Balon Video Parad Pangigapoy Panangiyaral na Biblia

Say antikey a video ya Akin ya Aralen so Biblia? et sarag lan bantayan diad www.jw.org/pag. Denesinyo itan a video pian napakiwas iray interesadon totoo ya awaten so iyoopresi tayon libren panag-aral na Biblia. Na-access itan diad pangi-click ed “Manaral na Biblia” a walad bandad leksab na home page odino diad pan-scan ed QR (quick response) code ya walad beneg na kada sakey ed saray balon tract tayo. Nia ray pigaran paraan pian epektibo tayon nausar so video.

• No man-RV, ibagad householder: “Walay labay kon ipabantay ed sikayon antikey a video ya mangipaliwawa no panon ya naebatan iray tepet yod Biblia.” No labay to, ipabantay mod sikato so video diad cell phone o tablet mo odino diad mismon computer to.

• No mangiyopresi tayoy sakey ed saray balon tract diad publiko odino impormal ya panagpulong, ipanengneng so QR code tan pasesegen so akatongtong ya i-scan to itan ed mobile gadyet to. Diad dakel ya lenguahe et direktan ikonekta ka na QR code ed video diad Web site tayo, kanian nayarin nai-play lan tampol so video diad mobile gadyet mo.

• Ipaamtam ed saray katrabaho, kaeskuela, kakanayon, tan arum ni ran kabat mo so nipaakar ed video, tan ipabantay mo itan ed sikara. Odino ipawit mod e-mail da so link na video, tan pasesegen iran bantayan itan.

No usaren tayo iyan balon probisyon, mas dakel nin panangiyaral na Biblia so nayarin nigapo tayo, tan natulongan tayod espiritual iramay “walaan na dugan kipapasen na puso parad bilay ya andi-anggaan.”​—Gawa 13:48.