Onggapod Simba na Enero 6 so Panaral ed Apocalipsis—Asingger la so Engranden Kapantokan To!
1. Akin ya igapo tayo lamet ya aralen so libron Kapantokan na Apocalipsis no Enero 6, tan panon iyan ontulong ed sikatayon mansiansian aliing ed espiritual?
1 “Maliket imay manbabasan maksil tan saramay onderengel ed saray salita na sayan propesiya, tan samay manguunor ed saray nisulat ditan.” (Apo. 1:3) Idadanet na saratan a salita so kaimportantian na libron Apocalipsis, lalo la ta manbibilay itayo lad panaon a nasusumpal iray dakel ya propesiya na satan. Dugaruga sirin ya igapo tayon aralen so libron Apocalipsis—Asingger la so Engranden Kapantokan To! diad Panagaral na Kongregasyon ed Biblia ya onggapod simba na Enero 6, 2014. Inaral tayo la yan libro nen 2007 anggad 2008. Balet parad dakel a nagmaliw ya manangipalapag manlapu lad saman, natan ni labat ira makapinabang diad panaral ed kada bersikulo na Apocalipsis. Say panaral ed libron Kapantokan na Apocalipsis so ontulong ed sikatayon amin ya mansiansian aliing ed saray nagawad arapen.—Apo. 16:15.
2. Panon ya aralen iyan libro?
2 No Panon ya Aralen: Igapo na manangikondukta so panaral diad antikey ya introduksion, nayarin sakey o duaran sentence. Ag-nabasad parapo no dinan iran teksto so nepeg ya basaen, kanian legan na panaral et mamili so manangikondukta na saray tekston basaen. Nayarin mangusar na sakey o duaran tepet kayari na kada leksion bilang repaso.
3. Legan ya aaralen so libro, antoy kaukolan mon gawaen tan akin?
3 Sigpot ya Minabang: Pansagpotan moy onatendi kada simba. Sayan libro et aglabat ontulong ed sikatayon mantultuloy ya manbantay noagta ontulong met ed sikatayo iray mensahe nen Jesus ed pitoran kongregasyon ya ompaliis ed saray situasyon a nayarin mangapektad espiritualidad tayo. Manparaan ya maong anggano inaral mo la iyan libro nensaman. Antis na kada aral, basaen iray teksto diad libro na Apocalipsis ya aralen. Mankomento ka ta mangidayew iyad si Jehova, ontulong iyan natandaan moy impormasyon, tan nagunggonaan so arum ya inmatendi.—Sal. 35:18; Heb. 10:24, 25.
4. Antoy nagunggona tayod panaral ed sayan libro?
4 Say panaral ed sayan libro et makarepresko ed puso tan nonot tayo tan mamabiskeg ed talek tayo a say “guerra a nagawa ed baleg ya agew na Dios a Makapanyarin-amin” tan say balon mundo et asingger la.—Apo. 16:14; 21:4, 5.