Alig Yoy Alimbawa na Saray Propeta—Sofonias
1. Antoy kipapasen nen nanlingkor si Sofonias bilang propeta, tan panon ya sikatoy maabig ya alimbawa parad sikatayo?
1 Diad saman et kapegleyan na komapiton siglo B.C.E., tan kasmak so panagdayew ed Baal diad Juda. Agano nin pinatey so mauges ya Arin Amon, tan manuuley la so ugaw nin Arin Josias. (2 Awa. 33:21–34:1) Diad saman a panaon, ingganggan nen Jehova si Sofonias ya iyabawag so mensahe na panangukom To. Anggaman sikatoy nayarin membro na pamilya na ari na Juda, agto pinalemew so mensahe na panangondena nen Jehova ed pananguley na Juda. (Sof. 1:1; 3:1-4) Natan, gagawaen tayo met so anggaay nayarian tayo ya aligen so inkakpel nen Sofonias tan agtayo aabuloyan iray kakanayon ya makaamper ed panagdayew tayod si Jehova. (Mat. 10:34-37) Anton mensahe so inyabawag nen Sofonias, tan anto ray resulta?
2. Antoy nepeg tayon gawaen pian niyamot tayo ed agew na sanok nen Jehova?
2 Anapen si Jehova: Si Jehova labat so makapangiliktar ed saray totoo diad agew na sanok to. Kanian pinaseseg nen Sofonias iray totoo na Juda ya anapen si Jehova, anapen so inkatunong, tan anapen so kauyamoan legan ya wala ni nakekeran panaon. (Sof. 2:2, 3) Ontan met so situasyon tayo natan. Singa si Sofonias, papasesegen tayo so arum ya anapen si Jehova, balet kaukolan tayo met so onkiwas, a nepeg ya determinado tayon agbalot ‘ombeneg ed itutumbok tayod si Jehova.’ (Sof. 1:6) Imbes, anapen tayoy Jehova diad maalwar ya panaral tayod Salita to tan manpikasi parad panangigiya to. Anapen tayoy inkatunong diad pambilay a malinis ed moral. Anapen tayoy kauyamoan diad pagmaliw tayon mapasakop tan akaparaan ya onunor ed panangiwanwan na organisasyon nen Jehova.
3. Akin et nepeg ya mansiansia tayon positibo ed ministeryo?
3 Positibo Iran Resulta: Anggan panon et wala ray kinmiwas ed mensahe na panangukom nen Sofonias diad Juda, tan sankapatnagan itan ed si Josias ta ginapoan ton inanap si Jehova nen sikatoy ugaw ni. Indaulo nen Josias so makpel ya impangekal ed idolatriya diad Juda. (2 Awa. 34:2-5) Natan, anggano wala ray bini na Panarian ya nitanem ed gilig na dalan, diad kabatoan, odino diad kasabitan, wala met iray nitanem ed maong ya dalin tan manbubunga iratan. (Mat. 13:18-23) Makapanmatalek tayon itultuloy ya bendisyonan nen Jehova so pansasagpot tayon magmaliw ya okupado ed pangisisibwag ed bini na Panarian.—Sal. 126:6.
4. Akin et nepeg tayon ‘manalagar ed si Jehova’?
4 Inisip na arum a tagad Juda ya agbalot onkiwas si Jehova. Balet, impaseguro nen Jehova ya asingger la so baleg ya agew to. (Sof. 1:12, 14) Say nisalba labat et saramay nampasalimbeng ed sikato. (Sof. 3:12, 17) Legan tayon ‘manaalagar ed si Jehova,’ komon ta maliket itayon manlingkor a kaiba iray mandadayew ed makapanyarin Dios tayo!—Sof. 3:8, 9.