Tulongan Iramay Agni Akaparaan ya Aralen so Libron Ibabangat na Biblia

1. Kasin awaten ya tampol na amin so libron Ibabangat na Biblia? Ipaliwawa.

¹ Pian magmaliw a managdayew nen Jehova so sakey, kaukolan ya naaralan toy ibabangat na Biblia. Balet, saray arum et nanlapud aliwan Kristianon relihyon tan agda ipapasen ya Salita na Dios so Biblia. Saray arum et agbalot manisiad Dios tan agmangawat ed ibabaga na Biblia. Anto ran publikasyon so apaneknekan lan makatulong ed saramay diad gapo et agda awaten so libron Ibabangat na Biblia? Saray suhestion dia et base ed saray komento na saray manangipalapag manlapud 20 nanduruman bansa.

2. No ibaga na too ed sikatayo ya agmanisiad Dios, antoy nepeg tayon amtaen, tan akin?

² Saramay Agmanisiad Dios: No walay mangibagan sikatoy agmanisiad Dios, maabig no amtaen no akin. Kasin lapud sikatoy manisiad ebolusyon? Kasin naandi pananisia tod Dios lapud ag-inkahustisyan nagagawad mundo odino lapud katilaan na saray relihyon? Kasin sikatoy nanlapud lugar ya ibabawal so panisiad Dios? Ompan bidbiren to met ya walay Dios, balet ta agto naliknan kaukolan ton panisiaan. Naimano na dakel ya manangipalapag ya no itepet dan, “Dati lan ontan so iisipen yo?” et tampol ya ipaliwawa na too so iisipen to. Dengel ka labat tan abuloyan mon mansalita. No natalosan tayo no akin ya agmanisiad Dios, naamtaan tayo no panon so iyebat tan no anton publikasyon so iyopresi tayo.​—Uli. 18:13.

3. Panon tayon nipanengneng so respetod too tan ed saray sisiaen to?

³ Sano oneebat, manalwar ya agnalikna na too ya aatakien moy sisiaen to. Sayan suhestion et nanlapud United States: “Importantin maong ya respetoen so kanepegan na totoon mandesisyon no antoy panisiaan da. Imbes a papawayen ya sikay duga, maabig no mantepet pian mannonot iray totoo tan nawalaay sarili dan konklusyon.” Kayarin dengelen na sakey ya ombiabiahen manangasikaso so ibaga na householder, oniay mabetbet ton ibabaga antis ya onebat, “Naisip yo la kasin posible met iya?”

4. Panon tayon natulongan iray Buddhist?

⁴ Say ideyan walay Dios et balo ed dakel ya Buddhist. Labalabay ya usaren na arum a manangipalapag ed Britain so brosyur ya Lasting Peace and Happiness​—How to Find Thema no manpupulong ed sikara. Kayari sakey ya introduksion, ipaliwawa day seksion ya “Is There Really a Most High Creator?” insan amay seksion ya “A Guidebook for the Blessing of All Mankind.” Kayari to, nayari da lan ipresentay libron Ibabangat na Biblia tan ibagad householder, “Anggan agka manisiad Dios, makatulong so panaral na Biblia ta wadtan iray praktikal a giya.” Oniay imbaga na sakey a payunir diad United States ya manlilingkor ed teritoryan kawalaan na saray Chinese: “Dakel so mahilig ya manbasa ed teritorya mi. Kanian mabetbet ya abasa da lay interon publikasyon antis kamin makapawil. Balet nayarin agda natatalosan no anto tay panagaral na Biblia. Kanian labalabay kon iyopresi so brosyur ya Maong a Balita diad unonan pitongtong ko lapud mainomay iyan usaren pian nigapoy tongtongan.” Sakey a manangasikaso na sirkito ya manlilingkor ed sirkiton mansasalitay Chinese diad United States so angireport ya nayarin ipresenta so libron Ibabangat na Biblia diad unonan pitongtong. Balet, ompan mas maabig no igapo itan ed kapitulo 2, ya say tema to et nipaakar ed Biblia, imbes a diad kapitulo 1, ya nipaakar ed Dios.

