Nos Ta Amigunan Inseparabel

TRACY ta mi cachó di guia, un labrador retriever pretu di dies aña. Danki na dje mi por move bai aki-aya basta normal. Tambe e ta un compaño i un consuelo pa mi. P’esei, no ta un sorpresa cu mi a bin ta stim’é mashá i cu nos ta amigunan inseparabel.

Tin biaha, hende ta faya sin cu nan kier den un manera cu Tracy nunca ta faya. Por ehempel, un dia, mi a laga Tracy na cas i tabata canando cu un amiga. Nos tabata papiando dushi asina ora cu di ripiente mi a trompecá cai. Mi amiga a lubidá cu mi ta ciegu, i e no a avisá mi dje rand di acera. Esaki lo no a sosodé cu Tracy na mi lado.

Un biaha, Tracy eigenlijk a salba mi bida. Mi tabata canando riba un caminda ora cu di ripiente un truck a cuminsá zwai for di control bin den mi direccion. Mi a tende su motor pero, naturalmente, no por a mira na unda e tabata bai. Tracy a mira i a comprendé e peliger i a core halá mi na un lugá sigur.

Ciegu, Pero tog Mi Ta Mira

Mi a nace na 1944 den sur di Suecia, i tabata ciegu desde nacementu. Mi a bai un internat pa mucha ciegu, caminda mi a siña lesa i skirbi Braille. Música a bira un parti importante di mi bida, specialmente tocamentu di piano. Despues di gradua for di scol secundario, mi a sigui studia idioma i música n’e Universidad di Göteborg.

Sin embargo, mi bida a cambia pa semper ora dos Testigo di Jehova a bati na mi porta na e campus di universidad. Pronto mi a cuminsá asistí n’e reunionnan di Testigonan i asta a cuminsá compartí cu otronan loke mi tabata siña. Na 1977, mi a simbolisá mi dedicacion na Jehova Dios mediante bautismo bou di awa. Aunke mi no por mira cu mi wowonan físico, mi a ricibí algu di muchu mas balor mediante un studio dje Palabra di Dios—bista spiritual.

Awe mi ta considerá mi mes di ta mihó pará cu esnan cu por mira cu nan wowonan físico, pero cu ta spiritualmente ciegu. (Compará cu Juan 9:39-41.) Mi ta contentu di tin un vision mental claro dje mundu nobo di Dios, caminda, segun su promesa, e wowo di esnan ciegu lo mira—sí, caminda tur enfermedad físico lo ser curá i caminda asta e mortonan lo ser resucitá!—Salmo 146:8; Isaías 35:5, 6; Echonan 24:15.

Aunke mi ta soltera i no por mira cu mi wowonan físico, cu Tracy como mi compañera leal, mi ta bai hopi bon. Lagá mi describí con e ta yudá mi cumpli cu mi trabou seglar i hiba a cabo mi ministerio como un Testigo di Jehova. (Mateo 24:14; Echonan 20:20; Hebreonan 10:25) Pero promé, un poco mas tocante Tracy mes.

Scogí pa Entrenamentu Special

Ora Tracy tabatin solamente ocho luna bieu, a test e pa mira si lo e cualificá como un cachó di guia. El a resultá di ta calmu, fácil pa siña i no tabata spanta lihé pa ruidonan repentino. P’esei, nan a pon’é e ora ei cu un famia pa algun tempu pa e siña con un bida di famia normal ta. Despues di esei, ora el a madurá lo suficiente, el a ser mandá pa un scol di entrenamentu pa cachónan di guia.

N’e scol aki Tracy a siña haci loke ta ser rekerí di un cachó di guia, esta, pa yuda su futuro doño haña porta, trapi, entrada i lugánan pa cana. Tambe el a siña con pa cana riba aceranan yen di hende i con pa crusa caya. Tambe a siñ’é pa stop n’e rand di acera, pa obedecé señalnan di tráfico i pa kita di obstáculonan peligroso. Despues di mas of ménos cincu luna di entrenamentu, e tabata cla pa traha. Esei ta ora nan a introducí Tracy cerca mi.

Loke Tracy Ta Haci pa Mi

Tur mainta Tracy ta lantá mi for di cama pa mi dun’é cuminda. Despues nos ta prepará pa bai trabou. Mi oficina ta un 20 minuut leu na pia for di nos apartamento. Mi conocé e caminda, naturalmente, pero Tracy su tarea ta pa yudá mi yega ei sin dal den vehículonan, hende, pal’i lus, of loke sea. Ora nos yega, e ta bai drumi bou di mi lesenar. Anto, durante mi pausa di merdia, generalmente nos ta bai dal un keiru na pia.

Anochi, despues cu nos yega for di trabou, e mihó parti di nos dia ta cuminsá. Esaki ta ora Tracy ta guiá mi den e trabou di predicá di cas-pa-cas i na e casnan caminda mi ta conducí studionan di Bijbel. Hopi hende ta amigabel cuné, anto nan ta carici’é i bras’é i tin biaha ta duná mi un dushi pasaboca p’e. Tambe nos ta asistí na reunionnan cristian tur siman. Despues di reunion, e muchanan ta gusta bai cumindá i brasa Tracy, locual e ta gusta mashá.

Mi ta conciente cu Tracy ta djis un cachó i cu lo e muri un dia. Esei ta nificá cu den futuro lo mi mester haña un otro cachó di guia. Pero, miéntras tantu, nos ta un tim i nos tin mester di otro. Ora Tracy no ta banda di mi, mi ta bira hopi insigur di mi mes, i e ta bira nervioso i inkieto ora e no por guiá mi.

Mester di Comprension

Ta straño, pero tin biaha hende ta purba separá nos for di otro. Nan ta mira Tracy como djis un cachó normal of un bestia di cas i no ta comprendé nos relacion profundo. E hendenan aki tin cu comprendé cu Tracy ta pa mi loke un rolstoel ta pa un paralítico. Separando nos ta mescos cu kita mi wowonan.

Mas mihó otro hende comprendé e relacion entre ami cu Tracy, ménos problema lo tin. Por ehempel, un rolstoel ta ser aceptá di biaha, pero, desafortunadamente, no semper un cachó di guia. Algun hende tin miedu di cachó of nan simplemente no ta gusta nan.

Loke ta skirbí den un folder tocante cachónan di guia, publicá dor di e Asociacion di Suecia pa Esnan Visualmente Incapacitá, ta masha útil. E ta bisa: “E cachó di guia ta un yudansa pa e persona visualmente incapacitá move. Sí, mas cu esei. E ta un yudansa bibiente. . . . E ta un amigu cu nunca lo desapuntá bo.”

En berdad, Tracy ta sirbi como mi wowonan den e scuridad, i e ta yudá mi hiba un bida mas normal posibel awor. Sin embargo, mi ta convencí cu pronto, den Dios su mundu nobo primintí, lo mi por mira tur e maraviyanan imponente dje creacion. P’esei, mi ta determiná awor pa mantené mi vision spiritual.

Pues, cu Tracy su cabes den mi scochi, nos ta cla awor pa bai scucha e grabacion dje edicion mas recien dje revista Toren di Vigilancia.—Manera Anne-Marie Evaldsson a relat’é.