No Panon Kan Magmaliw ya Maliket Diad Sarayan Mair-irap ya Panaon—Antoy Ibabaga na Biblia?

Diad sarayan mair-irap ya panaon, agtayo nakontrol so amin ya nagagawad sikatayo. Pero kaslakan, say liket tayo et ag-akadepende ed situasyon noagta ed no panon tayon aarapen iray nagagawa ed sikatayo. Ibabagay Biblia ya anggano wala ray problema, “magayaga lawas so bilay da ray totoon maliket.” (Provirbio 15:15, Maung a Balita) Antoy gawaen mo pian magmaliw kan mas maliket? Nengnengen no antoy nitulong ed sika na bilin na Biblia.

Agka masyadon manaaburido

Oniay ibabaga na Biblia: “Say kapagaan ed puso na too so mamapabelat ed satan, balet say maabig a salita so mamaliket ed satan.”—Proverbio 12:25.

• Natulongan ka na Biblia pian agka masyadon manaburido. Basaen so artikulon “Antoy Ibabaga na Biblia Nipaakar ed Kapagaan.”

Labanan moy ermen

Oniay ibabaga na Biblia: “Say tuan kaaro et mangaaro ed amin a panaon tan sakey ya agi a nailaloan diad panaon na gonigon.”—Proverbio 17:17.

• Wala ray bilin na Biblia no panon mon napaelet so relasyon mod saray kakaarom. Makatulong iratan pian nalabanan moy ermen. Basaen so artikulon “Nalabanan Moy Ermen Mo No Mikaaro Ka—No Panon ya Makatulong so Biblia.”

Paelet moy panangarom ed Dios tan ed totoo

Oniay ibabaga na Biblia: “Arom si Jehova a Dios mo ed interon pusom tan interon kamarerwam tan interon nonot mo. . . . Arom so kaparam a too a singa ed sikan dili.”a—Mateo 22:37-39.

• Makatulong so pikakasi pian mas naaro tayoy Dios. Pian naaruman ni antam, basaen so artikulon “Kasin Dedengelen na Dios Iray Pikakasi Tayo?”

• Nipanengneng tayon inaro tayoy totoo no tratoen tayo ra diad paraan ya imbaga nen Jesus. Naaruman ni antam nipaakar ed satan diad artikulo ya “Ano ang Gintong Tuntunin?”

Kasin labay mon naamtaan no panon kan natulongan na Biblia pian magmaliw kan maliket diad sarayan mairap ya panaon? Salim so libren interactive ya paraan na panag-aral na Biblia.