Kasin Kaukolan Tayoy Magmaliw a Kabiangan na Sakey ya Relihyon?

Say ebat na Biblia

On, lapud labay na Dios ya mantitipon iray totoo pian mandayew ed sikato. Ibabaga na Biblia: “Nonoten tayoy sakey tan sakey pian napakiwas tayoy balang sakey a mangaro tan manggaway maabig iran kimey, ya agtayo papaulyanan so pantitipon tayo.”—Hebreo 10:24, 25, paimanod leksab.

Impaimano nen Jesus ya saray patumbok to et manbuo na organisadon grupo nen imbaga tod sikara: “Diad saya et naamtaan na amin a sikayo iray disipulok—no manaaroan kayo.” (Juan 13:35) Pian nipanengneng na saray disipulo nen Kristo so ontan ya panangaro, kaukolan iran mantitipon kaiba iray kapananisiaan da. Naorganisa irad saray kongregasyon ya regular a mantitipon pian mandayew ed Dios. (1 Corinto 16:19) Anggan iner ya bansa so kawalaan da, amin da et sanaagi.—1 Pedro 2:​17.

Aliwan magenap so basta labat iloob ed sakey ya relihyon

Diad samay imbaga na Biblia ya kaukolan a mantitipon iray totoo pian mandayew ed Dios, agto labay ya ibagan basta onloob kad sakey a relihyon et napaliket mo lay Dios. Pian awaten na Dios so panagdayew mo, dapat et nanengneng ed inagew-agew a kabibilay mo so papanisiaan mo. Singa bilang, ibabaga na Biblia: “Say relihyon a malinis tan aliwan marutak ed pakanengneng na Dios tan Ama tayo et saya: say pangasikaso ed saray maniirap ya ulila tan balo, tan say pansiansia na sakey ya andian na mantsa ed mundo.”—Santiago 1:27, paimanod leksab.