Kasin Uusaren Mo Iray JW.ORG Contact Card?

Lapud asingger lay baleg a kairapan, apuraan so panagpulong tayo. (Pro 24:11, 12, 20) Pian natulongan iray totoo, sarag tayon usaren iray contact card pian naamtaan day website tayo tan naalay interes da ed Salita na Dios. Sayan card et walay code to ya onlad video ya Akin ya Aralen so Biblia? tan wala met diay imbitasyon pian makala na arum ya impormasyon odino manaral na Biblia. Wala ray agmangawat na literatura pero labay dan nengnengen so website tayo. Agka manaalangan ya mangiter na contact card ed sikara. Balet agmo iikdan na contact card iray ag-interesado.

Diad saray inagew-agew ya aktibidad tayo et sarag moy mitongtong ed arum tan naalam so interes da diad pangibaga na: “Walay labay kon iter ed sika. Nanengneng mo ed sayan card so sakey ya website ya walay libren impormasyon tan saray video nipaakar ed nanduruman topic.” (Jn 4:7) Lapud melag labat iray contact card, sarag moy mangawit na pigara pian niiter mod arum diad kada pankanawnawa.