Nonoten Iramay Walad Nursing Home
1. Akin ya kaukolan a napasabian na maong a balita iramay walad nursing home?
1 Dakel so makakalikna na makapakapuy iran epekto na itatatken. (Ecl. 12:1-7) Wala ray matatatken ya manaayam ed nursing home, kanian ompan agtayo ra nasabian no manpupulong tayod kaabungan. Anggano posiblin naiirapan la ran onakar odino makapuy lay memorya da, saray matatatken tan arum nin manaayam ed nursing home et nayarin sarag da nin naaralan, naapresya, tan naaro si Jehova. Panon tayon nipasabid sikara so maong a balita na “maliket ya ilalo”?—Tito 2:13.
2. Panon tayon makagaway listaan na saray pasilidad na nursing-care ya sarag tayon bisitaen?
2 No Panon ya Igapo: Kaslakan et makagawa kay listaan na saray pasilidad na nursing-care no mananap kad Internet odino telephone directory na lugar yo. Nengnengen iray kategorya a singa say “nursing homes,” “group homes,” tan “residential-care facilities.” Nayarin idaulo na manangasikaso na serbisyo so panguksoy ed saray kualipikadon manangipalapag ya ombisitad kada pasilidad. Diad tulong nen Jehova tan diad maabig a pamplano, posiblin nigapo so panagaral na Biblia bilang grupo.—Uli. 21:5; 1 Juan 5:14, 15.
3, 4. (a) Siopay nepeg tayon asinggeran pian nigapoy panagaral na Biblia bilang grupo? (b) Panon tayon ipaliwawa so uksoyan ed panagaral?
3 Say paraan na panagaral et depende ed klase na pasilidad. Diad angkabaleg iran pasilidad ya dakel iray manaayam tan membro na staff, mas maabig no asinggeran so receptionist tan ibagan labay moy mitongtong ed mangaasikaso ed satan ya pasilidad. Diad angkelag iran pasilidad—saray abung ya daiset labat so manaayam tan walay duara o taloran caregiver—ompan mas maabig no iyeskedyul so direktan pitongtong ed mismon akanggaway abung.
4 Balang lad saratan, ipaliwawam ya boluntaryo kan ontutulong ed saray totoon mahilig ya manbasa tan pantongtongan so Biblia. Tepeten no wala ray manaayam ditan ya labay day mibiang ed grupo pian pantongtongan so Biblia ed manga 30 minuto kada simba. Nayarin usaren so nanduruman publikasyon, balet apaneknekan na dakel ya labalabay na totoo iray libron Saray Istorya ed Biblia tan The Greatest Man Who Ever Lived. Ompan labay mon ipanengneng iratan ya publikasyon ed mangaasikaso na pasilidad. Sarag yon pantongtongan so agew, oras, tan kuarton panaralan, insan kaslakan et ipaskil da itan ed eskedyul na saray aktibidad na nursing home. Agka natatakot ya ibagan sakey ka ed saray Tasi nen Jehova. Ontan met, ibagam ed mangaasikaso ya agka linma ditan pian mangikondukta na relihyoson programa, noagta pian ipaseseg so panagaral na Biblia.
5. Anto ran praktikal a suhestion so makatulong pian magmaliw a makapaliket tan makagunggona so panagaral?
5 Pangikondukta na Panagaral: Say pangikondukta ed panagaral et depende ed kipapasen tan kaliberliber na pasilidad, kanian nepeg moy onadapta tan usaren so pakatebek. Nepeg a mangawit so mangikondukta na pigaran kopya na publikasyon a panaralan tan kolektaen to iratan kayari na panaral. Ompan kaukolan moy mangawit na pinabaleg iran kopya na publikasyon parad arum. Nayarin basaen iray parapo, mantepet, tan ebatan diad paraan ya kaslakan lan gagawaen tayo. Saramay malabay tan sarag day manbasa et nayarin pambasaen na parapo odino teksto. Legay panagaral, magmaliw kan mabilabilay, positibo, tan makaaro. No iyabuloy na mangaasikaso, sagpaminsan et nayarin ipabantay moy sakey ed saray video tayo ya mamabiskeg na pananisiad Biblia odino mangidadanet ed saray leksion manlapud sakey a salaysay ed Biblia. Ompan posible ya igapo tan sampotan ed simplin pikakasi so panagaral. Saray arum ya manangipalapag et manguusar ni ingen na Kingdom song.
6. Antoy nayarin gawaen mo no walay ag-onabobon?
6 Balet panon to no ag-onabobon so sakey ed abasa odino imbaga legan na panagaral? Usarey pakatebek no ebatan. (Col. 4:6) Ompan sarag moy manginabang na antikey a teksto ed Biblia nipaakar ed ibabaga to. No aliwan praktikal a gawaen itan, mas maabig no dengel kad ibabaga to tan ibagam ya pantongtongan yon dua itan kayari panaral yo.
7. Antoy gawaen mo no walay personal a tepet na sakey odino mangipanengneng na interes?
7 No maminsan, ompan walay mantepet odino mangibagan labay to ni makaaral a maong. Oniay iyeebat na sakey a sister: “Balibali ’tan ya tepet. Balet lapud personal ya tepet yo itan, sumpalen ti ni yay babasaen tayo. Insan pantongtongan tayon dua ’tan naani.” Kaslakan et posible so pangikondukta na panagaral na Biblia ed saramay interesado diad arum ya oras tan diad biig ya pasen.
