TEPET NA SARAY KABATAAN
Kasin Ayos Labat so Mi-flirt?
Anto tay flirting?
Iisipen na arum ya no mi-flirt ka, ipapalikas mo labat diad ibabagam tan gagawaen mo ya walay panggustom ed sakey ya agmo kaparay sekso. Kasin agto sarag ya ipanengneng mod sakey ya too ya walay panggustom ed sikato? Andi met. “No wala ka lad edad ya mi-date tan wala lay nagugustoan mo,” so kuan na kabataan ya si Ann, “atan labat so paraan pian naamtaan mo no wala met so panggusto tod sika!”
Balet diad sayan artikulo, pantongtongan tayo so tungkol ed flirting ya say sakey et kunwarin walay panggusto to anta agmet manaya seryoso.
“Duma may ikdan moy espisyal ya atension so sakey ta labay mon nainaro. Duma met balet may paasaen mo, insan mo ibagan anggapoy feelings mod sikato ta agkan talaga seryoso.”—Deanna.
Akin et gagawaen itan na arum?
Wala ray mi-flirt pian naarumay confidence da. “No nalikas mon mainomay mon alaey atension na arum, ompan labay mon mas ondakel ni makapansin ed sika,” so imbaga na kabataan ya biin si Hailey.
Balet no sasadyaen mon ipalikas ya walay panggustom ed sakey anta anggapo manaya, ipapanengneng mon agmo rerespetoey liknaan to. Tan nakuestion no makalakal ka o andi. Oniay ibabaga na Biblia: “Say inkamakulangkulang et panliliketan na samay andian na maong a pakatebek.”—Proverbio 15:21.
Kanian oniay inyarum nen Hailey: “Diad gapo et ompan singa ayos labat so mi-flirt, pero aliway pansumpalan to.”
Anto ray aliwan pansumpalan na satan?
No flirt ka, naderal so reputasyon mo.
“Say toon flirt et iresponsabli tan ugaw-ugaw. Nalikas mo ya kunwari labay to ka pian panggalawan toy liknaan mo.”—Jeremy.
Ibabaga na Biblia: “Say aro et . . . agto aanapey dilin pankaabigan to.”—1 Corinto 13:4, 5.
Isipen pa: Anto ray panagsalitam o kakikiwas mo ya lapud satan et isipen na arum ya flirt ka?
No flirt ka, makasakit ka na liknaan.
“No walay nakabat kon flirt, onarawi ak lan tampol. Singa kakatongtongen to ak labat lapud bii ak. Antak ya no say sakey et flirt, agto iisipey feelings ko; sarili to labat so nononoten to.”—Jaqueline.
Ibabaga na Biblia: “Mantultuloy komon ya anapen na kada sakey so pankaabigan na arum a too, aliwan say dilin pankaabigan to.”—1 Corinto 10:24.
Isipen pa: Asalim lay say antam et nagugustoan ka na sakey a too, anta andi manaya? Antoy aliknam ey? Antoy gawaen mo pian agmo ’tan nagawaan ed arum?
No flirt ka, agka makalmoy too ya talagan mangaro ed sika.
“Agko labay so mi-date o miasawa ed lakin flirt. Panon kon nagustoan o pantiwalaan so laki ya mankukunwari labat?”—Olivia.
Diad Biblia, oniay imbaga nen salmistan David: “Papaliisan ko iramay iyaamot day inkatoo ra.”—Salmo 26:4.
Isipen pa: Siopay malabay ed toon flirt? Kasin ontan ya too so labay mon onggusto ed sika?