hubenil a aumentá. Un raport di 1996 dje Fondo di Nacionnan Uní pa Mucha (UNICEF) ta declará cu e tasa di suicidio hubenil ta mas haltu na Finlandia, Latvia, Lituania, Nueva Zelandia, Rusia i Slovenia.

Australia tambe tin un dje tasanan di suicidio hubenil mas haltu na mundu. Den e pais aki, na 1995, 25 porciento di tur morto den e mucha hombernan i 17 porciento den e mucha muhernan tabata suicidio, segun un informe den e korant The Canberra Times. E proporcion di suicidionan “exitoso” entre mucha hombernan australiano ta un cincu biaha mas haltu cu entre mucha muher. Nos ta haña un proporcion similar den mayoria pais.

Esei kier men cu mucha homber tin mas chens di cometé suicidio cu mucha muher? No necesariamente. Datonan disponibel ta mustra cu no tin masha diferencia entre e dos sexonan pa loke ta intento di suicidio. Sin embargo, “segun e último cifranan di OMS [Organisacion Mundial di Salú], tin rond di cuater biaha mas tantu mucha homber cu mucha muher cu ta cometé suicidio den paisnan industrialisá.”—The Progress of Nations, publicá dor di UNICEF.

Pero kisas ni e estadísticanan horendo aki no ta bisa tur cos. Estadísticanan riba suicidio hubenil, expresá den términonan sikiátrico i analítico, ta masha fácil pa lesa. Sin embargo, loke hopi bes hende no ta comprendé ni no ta mira tras di cada cifra impersonal ta e famianan destrosá i e dolor di curason, e pena, dolor i desesperacion di esnan cu a keda atras i cu ta busca pa haña sa e motibunan.

Pues, hende por prevení tragedianan manera suicidio hubenil? A descubrí algun factor clave, i esakinan por yuda evitá e situacion lamentabel aki.

[Kuadro na página 5]

Pakico Hende Ta Cometé Suicidio

Tin hopi teoria en cuanto e motibunan pakico hende ta cometé suicidio. “Suicidio ta e reaccion di un hende riba un problema cu e ta considerá como abrumador, manera isolacion social, morto di un ser kerí (specialmente di un casá), un famia kibrá durante infancia, enfermedad físico grave, behes, desempleo, problemanan financiero i uso di droga.”—The American Medical Association Encyclopedia of Medicine.

Segun e sociólogo Emile Durkheim, tin cuater tipo básico di suicidio:

1. Suicidio egoista—Parce cu esaki “ta bin dor cu e individuo no ta integrá den sociedad. Víctimanan di suicidio egoista ta hendenan cu hopi bes ta lagá pa nan cuenta; nan no tin relacion cu nan comunidad ni nan no ta dependé riba dje.” Por lo general nan sa ta hende solitario.

2. Suicidio altruista—“E individuo ta demasiado integrá den un grupo, di manera cu e ta sinti cu no tin ningun sacrificio muchu grandi.” Ehempelnan mencioná ta e pilotonan kamikaze hapones den Guera Mundial II i extremistanan religioso cu ta bula nan mes, matando nan supuesto enemigunan tambe. Otro ehempelnan ta esnan cu a muri dor di kima nan mes pa hala atencion pa un causa.

3. Suicidio anómico—“E víctima di suicidio anómico no por manehá un crísis na un manera racional i ta scoge pa cometé suicidio como solucion di un problema. [Esaki] ta sosodé ora e relacion acustumbrá entre e individuo i e sociedad cambia di ripiente i dramáticamente.”

4. Suicidio fatalístico—Parce cu esaki “ta ser causá dor di un regulacion social excesivo cu ta restringí e libertad di un individuo demasiado.” E víctimanan aki “ta sinti cu nan no tin futuro mas.”—Adolescent Suicide: Assessment and Intervention (Suicidio Hubenil: Evaluacion i Intervencion), di Alan L. Berman i David A. Jobes.

[Plachi na página 5]

Algun dje prácticanan perhudicial cu por hiba na suicidio hubenil