Natulongan Ka Kasi na Biblia ya Itunda so Inkaadik ed Druga?

Kada taon, minilyon so ompapatey lapud direkta odino aliwan direktan epekto na panguusar na saray substansia, kaiba lay panag-abuso ed druga. Legan na COVID-19 pandemic, mas linmoor iyan problema. Dakel so atulongan na advice ya manlalapud Biblia pian nitunda day inkaadik da ed druga. No walay onian lalabanan mo ya problema, natulongan ka na Biblia.a

Diad sayan artikulo

Akin ya dapat tayon mananap na advice ya nanlapud Biblia pian nitunda so inkaadik?

Naamtaan na saray researcher ya maslak ed saramay naaadik et walay mas aralem ya problema ra, singa bilang maer-ermen ira, nai-stress, mapagpaga, tan nadi-depress ni ingen. Sarag kan tulongan na Biblia pian nawalaan kay mabiskeg ya pananisia pian nasarag mo ray liknaan ya sengegan na pakaadik ed druga. Naaralan mo ditan no panon mon nakaaro so Dios. (Salmo 25:14) Tulongan to ka pian nasarag mo ray problema ya singa imposiblin nasolusyonan no bukor mo labat.—Marcos 11:22-24.

Say apatiran gawaen pian nitunda so inkaadik

1. Kabaten si Jehova a Dios.b (Juan 17:3) Sikato so Amalsa tan anggapoy limitasyon na pakayari to. Pero aliwan satan labat, sikato met so maar-aron Amam ed tawen. Labay toy onapit ed sika tan labay ton usaren so pakayari to pian tulongan ka. (Isaias 40:29-31; Santiago 4:8) Walay ipaparaan ton balibalin arapen parad sika no pilien mon awaten so panangaro to.—Jeremias 29:11; Juan 3:16.
2. Kerew kay tulong ed si Jehova. Manpikasi ka ed Dios tan kerew moy tulong to pian nitundam so inkaadik mo tan magmaliw kan “masanto [odino, malinis] tan makapaliket ed [sikato].” (Roma 12:1) Panamegley na masanton espiritu, odino aktibon puersa to, ikdan to kay ‘pakayari a mas mabiskeg nen say pakayari na too.’ (2 Corinto 4:7; Lucas 11:13) Satan ya pakayari so ontulong ed sika ya itunda so panag-abuso ed druga tan nisulong mo so “balon personalidad” ya makapaliket ed Dios.—Colosas 3:9, 10.
3. Panom so isip mo na kanonotan na Dios. (Isaias 55:9) Tulongan ka na Dios ya ‘napasimbalom so paraan na panagnonot mo,’ odino nauman moy panag-isip mo, ya makatulong ed sika pian nitundam so inkaadik mo. (Efeso 4:23) Walad Biblia so kanonotan na Dios kanian importante ya regular mon basaen itan. (Salmo 1:1-3) Dakel lay agunggonaan nen inawat day tulong pian natalosan day ibabangat na Biblia. (Gawa 8:30, 31) Iyoopresi na saray Tasi nen Jehova so libren interactive ya paraan na panag-aral na Biblia. Labay mi ka met ya imbitaan ya onatendi ed saray aral mi, ta ditan et aaralen mi no antoy ibabaga na Biblia tan no panon min iyaplika iratan ed bilay mi.
4. Pilim iray maong ya kaulop. Baleg so impluensya ed sika na saray kakaarom, balanglan natulongan da kan itundam so inkaadik mo, odino lapud sikara et nairapan kan itunda itan. (Proverbio 13:20) Iikdan ka na Dios na saray maong ya kaulop ya naalmom labat ed saramay mandadayew ed sikato, tan labay to kan minabang no mikaaro ka ed sikara. (Salmo 119:63; Roma 1:12) Pilim met ya maong so panagrelaks mo, lalo la ta singam met la nakakaulop iray karakter ed babantayan, dedengelen, odino babasaen mo. Iwasan moy antokaman ya mamakapuy ed determinasyon mon gawaen so duga.—Salmo 101:3; Amos 5:14.

Saray teksto ed Biblia ya ontulong ed sikan itunda so inkaadik

Salmo 27:10: “Anggano paulyan ak na mismon amak tan inak, si Jehova so mangasikaso ed siak.”

“Agkon balot akabat so tatay ko, kanian pakaliknak et singa walay kulang ed siak. Balet manlapu la nen akabat koy Jehova a Dios bilang tuan Persona tan inaro to ak, awalaay direksion so bilay ko tan asarag kon itunda so inkaadik ko.”—Wilby, tagad Haiti.

Salmo 50:15: “Tawag kad siak diad panaoy gonigon. Iliktar ta ka.”

“Aminpigapiga ak lan apabiskeg na sayan teksto ya labanan so inkaadik ko, anggano wala ray panaon ya adaeg ak na tukso. Totooren nen Jehova so promise to.”—Serhiy, tagad Ukraine.

Proverbio 3:5, 6: “Manmatalek ka ed si Jehova diad interon pusom, tan agka mandedepende ed dilin pakatalos mo. Diad amin a dalan mo et sikatoy nonoten mo, tan gawaen ton maptek iray basbas mo.”

