TULONG PARAD PAMILYA | PANANGASAWA

No Panon Kan Magmaliw a Balanse ed Panangusar Mo ed Gadyet

Say panangusar ed gadyet et nayarin maong odino makapuy so epekto to ed relasyon na sanasawa. Antoy epekto na satan ed relasyon yo nen asawam?

No antoy nepeg mon naamtaan

No duga so pangusar ed gadyet, maong so epekto na satan ed relasyon na sanasawa. Singa bilang, wala ray asawan lalaki tan bibii ya uusaren da itan pian nakontak day sakey tan sakey no ag-ira saniba.

“Say simplin pangibaga ed text ya ‘I love you’ odino ‘Sankanonot ta ka’ et baleg so epekto to.”—Jonathan.
No aliwan duga so pangusar ed gadyet, makapuy so epekto na satan ed relasyon na sanasawa. Singa bilang, wala ray totoo ya naynay lan diad gadyet da so kawalaay imano da, kanian napapaulyanan da lay asawa da ta anggapo lay panaon da.

“Seguradon wala ray panaon ya labay nen asawak so mitongtong ed siak no agko uusaren so cellphone ko.”—Julissa.
Ibabaga na arum ya sarag dan pambansagen so pakawalaan na marakep ya tongtongan ed asawa ra tan say pangusar da na gadyet da. Unong ed sakey a sociologist ya si Sherry Turkle, imposiblin gawaen ya bansag so nanduruman bengatla. Anggano iisipen na totoo ya marakep no dakel so sabay-sabay ya gawaen, diad tua et aliwan epektibo itan. Imbaga to ya, “onabeba so kalidad na trabaho no pambansagen ya gawaen so kada balon trabaho.”a

“Naliliketan ak no mitongtong ed siak so asawak, basta no anggapoy arum ya gagawaen to. No legan ak ya mitotongtong et walay arum ya gagawaen to, pakaliknak et mas maliket ni ed gadyet to.”—Sarah.

Tandaan: Say paraan na pangusar mod gadyet mo et nayarin maong odino makapuy so epekto to ed relasyon yon dua nen asawam.

No antoy nayarin gawaen mo

Amtaen so prayuridad mo. Ibabaga na Biblia: “Seguroen yo komon no anto ray mas importantin bengatla.” (Filipos 1:10) Tepetan so sarilim, ‘Kasin say panaon tan atension mi nen asawak et oonlad saray gadyet mi, imbes ya diad sikamin dua?’

“Aliwliwan nengnengen so sanasawa ya mansi-cellphone legan iran mamangan ed restawran—say atension da et walad gadyet da. Agtayo labay ya magmaliw ya aripen itayo na gadyet tan nalingwanan tayo lay sankaimportantian—say relasyon tayod asawa tayo.”—Matthew.

Mangi-set na limitasyon. Ibabaga na Biblia: “Manalwar kayon maong a say kagagawa yo et aliwan singa saray agmarunong noagta singa saray marunong a totoo, ya usar yod sankaabigan so panaon yo.” (Efeso 5:15, 16) Tepeten so sarilim, ‘Sarag ko kasi mangi-set na espisipikon oras parad pambasa tan pan-reply ed saray mensahe ya agmet emergency, imbes ya bastak labat imanoen so amin ya mensahe ya nanaawat ko?’

“Makatulong no iyan kod silent mode so cellphone ko insan dia lad arum ya pankanawnawa so pan-reply ko ed saray naaawat kon mensahe. Agmet lanang ya emergency so naawat kon tawag, text, odino e-mail kanian anggano agkon tampol iratan imanoen.”—Jonathan.

No posible, ag-aawiten ed abung so trabaho. Ibabaga na Biblia: “Walay panaon na amin a bengatla.” (Eclesiastes 3:1) Tepetan moy sarilim: ‘Kasin anggapo lay panaon ko ed pamilyak lapud panguusar kod cellphone ko? No on, antoy epekto na satan ed relasyon kod asawak? Antoy nibaga nen asawak?’

“Lapud saray gadyet, sarag tayon gawaen iray trabaho tayo ed anggan anton oras. Pansasagpotan kon maong ya ag-usaren so cellphone ko tan gawaen iray kimey kod trabaho no kaibak si asawak.”—Matthew.

Pantongtongan yo nen asawam so nipaakar ed panangusar ed gadyet. Ibabaga na Biblia: “Mantultuloy komon ya anapen na kada sakey so pankaabigan na arum a too, aliwan say dilin pankaabigan to.” (1 Corinto 10:24) Pantongtongan yo nen asawam no panon yon usaren so gadyet tan no anto ray kaukolan yon umanen, no kaukolan. Pian nagawaan yo itan, sarag yon usaren so giya parad pantotongtong ya walad sayan artikulo.

“Matua kami nen asawak ed sakey tan sakey, babagaan mi sakey tan sakey no nalikas min nasosobraan mi lay panguusar mi ed cellphone odino tablet mi. Amta min nayarin panlapuan itan na problema, kanian agmi ibabaliwala so panmoria na kada sakey.”—Danielle.

Tandaan: Seguroen ya aliwan say gadyet so mangontrol ed bilay mo.

No antoy ibabaga na arum ya sanasawa

“Nayarin nasayang so oras diad labi ya usaren mi komon nen asawak pian pantongtongan iray agawa ed sanagew no say kawalaan na imano mi et diad cellphone mi. Dakdakel la iray bengatlan kaukolan tayon asikasoen. Kanian agtayo dapat sasayangen so panaon tayo ed gadyet tayo ya nausar tayo komon pian onelet so relasyon tayod asawa tayo.”—Trista, tan say asawa ton si Georgel.

“Kanepegan na asawam so sigpot ya atension mo. Naynay ya walay onsabin text, e-mail, odino news alert ya kaukolan ya imanoen. Balet kaslakan et makaalagar met iratan. No agmo labay so man-text no manda-drive ka ta amtam ya nayarin nadisgrasya ka, seguradon agmo met labay ya usaren so gadyet mo ta ompan naderal so relasyon yo nen asawam.”—Jonathan, tan say asawa ton si Katelyn.

Giya parad pantotongtong

Unona, kada sakey ed sikayo et sarag ton pannonotan irayan tepet. Insan yo pantongtongan ya dua iray ebat yo.

Diad anto ran paraan, no bilang wala, ya akatulong so gadyet yo pian magmaliw ya marakep so relasyon yo nen asawam?
Kasin pakaliknam et wala ray onlelesan problema lapud panguusar nen asawam na gadyet? No on, akin et nibagam itan?
Parad sika, kasin ibaga na asawam ya say panangusar mo na gadyet et mangiiter na problema ed relasyon yon sanasawa? No on, akin et nibagam itan?
Kasin wala ray rason no akin ya naynay ya kaukolan mon basaen tan i-reply iray mensahen nanaawat mo? No on, panon mon naseguro ya anggapoy negatibon epekto na saya ed relasyon yon dua nen asawam?
Anto ran pananguman, no bilang wala, so labay yon gawaen nen asawam diad panguusar yo ed gadyet?

a Manlapud libron Reclaiming Conversation—The Power of Talk in a Digital Age.