Disaster Relief nen 2023—“Alikna Min Mismo so Panangaro nen Jehova”

Impasakbay na Biblia ya “manlalaban iray bansa” tan wala ray nagawan kalamidad legan na “kaunoran a parte na sistema na mundo.” (Mateo 24:3, 7) Anengneng tayon agawa irayan propesiya legan na 2023 ya serbisyon taon.a Balet anggano wala ray guerra tan kalamidad ed ngalngali 100 ya bansa, impanengneng na saray Tasi nen Jehova so panangaro nen Jehova. Panon?

Legan na 2023 ya serbisyon taon, naapektoan iray agagi tayo ed masulok ya 200 ya kalamidad, balanglan natural odino resulta na ginawa na too. Ami-amin et masulok ya 10 milyon ya dolyarb so agastos na saray legal ya korporasyon na saray Tasi nen Jehova parad disaster relief. Inala da itan ed saray pundo ya indonasyon parad sankamundoan ya kimey. Agni kaibad satan so sarilin kuarta ya inusar na dakel ya agagi tayo ed impanboluntaryo da ed mismon lugar da. Imanoen no panon ya inusar iray indonasyon yo pian natulongan iray biktima na duara ni labat ed dakdakel ya kalamidad ya akaapekto ed saray agagi tayo.

“Walan Talagay Tuan Panangaro”

Wala ray pasen ed Nigeria ya dati lan nadedelap. Balet samay delap nen Oktubre 2022 so sankagrabian ya naeksperiensya na satan ya bansa ed loob na samploran taon. Masulok ya 676,000 ya ektarya na daralusan so aderal tan masulok ya duaran milyon ya totoo so naandian na ayaman. Anuron tampol so branch na Nigeria na saray Disaster Relief Committee ya mangorganisa ed pangiter na relief tan mamaseseg ed saray agagi.

Say Epekto ed Saray Agagi Tayo

• 7,505 ya agagi so naandian na ayaman

• 860 ya abung so medyo aderal odino talagan agaygay

• 90 ya Kingdom Hall tan sakey ya Assembly Hall so adelap

Say Angusaran ed Saray Donasyon

Masulok ya $250,000 ya dolyar so agastos ed disaster relief, kaiba lad satan iray:

• Naakan ya singa say belas, beans, tan noodles

• Suplay ed abung ya singa saray nadukolan tan moskitiro

• Impangapiger odino impanpaalagey lamet na saray aderal ya abung

Panon ya sineguro na saray agagi tayo ya sulit so impangusar ed saray indonasyon ya kuarta? Say sakey ya paraan et ninengneng dan maong so kada abung pian makapandesisyon ira no kasin nayari nin apigeren iratan. No talagan kaukolan lan salatan so sakey ya abung, manggagawa ray simplin design ya kaslakan ya gagawaen ed satan ya lugar.

Misalsalamat ya maong iray agagi tayon akaawat na tulong. Oniay imbaga na sakey ya sister: “Ginulo na delap so bilay mi ta aderal ya amin so daralusan mi tan anggapoy napanayaman mi. Akainawa kami nen sinmabi iray agagi tayo ed saman ya agew pian tulongan kami tan ikdan kami na safe ya napanayaman. Tan mas lalon akainawa kami nen naawat mi ray impawit na branch office ya naakan. Ngalngali agkami makasel nen anengneng min nagagawad mismon bilay mi may ibabaga na Juan 13:34, 35. . . . Walan talagay tuan panangaro. Manlapud puso so pisasalamat na interon pamilya mi ed saray agagi ya linma dia ya tinmulong ed sikami nen kakkaukolan mi.”

Naimano na saray totoo ed kaliberliber so relief work ya gagawaen tayo. Oniay imbaga na kapitan ed Sabagreia, Bayelsa State: “Dakdakel so organisasyon odino relihyon ed mundo, pero saray Tasi nen Jehova labat so akagawa na onia. . . . Say organisasyon [yo] so sakey ed saray sankaabigan ed interon mundo.”

“Alikna Min Mismo so Panangaro nen Jehova”

Legan na Pebrero 2023, masulok ya 400 ya pool so aneral ed dakel ya pasen ed Chile. Masulok ya 430,000 ya ektarya na dalin, kaiba la ray importantin pasilidad na Chile, so aderal. Manga 8,000 ya totoo so nan-evacuate. Nen agawa so kalamidad, angorganisa ya tampol so branch office na pangiter na relief.

Say Epekto ed Saray Agagi Tayo

• 222 ya agagi so nan-evacuate

• 20 ya abung so aderal

Say Angusaran ed Saray Donasyon

Masulok ya $200,000 ya dolyar so agastos ed disaster relief, kaiba lad satan iray:

• Naakan tan danum

• Panlutoan, suplay parad panlinis, tan tambal

• Impangapiger ed saray aderal ya abung

Abigla so sakey ya pamilya nen naamtaan da ya aderal so amin ya kayarian da, kaiba lay abung tan negosyo da. Kanian naandian iray anapan. Nen kakkagawa to man, maer-ermen ira kada no nanengneng da so bakantin lote ya datin kawalaan na abung da. Pero legan dan nanenengneng ya ipapaalagey lamet so abung da, kalkalnan linmemew so liknaan da. Aliklikna da so panangaro na saray boluntaryo tan akatulong itan ed sikara pian nasarag day situasyon da. Apaseseg ya maong so pamilya ed sayan agawa ed sikara kanian akila ira ed saray boluntaryo tan tinmulong iran ipaalagey so abung na sakey brother.

Apaseseg ya maong iray agagi tayo ed sayan uksoyan na pangiiter tayo na tulong. Oniay imbaga na sakey ya brother: “Talagan makapadinayew so pangoorganisa nen Jehova ed saray Disaster Relief Committee. Sakey agew kayari na trahedya, sinmabi ran tampol ya wala ray awit dan tulong. Makapaseseg no walay nabasam nipaakar ed disaster relief ed arum a parte na mundo. Pero duma no agawan mismo ed sika, mas naapresyam so organisasyon; say pangaalig na saray agagi ed saray kualidad nen Jehova; tan say pampapaga da pian niiter dad sikami so pankaukolan mi ed materyal, espiritual, tan emosyonal. Alikna min mismo so panangaro nen Jehova.”

Legan a manasingger so kasampotan na sistema na mundo, dakel ni so nanengneng tayon kalamidad. (Lucas 21:10, 11) Anggaman ontan, diad panamegley na Kristianon kongregasyon, nanengneng tayo ya say maaron Ari tayo, si Jesu-Kristo, et walad sikatayo “ed amin ya agew anggad kaunoran a parte na sistema na mundo.” (Mateo 28:20) Ipapanengneng na saray mabulos ya donasyon yo ed sankamundoan ya kimey diad panamegley na donate.jw.org tan arum nin paraan, pati say panguusar yo ed panaon tan biskeg yo, ya susuportaan yo so Panarian tan say maaron Ari to. Salamat ed tuloytuloy ya pangiiter yo.