LEKSION 4

Maliket so Ama To tan si Jehova

Si Jefte et manpipikasi ed si Jehova legan ya milalaban iray sundalo na Israel ed saray kakabusol da — Antoy impormisa nen Jefte ed si Jehova?

Si Jefte a nanlapud labanan, nilakap toy anak to ya pinmaway pian mangabet ed sikato — Anggano mairap, ginawa na anak nen Jefte so impormisa nen ama to

Antam no siopa yay ugaw ed litrato?— Anak nen Jefte. Anggapo ed Biblia so ngaran to, pero amta tayo ya maliket so ama to tan si Jehova ed ginawa to. Kabaten ta no siopa ya, tan say ama ton si Jefte.

Maong ya too si Jefte tan naynay ton ibabangat ed anak to so nipaakar ed si Jehova. Sikatoy mabiskeg tan maong ya lider. Kanian ginawa na saray Israelita ya lider da pian milaban ed saray kabusol da.

Nampikasi ed Dios si Jefte pian manalo ra. Impormisa to ya no manalo ra, iter tod si Jehova so sankaunaan ya ompaway ed abung to kasempet to. Tan say toon iter tod si Jehova et diretso lan manayam tan mantrabaho ed tabernakulo na Dios. Say tabernakulo et pasen ya ditan mandadayew iray totoo nensaman. Analo si Jefte! Kasempet to, antam no siopay inmunan pinmaway ed abung to?—

Duga ka, say saksakey ya anak to! Natan et makaarawi lad sikato, kanian maer-ermen. Pero di ba, nampormisa si Jefte? Katon imbagan tampol na anak to: ‘Ama, no nampormisa kayod si Jehova, gawa yo.’

Say anak nen Jefte ya mantitipon na kiew parad tabernakulo; sikatoy pinasyar na kakaaro to — Kada taon, sikatoy papasyaren na saray kakaaro to

Maermen met so anak nen Jefte. Ta no wala lad tabernakulo, agnayarin miasawa tan mananak. Pero labalabay ton gawaen so impormisa nen ama to pian maliket si Jehova. Mas importante iman ed sikato nen say miasawa tan mananak. Kanian nanayam lad tabernakulo anggad impatey to.

Maliket kasi so ama to tan si Jehova ed ginawa to?— Ay on! Sika met, no maunor ka tan inarom si Jehova, naalig mo may anak nen Jefte. Maliket si Papam tan Mamam, tan si Jehova.

BASAEN ED BIBLIAM