“Akatulong ed siak irayan bersikulo ya mantiwala ed si Jehova, aliwan diad sarilik. Diad biskeg ya iiter to, talagan asarag kon umanen so bilay ko.”—Michele, tagad Italy.

Isaias 41:10: “Agka ontatakot, ta wala ak ed sika. Agka ompapaga, ta siak so Dios mo. Pabiskegen ta ka, on, tulongan ta ka. Talagan bembenan ta ka ed kawanan a limak unong ed inkatunong ko.”

“Grabe so panaaburidok no agak maka-drugs. Akombinse ak na sayan teksto ya tulongan ak na Dios ya nasarag so kapagaan ko, tan talagan aliknak so tulong to.”—Andy, tagad South Africa.

1 Corinto 15:33, paimanod leksab: “Agkayo palilingo. Say piulop ed mauges et maneral ed maabig iran prinsipyo.”

“Naaralan koy man-drugs lapud saray mauges ya kaulop tan naadik ak ed satan. Nitundak labat so man-drugs nen intundak met lay miulop ed sikara, tan say akikaaroan ko la et saray totoon labalabay koy kabibilay da ta malinis irad moral.”—Isaac, tagad Kenya.

2 Corinto 7:1: “Linisan tayoy sarili tayo ed amin a karutakan na laman tan espiritu.”

“Lapud sayan teksto, labalabay kon pansiansiaen ya malinis so laman ko tan itundak lay inkaadik kod druga tan arum ni ran makaderal ed laman ko.”—Rosa, tagad Colombia.

Filipos 4:13: “Walay biskeg kon arapen so amin a bengatla lapud samay mangiiter ed siak na pakayari.”

“Amtak ya agko sarag ya bukor ya itunday panag-drugs, kanian nampikasi ak ed Dios ya tulongan to ak. Tan inikdan to ak na biskeg ya kaukolan ko.”—Patrizia, tagad Italy.

Arum ni ran eksperiensya ya tuan agawa: Nitunda day inkaadik da diad tulong na Biblia

Maruksa so kaliberliber ya binalegan nen Joseph Ehrenbogen tan naadik ed alak, sigarilyo, marijuana, tan heroin. Aminpiga ya inatey lawari lapud overdose. Walay sakey ya teksto ed Biblia ya akatulong ed sikaton manguman. Basam so istorya to diad artikulon “Naaralan Kon Respetoen Iray Bibii tan say Sarilik.”

Aminpigan sinali nen Dmitry Korshunov ya itunda so inkabuanges to. Bantayan so video ya “Sinmawa Ak La ed Bilay Ko” pian naamtaan mo no antoy akatulong ed sikaton nasarag itan.

Kasin ibabawal na Biblia ya manpatambal iray naadik?

Andi. Oniay ibabaga na Biblia: “Agmankaukolan na managtambal iray totoon maksil so laman da, noagta saraman labat so mansasakit.” (Mateo 9:12) Onia met so imbaga na U.S. National Institute on Drug Abuse: “Say inkaadik ed druga et komplikadon sakit, tan anggano labalabay mo lan itunda itan odino determinado ka, kulang itan.” Siempre, mas mabiskeg so tulong ya iiter na Dios nen say determinasyon na anggan siopa. Balet, dakel ed saramay ayarian dan itunda so inkaadik da et agda labat inunor so advice na Biblia noagta nampatambal met ira ed doktor.c Singa bilang, oniay nanonotan na sakey ya laki ya say ngaran to et Allen: “Agaylay irap ko nen intundak so oninum na alak, ansakisakit. Diman ko a-realize ya kaukolan ko met so manpa-doktor likud ed espiritual ya tulong ya naaawat ko.”

Kasin ibabawal na Biblia so pangusar na druga bilang tambal?

Andi. Diad tua, ibabaga na Biblia ya uusaren so de-alkohol ya iinumen bilang tambal odino pian agmasyadon nairapan so sakey ya toon magano lan ompatey. (Proverbio 31:6; 1 Timoteo 5:23) Pero, no panon ya makaadik so alak, talagan makaadik met iray druga ya uusaren bilang painkiller. Kanian maabig no isipen ya maong so nayarin magmaliw ya peligro tan manalwar ya maong no manguusar na saray ireresetan painkiller.—Proverbio 22:3.

a Anggano akapokus iyan artikulo ed pangitunda ed inkaadik ed druga, saray prinsipyo na Biblia ya abitla dia et makatulong met ed saramay walay problema da ed alak, panagsigarilyo, panangan, panagsugal, pornograpiya, odino social media.

b Jehova so ngaran na Dios. (Salmo 83:18) Nengnengen so artikulo ya “Siopa si Jehova?”

c Dakel so makatulong ya rehabilitation center, ospital, tan saray programa ya makatulong ed iyabig. Nepeg ya pannonotan ya maong na kada sakey iray nanduruman pampilian insan ira mandesisyon no anton paraan so awaten da.—Proverbio 14:15.