E Plaga di Desempleo dje Coresponsal di Spierta! na Italia

Desempleo ta un emergencia den vários pais desaroyá—pero e ta preocupá tambe nacionnan den desaroyo. E ta afectá lugá unda na ántes el a parce di no existí. E ta afectá cientos di miyones di hende—hopi di cua ta mama i tata di famia. Pa dos tercer parti dje pueblo italiano, e ta “menasa number un.” E ta producí dificultad nobo den pueblo. Te na un grado, e ta rais di problemanan di hopi hóben cu ta involucrá nan den droga. E ta stroba miyones di hende di drumi, i pa miyones di otronan, nan por bira víctima pronto di desempleo.

E ORGANISACION di Cooperacion i Desaroyo Económico (OECD) ta declará cu “desempleo probablemente ta e fenómeno di nos tempu cu ta temorisá mas hende.” Segun informe dje Comision di Comunidad Europeo, “Nos ta conocé e extento i consecuencia dje fenómeno aki pero pa trata cuné, esei ta trabahoso.” Segun un experto, desempleo “ta un fantasma cu ta bolbe pa plaga pueblo di Europa.” Den e Comunidad Europeo, tin rond di 20 miyon hende desempleá, i na october di 1994, na Italia so tabatin un total oficial di 2.726.000. Den opinion dje comisario dje Comunidad Europeo, Padraig Flynn, “E desafio social i económico di mas importante cu ta enfrentá nos ta e solucion dje problema di desempleo.” Si bo ta sin empleo of ta den peliger di perde bo trabou, bo conocé e miedu cu esei ta causa.

Pero, desempleo no ta solamente un problema europeo. E ta afligí tur pais di América. E no ta salta Africa, Asia, of paisnan den Océano Pacífico. Nacionnan di Oost Europa ta sinti e efecto di dje den añanan recien. Ta cierto cu desempleo no ta afectá tur lugá mescos. Pero, segun algun economista, e grado di desempleo na Europa i Nort América lo permanecé hopi mas haltu pa hopi mas tempu cu den tempu di ántes.a I e “aumento di empleo insuficiente i e degradacion general dje calidad di trabou disponibel ta empeorá e situacion,” segun economista Renato Brunetta.

E Marcha Persistente di Desempleo

Desempleo ta afectá tur sector dje economia, un tras di otro: promé ta agricultura, cu e aumento di uso di mashin, cu ta eliminá trahador; despues industria, cu e “crísis di aumento di prijs di petroleo” a afectá desde 1970 padilanti; i awor e sector di servicio—comercio i educacion—un sector cu na ántes tabata considerá como firme. Binti aña pasá un grado di desempleo mas haltu cu 2 of 3 porciento por a causa un alarma grandi. Awe un nacion industrialisá ta bai bon si nan mantené desempleo ménos cu 5 of 6 porciento, i hopi nacion desaroyá tin un porciento hopi mas haltu cu esei.

Segun e Organisacion Internacional di Labor (ILO), un hende desempleá ta un persona sin trabou, ta prepará pa traha, i ta busca trabou activamente. Pero, kico di hende cu no tin empleo permanente di tempu completo of cu ta haña trabou pa poco ora pa siman so? Trabou di tempu parcial ta ser considerá di diferente manera den diferente pais. Den cierto nacion algun hende cu realmente no tin trabou ta ser contá oficialmente como empleá. Situacion cu no ta indicá claramente loke ta empleo i desempleo ta causa dificultad pa determiná ken realmente tin trabou, i p’esei cifra no ta pinta un cuadro completo. Segun un investigacion europeo, “Asta e cantidad oficial di 35 miyon hende desempleá [den pais di OECD] no ta reflehá e cantidad total di hende sin trabou.”

E Prijs Haltu di Desempleo

Pero, cifra no ta conta tur e cuenta. E Comision di Comunidad Europeo ta bisa: “Costo económico i social di desempleo ta enorme,” i nan ta resultá “no solamente di gastu directo di pagamentu di onderstand na hende desempleá sino tambe di perdementu di placa cu hende desempleá lo por a paga gobiernu na belasting si nan tabatin trabou.” I gastu di gobiernu pa paga hende desempleá ta bira un carga cada bes mas pisá no solamente p’e gobiernu sino tambe pa hende empleá, cu tin cu paga mas belasting.

