Gagawaen Ko No Antoy Sarag Ko

Si Irma et taga ed Germany tan ngalngali 90 años la. Amidua lan naaksidente tan aminpiga lan naoperaan kanian agla makakapila ya manpulong ed kaabungan. Balet sikatoy manpupulong ed saray kakanayon tan kakaaro to panamegley na sulat. Amayamay so makakaliket, tan napapabiskeg iray inateyan no makakaawat iray sulat to. Ontatawag odino mansusulat ni ingen so arum pian naamtaan da no kapigan lamet ira makaawat na sulat. Dakdakel met so naaawat ton thank-you letter. Imbaga nen Irma, “Makakaliket ak ed sarayan gagawaen ko tan makakapanpulong ak ni.”

Susulatan met nen Irma iray walad nursing home. Inkuan to: “Walay akulaw ya tinmawag ed siak tan imbaga to ya apabiskeg a maong ed sulat ko, ta agano nin inatey so asawa to. Insigpit tod Biblia to so sulat ko tan lanang ton babasaen no labi. Imbaga met na sakey a bii ya inateyan na asawa ya mas baleg so tulong na sulat kod sikato nen samay sermon na pari. Dakel so tepet to tan labay toy ombisita ed siak.”

Walay kaaro nen Irma ya aliwan Tasi, ya inmalis ed arawin lugar. In-request to ya sulatan nen Irma. “Insinop ton amin so sulat ko,” so kuan nen Irma. “Nen inatey, tinmawag may anak ton bii ed siak. Imbaga to ya abasa ton amin so sulat ko, tan labay to met ya ipawitan koy sulat nipaakar ed Biblia.”

Panliliketan nen Irma so manpulong ed onian paraan. “Kekerewen kod si Jehova ya ikdan to ak na biskeg pian makapanlingkor ak ed sikato,” so inkuan to. “Anggano agak la makaonla ed saray kaabungan, gagawaen ko no antoy sarag ko.”