5. Akin ya importante so inkaanos?

⁵ Kaukolay panaon pian natulongay sakey a nawalaay pananisia ed Dios, kanian importante so inkaanos. Nayarin diad unonan pitongtong tayo et agtampol manisia so sakey ya walay Amalsa. Balet nayarin onsabi panaon ya isipen ton ompan posible met itan, odino nayarin ibaga ton natatalosan to no akin ya ontan so sisiaen na arum.

6. Akin et wala ray ag-interesado ed Biblia?

⁶ Saramay Ag-interesado odino Agmanisiad Biblia: Mabetbet balet ya say sakey a manisian nayarin walay Dios et ag-interesado ed ibabangat na Biblia lapud agmanisia ya satan et Salita na Dios. Nayarin sikatoy manaayam ed bansan aliwan Kristiano tan iisipen ton say Biblia et parad Kakristianoan. Odino nayarin sikatoy manaayam ed ipapasen a Kristianon bansa balet ta agmasyadon interesado ed relihyon kanian agto iisipen ya makatulong so Biblia ed sikato. Panon tayon natulongan pian nawalaay interes ed Biblia tan agmanbayag et awaten toy panaral ed libron Ibabangat na Biblia?

7. Antoy mabetbet ya sankaabigan ya gawaen pian niwalay interes na totood Biblia?

⁷ Oniay insulat na branch office ed Greece: “Say sankaabigan ya gawaen pian natulongan iramay ag-interesado ed Biblia et ibukay tan ipanengneng ed sikara so karga na satan. Naimano na dakel ya manangipalapag a mas mabiskeg so pakayari na mensahe na Biblia ed puso na too nen say antokaman ya ibaga tayo. (Heb. 4:12) Apakiwas so dakel a manbasay Biblia nen anengneng da ditan so ngaran na Dios.” Insulat na branch office ed India: “Say katuaan nipaakar ed bilay tan patey et talagan makapainteres ed saray Hindu​—ontan met ed promisa na Biblia ya mundon anggapoy panangibiig base ed estado na bilay.” No nabitla iray problemad lugar da, mabetbet ya pankanawnawa itan na saray manangipalapag ya ipanengneng no antoy ibabaga na Biblia ya gawaey Panarian na Dios pian solusyonan iratan.

8. Antoy nayarin ibaga tayod saramay nadidismaya ed Biblia lapud Kakristianoan?

⁸ No nadidismayad Biblia so sakey lapud gagawaen na Kakristianoan, ipaliwawad sikato ya pinikewet na Kakristianoan iray bangat na Biblia. Oniay insulat na branch office ed India: “No maminsan, kaukolan min tulongan iray totoo a natalosan ya aliwan saray simbaan so angimatalekan ed Biblia.” Inreport da ya maslak et interesado iray Hindu ed seksion 4 na brosyur ya What Is the Purpose of Life? How Can You Find It?b a mangipapaliwawa no panon ya sinalin inimpluensyaan tan dineral na saray simbaan so Salita na Dios. Oniay ibabaga na sakey ya payunir ed Brazil ed saray nakakatongtong to: “Anto kasi no amtaen yo ni ray karga na Biblia? Dakel so totoo ya lukas so nonot dan gagawaen iya, ya agda iisipen a magmaliw la ran membro na sakey a relihyon. Seguradon nasurprisa kayod naamtaan yo.”

9. Akin ya agtayo onsusuko no diad gapo et ag-interesado so sakey ed ibabangat na Biblia?

⁹ Onnenengneng si Jehova ed puso na kada too. (1 Sam. 16:7; Uli. 21:2) Iyaasingger to iramay totoon maptek so puso rad dugan panagdayew. (Juan 6:44) Dakel ed sikara so agnin balot nibangat nipaakar ed Dios odino dagdaiset so amta rad Biblia. Lapud ministeryo tayo, naiikdan iray tsansan ‘nilaban tan nawalaan na suston pikakabat ed katuaan.’ (1 Tim. 2:4) Kanian no wala ray diad gapo et ag-interesadod Biblia, ag-itayo onsusuko! Usaren iray publikasyon pian nawalaan iray interes. Onsabi panaon, sarag tayo lanlamang ya iyalis so panagaral ed manunan uusaren tayo ed panangiyaral na Biblia, say libron Anto so Peteg ya Ibabangat na Biblia?

