Tepetepet na Saray Manbabasa

Akin ya ginawan isyu na saray onkokontra ed si Jesus so panag-uras na lima?

Sakey iyad saray dakel ya isyun inusar na saray onkokontrad si Jesus pian sikatoy nabalaw da tan saray disipulo to. Karga na Mosaikon Ganggan so pigaran totontonen parad panaglinis ya singa say ompapaway ed laman na too, kating, tan pangegna ed bangkay na too tan ayayep. Nabasa met ditan no panon ya linisan iray dutak. Nayarin diad panamegley na pambagat, panuras tan panames, odino panwalsik.​—Lev., kap. 11-15; Num., kap. 19.

Saray Judion rabbi et nanggawa ray mas detalyadon instruksion no panon ya unoren irayan ganggan. Unong ed sakey ya reperensya, diad kada karutakan et “kaukolan ya amtaen no anto ray posiblin akalaan ed satan, no panon tan siopa ray nayarin naalisan, no anto ray kagawaan tan bengatlan makapangiyalis tan agmakapangiyalis ed satan, tan saray paraan tan ritual ya kaukolan dan gawaen parad panaglinis.”

Intepet na saray onkokontrad si Jesus: “Akin et agtutumboken na saray disipulom so abayag lan tradisyon na totoo, ta mamangan iran marutak so lima ra?” (Mar. 7:5) Say tutukoyen na saraman ya lider na relihyon et aliwan say panuras na lima antis ya mangan. Walay ritual ya igaganggan na saray rabbi​—kaukolan dan kalboay danum so lima ra antis iran mangan. Inyarum ni na satan: “Pandedebatian da met no antoy pangargaan day danum, no anton danum so usaren da, siopay nepeg ya mangikalbo, tan no anggad iner ya parte na lima so urasan.”

Simpli labat so ebat nen Jesus ed pangipipilit dad ganggan ya ginawa na too. Imbaga tod saray lider na relihyon nen inmunan siglo: “Dugarugay impropesiya nen Isaias nipaakar ed sikayo ran mansimpisimpitan, ta unong a nisulat, ‘Sarayan totoo et papagalangan da ak ed panamegley na bibil da, balet arawrawi ed siak [Jehova] so kapusoan da. Anggapoy kakanaan na pandadayew dad siak, ta saray ganggan na totoo so ibabangat dan doktrina.’ Ibabaliwala yo so ganggan na Dios, ta estrikto yon tutumboken so tradisyon na totoo.”​—Mar. 7:6-8.