8. Panon so pangireport ed saray panagaral bilang grupo tan saray panangiyaral na Biblia ed indibidual?
8 Kaslakan et maabig no parehon agagi so mangikondukta na kada panagaral ed sakey a pasilidad. Siopaman a manangipalapag ya mibiang et sarag ton ireport itan ya oras. No niletneg lay panagaral, sarag itan ya ireport a sakey ya RV na manangipalapag kada ikondukta to tan sakey ya Bible study kada bulan. Nayari met ya ireport iray nigapon panangiyaral na Biblia ed saramay indibidual ya sarag day makatalos tan makaaral.
9, 10. Anto ran kualidad so kaukolan parad saray mibiang ed sayan kimey? Ipaliwawa.
9 Pangitultuloy ed Satan: Maabig so pangiyeskedyul na agew tan oras na panagaral bilang grupo. Iilaloan na saray manaayam ed nursing home tan saray staff diman ya gawaen itan a regular, ya onggapo tan nasumpal ed suston oras. (Mat. 5:37) Kanian, kaukolan ya matoor, makuli, tan organisado itayo. Apaneknekan lan maabig no duaran kualipikadon manangipalapag so mantulongan pian ikondukta so panagaral bilang grupo. (Ecl. 4:9, 10) Diad saray angkabaleg a pasilidad, mas dakel a manangipalapag so kaukolan.
10 Importante met so pangipanengneng na personal ya interes tan pagmaliw ya makaaro. (Fil. 2:4) Diad unonan ibisita, ipanaon mon kabaten so kada sakey ya onatendi ed panagaral. Amtaen tan salim ya kabisadoen iray ngaran da. No maanos tan mapangasi ka, nalikna dan welcome tan papablien ira.
11. Panon ya nipanengneng na saray mangikokonduktay panagaral so respeto ed staff tan kapamilyaan na saray manaayam ed nursing home?
11 Importante met so pangipanengneng na respeto tan kaabigan ed staff na pasilidad tan saray kapamilya na manaayam ed nursing home. No niletneg la so panagaral, mas maabig no ag-uumanen so oras odino paraan na panagaral no agni nipatanir ed mangaasikaso na nursing home. Sagpaminsan ya tepetan so mangaasikaso no antoy nibaga to ed panagaral. No ombisita iray kapamilya na saray manaayam ed nursing home legay panagaral, manggawa kay paraan pian nakabat mo ra. Ipaliwawam ed sikara so gagala na panagaral na Biblia. Ipasegurom ed sikara ya iyaansakit moy kapamilya da. Imbitaan mo ran ondengel ed panagaral.
12, 13. Mangisalaysay na saray eksperiensya na maabig a resulta na impantasi ed saray nursing home.
12 Saray Resulta: Makapaseseg so report na saray ombiabiahen manangasikaso tan saray kongregasyon nipaakar ed sayan klase na ministeryo. Singa bilang, manga 20 ya manaayam ed sakey a nursing home so inmatendi ed unonan panagaral na Biblia. Lapud saya, anemirad sikara so nampaiyaral na Biblia. Ag-abayag et abautismoan so sakey ed sikara. Diad sakey a nursing home, apakiwas so 85 años a bii ya miulop ed saray agagi ed kongregasyon tan imbaga ton labay toy manpabautismo. Nen nandesisyon so sakey a pasilidad ya bawasan iray aktibidad da tan ekalen day panagaral bilang grupo ya ikokondukta na saray Tasi nen Jehova, nanreklamo iray manaayam diman ed mangaasikasod satan! Ag-abayag, nigapo lamet so panagaral tan manga 25 anggad 30 so inmatendi.
13 Say panangaro ya ipapanengneng tayo et baleg so epekto to aliwa labat lad saray manaayam ed nursing home. Singa bilang, kaslakan ed saray membro na staff et ondedengel tan mibibiang ni ingen ed panagaral. Say pansasagpot tayon ipanengneng so personal ya interes ed saramay manaayam ed nursing home et maabig met a pantasi ed komunidad. (1 Ped. 2:12) Kayarin imbaga ed sakey ya administrator so gagala na panagaral, oniay inkuan to: “Akin et natan ki labat? Kapigan kayo onggapo?” Oniay insulat na sananey nin mangaasikaso: “Talagan irekomendak iyan panagaral diad anggan anton pasilidad na nursing-care. Libre iyan gagawaen na saray Tasi nen Jehova bilang kabiangan na panaglingkor dad komunidad.” Inikdan na sakey a nursing home ed Hawaii iray Tasi nen Jehova na Volunteer Service Award ya mangipapanengneng a sikaray “mabmablin kayamanan” parad saray manaayam ed pasilidad.
14. Akin et kaukolan tayon tulongan iramay manaayam ed saray nursing home?
14 Iimbitaan nen Jehova iray matatatken ya sikatoy idayew da. (Sal. 148:12, 13) Kaibad satan iramay manaayam ed saray nursing home. Kasin wala ray nursing home ed teritorya yo ya ditan et wala ray matatatken a nayarin napasabian na maong a balita? Diad tulong na saray elder ed kongregasyon tan saray mangaasikaso ed nursing home, sarag tayoy makapantasi ed saray manaayam ditan. No papablien tayo iray matatatken, aaligen tayoy Jehova.—Sal. 71:9, 18.