[Saray paimano ed leksab]

[Kahon ed pahina 4]

Salien iya no say householder et agmanisiad Biblia:

• Pantongtongan so kapitulo 17 tan 18 na libron Life​—How Did It Get Here? By Evolution or by Creation?c

• Parad saray Hindu, usaren so brosyur ya Why Should We Worship God in Love and Truth?d

• Parad saray Judio, usaren so brosyur ya Will There Ever Be a World Without War?, pahina 3-11.e

• Pantongtongan iray gunggona no unoren iray prinsipyo na Biblia. Nia ray publikasyon ya sarag yon usaren pian nipanengneng a say Biblia et makatulong ed praktikal a paraan:

Say serye ed Onliing! ya “Tulong Parad Pamilya”

Say video ya The Bible​—Its Power in Your Life

Say brosyur ya Maong a Balita a Nanlapud Dios!, leksion 9 tan 11; Libron Parad Amin a Totoo, pahina 22-26; tan A Satisfying Life​—How to Attain It, seksion 2.f

Parad saray Buddhist, usaren so brosyur ya The Pathway to Peace and Happiness, pahina 3-7.g

Parad saray Muslim, usaren so brosyur ya Real Faith​—Your Key to a Happy Life, seksion 3.h

No manpupulong kad teritorya ya agda panisiaan so Biblia, ompan mas maabig no agmo ni ipapaamta ya manlalapud Biblia iray inanabang mod sikara anggad maminpiga nin ipawil mo.

• Ipaliwawa no panon ya tinmua iray propesiya ed Biblia. Nia ray publikasyon a nayarin usaren mo:

Say video ya The Bible​—Accurate History, Reliable Prophecy

Say brosyur ya Libron Parad Amin a Totoo, pahina 27-29

• Iyalis ed libron Ibabangat na Biblia no mantepet lay katongtong tayo no anto ray ibabangat na Biblia nipaakar ed nanduruman topic.

[Saray paimano ed leksab]

[Kahon ed pahina 5]

No ibaga na householder ya: “Agak manisia ed Dios,” nayarin ibagam:

• “Labay ko komon ya ibagad sikayo no antoy angombinse ed siak ya walay Amalsa.” Insan mangibagay punto manlapud libron Reasoning, pahina 84-86, odino ibagam ed katongtong mo ya ompawil ka pian ikdan moy publikasyon ya akatulong ed sika.

• “Balet no talagan walay Dios, anto ran ugali so labay yon walad sikato?” Mabetbet ya say ebat na householder et mas napaapit irad Dios ya maaro, mahustisya, mapangasi, tan agmanangidumaduma. Ipanengneng mo diad Biblia a say Dios et walaan na ontan iran kualidad. (Nayari ni ingen ya usarey kapitulo 1 na libron Ibabangat na Biblia, ya igapod parapo 6.)

No ibaga na householder: “Agak manisia ed Biblia,” nayarin ibagam:

• “Dakel so mangibabagay ontan. Ibabaga na arum ya say Biblia et onkokontra ed siensia odino saray prinsipyo to et agla praktikal. Sikayo ey, asali yo lan binasay Biblia? [Abuloyan ya onebat. Insan ipanengneng so introduksion diad pahina 3 na brosyur ya Libron Parad Amin a Totoo, tan iyopresi itan.] Dakel so agmanisiad Biblia lapud pinikewet na relihyon iray ibabangat na satan. No ontumbok, labay kon ipanengneng ed sikayo so sakey ya alimbawa a walad pahina 4 tan 5.”

• “Ontan met so sisiaen na dakel a totoo. Balet labay kon ipanengneng ed sikayo no antoy naninteresan kod Biblia. [Basaen so Job 26:7 odino Isaias 40:22, ya mangipapanengneng ya say Biblia et susto no nipaakar ed siensia.] Nabasa met ed Biblia iray makabat a simbawa ya makatulong ed saray pamilya. Diad ipawil ko et labay kon ipanengneng ed sikayoy sakey ed satan.”

• “Salamat ta imbaga yo tan ed siak. No talagan angisulat so Dios na libro parad totoo, anto kasi karga na satan?” Insan ipanengneng ed Biblia so punton mitunosan ed imbaga to.