Desempleo no ta solamente un asuntu di dato i cifra. Dramanan individual ta e consecuencia, pasobra e plaga ta dal hende—homber, muher, i hóbennan di tur clase social. Combiná cu tur otro problema dje “último dianan” aki, desempleo por resultá di ta un carga tremendamente pisá. (2 Timoteo 3:1-5; Revelacion 6:5, 6) Hende cu ta sin trabou pa hopi tempu lo haña cu ta asta mas difícil pa obtené trabou, specialmente si “desempleo di largu plaso” ta dal e, aunke tur otro cos ta sigui normal. Lamentablemente, algun hende nunca por haña trabou atrobe.b

Den hende djawe cu ta sin trabou, sicólogonan ta haña cu problema sikiátrico i sicológico ta aumentá i tambe instabilidad emocional, frustracion, indiferencia progresivo, i perdementu di respet propio. Ora hende cu yu perde nan trabou, esei ta un tragedia personal teribel. E mundu ta colaps rond di nan. Siguridad ta disparcé. Realmente, den e dia djawe, algun experto ta ripará nacementu di un “ansiedad di anticipacion” relacioná cu e posibilidad di perde trabou. E ansiedad aki por afectá seriamente relacion den e famia i por tene resultado asta mas trágico, manera suicidionan recien di hende desempleá por indicá. Ademas, e dificultad di obtené nan promé trabou ta e posibel causa di violencia i isolacion social di hóbennan.

‘Prizonero di un Sistema Perverso’

Spierta! a tene entrevista cu vários hende cu a perde nan trabou. Armando, di cincuenta aña di edad, a bisa cu esei a nificá p’e “mira esfuerso di 30 aña di trabou frustrá, cuminsá completamente di nobo” i sintié “manera un prizonero di un sistema perverso.” Francesco ‘a mira e mundu colaps riba dje.’ Stefano “a haña un sintimentu profundo di desilusion den e sistema di bida actual.”

En cambio, Luciano, kitá for di trabou den gerencia técnico di un fábrica importante di auto italiano pa casi 30 aña, “a experimentá rabia i desilusion ora el a mira cu su esfuerso, bon conducta, i confiabilidad durante tantu aña di trabou tabata considerá como nada.”

Pronosticacion i Desilusion

Algun economista a anticipá situacionnan mashá diferente. Na 1930 economista John Maynard Keynes a haci e pronosticacion optimista “empleo pa tur hende” dentro di e siguiente 50 añanan, i pa hopi aña empleo pa tur hende a ser considerá como un meta alcansabel. Na 1945 e Statutonan dje Organisacion di Nacionnan Uní a pone como meta e logramentu rápido di empleo completo. Te na tempu basta recien hende a kere cu progreso kier men empleo i ménos ora di trabou pa tur hende. Pero esei no tabata e resultado. E recesion económico serio dje último década a causa “e crísis mundial di desempleo di mas malu desde e Depresion Grandi despues di 1930,” segun e Organisacion Internacional di Labor (ILO). Den Sur Africa tin por lo ménos 3,6 miyon hende sin trabou, incluyendo mas cu 3 miyon africano scur. Asta Hapon—cu tabatin mas cu dos miyon hende sin trabou aña pasá—ta experimentá un crísis.

Pakico desempleo ta un plaga asina universal? Cua solucion nan a proponé pa enfrent’é?

[Notanan]

[Mapa na página 2, 3]

Cánada—9,6 porciento

Merca—5,7 porciento

Colombia—9 porciento

Irlanda—15,9 porciento

Spaña—23,9 porciento

Finlandia—18,9 porciento

Albania—32,5 porciento

Sur Africa—43 porciento

Hapon—3,2 porciento

Filipínas—9,8 porciento

Australia—8,9 porciento

[Rekonosementu]

Mountain High Maps™ copyright © 1993 Digital Wisdom, Inc.