Kasin Walay Sarilin Biblia na Saray Tasi nen Jehova?
Uusaren na Saray Tasi nen Jehova so dakdakel tan nanduruman patalos ed panaaral day Biblia. Balet no walad lenguahe da so Balon Mundo a Patalos na Masanton Kasulatan, mas labay da itan ya usaren lapud nabasa ditan so ngaran na Dios, susto, tan malinew itan.
Nabasa ditan so ngaran na Dios. Say arum ya angi-publish na Biblia et agda inter so panamagalang ed samay makanepegan ed satan. Singa bilang, akalista ed sakey ya patalos so ngaran na masulok ya 70 totoo ya anggan panon et akatulong pian napawala itan ya patalos na Biblia. Balet sigpot ya inekal ed satan ya Biblia so ngaran na Autor, si Jehova a Dios!
Duma so Balon Mundo a Patalos ta impawil so ngaran na Dios ed nilibon pasen ya pakanengnengan ed satan diad orihinal ya teksto, tan agbalot abitla so ngaran na saray kaiba ed komite ya amawala ed satan ya patalos.
Susto. Aliwan amin ya patalos et suston nipapasabi da so orihinal ya mensahe na Biblia. Singa bilang, oniay impasabi na sakey a patalos ed Mateo 7:13: “Loob kayod mainget a puerta, ta maawang so puerta tan mainomay so dalan a mamaarap ed impierno.” Balet say orihinal ya terminon inusar et “kadederal,” aliwan “impierno.” Nayarin inyan na saray managpatalos so salitan “impierno” lapud manisia ira ya saray mauges et napairap ya andi-anggaan diad apoy na impierno. Balet satan ya ideya et agsusuportaan na Biblia. Kanian duga imay nabasa ed Balon Mundo a Patalos: “Loob kayo ed mainget a puerta, lapud malapar so puerta tan maawang so dalan ya ompugta ed kadederal.”
Malinew. Say maong ya patalos et aliwa labat ya susto noagta malinew met, mainomay ya talosan. Imanoen iyan alimbawa. Diad Roma 12:11, inusar na Kristianon apostol a si Pablo so balikas ya say literal ya kabaliksan to et “diad manlelwag ya espiritu.” Satan ya patalos et agto ipasabi so dugan kabaliksan ed Pangasinan, kanian impatalos itan na Balon Mundo a Patalos diad paraan ya mainomay ya natalosan. Nabasa ditan ya saray Kristiano et nepeg ya “marlang ed espiritu.”
Wala ni sakey ya pidumaan na Balon Mundo a Patalos nilikud ed impangusar na ngaran na Dios, susto, tan malinew: Ibubunog itan ya anggapoy bayar. Kanian minilyon so makakabasa na Biblia ed sarilin lenguahe da—anggan saramay anggapoy isaliw da na Biblia.