Algun Dia Lo Tin Pas i Trankilidad?

ORA a puntra turistanan británico kico nan ta busca ora nan bai afó cu vakansi, casi 3 di cada 4 a contestá: “Pas i trankilidad.” Pero ya cu contaminacion dor di boroto ta un problema mundial, hopi hende ta kere cu berdadero pas i trankilidad ta solamente un fantasia.

Apesar cu hende ta haci intento grandi pa reducí contaminacion dor di boroto, kisas bo ta puntra bo mes si ta realístico pa kere cu algun dia lo logra éxito total. Kico di otronan cu no tin e mésun preocupacion cu bo?

Obstáculonan cu Mester Vence

No ta fácil pa papia cu hende cu ta pensa net contrali di bo, te pa convencé nan di bo punto di bista. Ora un grupo di tiener cu ta haci bochincha tabata reuní pafó dje edificio caminda Ron tabata biba, el a tuma e iniciativa pa cera amistad cu nan. El a siña nan nomber. El a asta yuda drecha un di nan baiskelnan. Desde e tempu ei, e no tabatin molester mas di nan.

Considerá e caso di Marjorie, un mama soltero di un yu muher tiener, cu ta biba den un apartamento cu ta keda net entre dos bisiña cu ta haci bochincha. Esnan di ariba no tin tapijt riba nan flur. P’esei Marjorie ta haña cu e boroto di muchanan cu ta rolschaats bai bini, ta dal bala abou i asta ta bula baha for di cama ta molesti’é. Ademas, nan mama ta cana cu hilchi haltu na cas. Marjorie a acercá su bisiña bondadosamente pa pidié pa nan haci mas ketu, pero e barera di idioma entre nan a trece frustracion. E conseho municipal local a ofrecé pa manda un intérprete pa yuda resolvé e problema, di manera cu Marjorie ta warda riba un mehoracion.

Den e apartamento bou di dje tin un homber cu ta toca música duru tur mainta entre shet’or i och’or. E bas ta bati duru constantemente. Ora el a acerk’é cu tacto, e homber a respond’é cu e tabatin mester di su música pa ‘dun’é un bon beis p’e bai su trabou.’ Con Marjorie ta trata cu e situacion?

“Mi ta trahando riba dominio propio i pacenshi,” e ta bisa. “Mi a reahustá mi programa i mi ta bai sinta lesa maske tin boroto. Mi ta ripará cu rápidamente mi ta bira absorbá den mi buki. E ora ei e boroto no ta molestiá mi asina tantu mas.”

Di otro un banda, Heather ta biba den un apartamento cu ta keda dilanti un club nocturno, cu, despues di un anochi yen di bochincha, ta cera rond di seis or di mainta. Aunke el a keha finalmente na e autoridadnan local, nan no a haci mashá pa stop e molester.

Un Fin na Boroto?

“Hopi hende ta haña silencio total sumamente fastioso i spantoso,” segun Dr. Ross Coles dje Instituto di Investigacion di Oido dje Conseho di Investigacion Médico di Gran Bretania. E cantamentu bunita di para, e bai-bin suave di olanan riba un playa di santu, e gritunan entusiasmá di muchanan—e zonidonan aki i otronan ta deleitá nos. Aunke awor nos ta anhelá pa haña un tiki alivio for di boroto, nos ta contentu pa ta huntu cu compañeronan sano cu ta combersá cu nos. Dios a primintí pas i trankilidad pa su fiel sirbidónan.

Den Bijbel e salmista ta declará: “E mansunan mes lo poseé e tera, i berdaderamente nan lo haña nan deleite exkisito den e abundancia di pas.” (Salmo 37:11) Pronto Dios su Reino celestial lo intervení den asuntunan humano. (Daniel 2:44) Anto, bou dje mando di Cristo Jesus, lo tin un “abundancia di pas te cu luna no t’ei mas.”—Salmo 72:7; Isaías 9:6, 7.

Bo por tin e confiansa cu e intervencion di Dios lo logra establecé e pas i trankilidad cu nos tur ta deseá, net manera Isaías, e profeta di Dios, a predicí: “E trabou di berdadero husticia mester bira pas; i e sirbishi di berdadero husticia, trankilidad i siguridad te na tempu indefiní. I mi pueblo tin cu biba . . . den lugánan di descanso sin disturbio.”—Isaías 32:17, 18.

Asta awor, bo por encontrá pas i trankilidad spiritual n’e reunionnan di Testigonan di Jehova den bo becindario. Aunke de bes en cuanto nan ta reuní cu dies di miles huntu pa adoracion den congresonan grandi—i e reunimentunan aki berdaderamente tin ‘e boroto di homber, muher i mucha’—e zonido no ta molestoso, sino placentero. (Mikéas 2:12) Wak pa bo mes dor di reuní cu e Testigonan localmente of dor di skirbi na un dje adresnan na página 5 dje revista aki pa tuma contacto cu nan. Disfrutá di berdadero pas i trankilidad den nan compania awor i kisas pa semper.