Usaren ed Amin a Pankanawnawa
1. Iner tayo usaren so tract ya Naamtaan so Katuaan?
1 Say tract ya Kasin Labay Mon Naamtaan so Katuaan? et denisinyon ontulong pian nigapo tayoy panangiyaral na Biblia. Balet epektibo met iya pian nisibwag iray bini na katuaan. (Ecl. 11:6) Nia ray pigaran suhestion ya ontulong ed sikatayo pian nausar iya.
2. Panon tayon nausar so tract pian nigapoy tongtongan?
2 Pian Nigapoy Tongtongan: Kayari yon iyawat so tract ed unabung, ipaimano so anemiran tepet a walad arap na satan, insan yo ibaga: “Dinan ed saraya so labay yon naebatan?” Kayari ton onebat, pantongtongan so walad tract ya ebat na Biblia ed tepet na unabung tan basaen so sakey ed saray nisitas a teksto. Basaen odino sumaryoen so walad beneg a pahina tan iyopresi so libron Ibabangat na Biblia. Anggano agto awaten so libro, walad sikatoy tract, a makatulong pian ontanek ed puso to so katuaan.—Mat. 13:23.
3. No ag-itayo naarap na unabung, antoy nayari tayon gawaen?
3 No Ag-itayo Naarap na Unabung: Nayari yon ibaga: “Dakel so gagawaen yo kanian itilak ko la iyan babasaen. Wala diay anemiran tepet a maslak tayon itetepet tan wadia met so direktan ebat na Biblia ed saratan. Diad ipawil ko, pantongtongan tayo iyan babasaen.”
4. Antoy nayari tayon ibaga sano iyoopresi so tract legan a manpupulong ed karsada?
4 Sano Manpupulong ed Karsada: Nayari yon ibaga: “Kumusta kayo? Asali yo ta lan intepet so anggan sakey ed saraya? [Abuloyan ya onebat.] Nabasa yo dia so malinew tan makaligliwa iran ebat na Biblia.” No agmanaapura so katongtong yo, nayari yon ipaliwawa so sakey ed saray ebat na tract tan iyopresi so libron Ibabangat na Biblia.
5. Diad saray anggapod abung, panon tayon nausar so tract?
5 Diad Saray Anggapod Abung: Diad arum iran teritorya, mangisusuksok iray manangipalapag na babasaen ed kaabungan ya anggapoy too, ingen ta diad pasen ya agnaimano na saray ondadalan. No ontan so gagawaen na kongregasyon yo, akin ta no say itilak yo sagpaminsan et say tract ya Naamtaan so Katuaan? Sano ompawil kayo, nayari yon ibaga: “Nen linma kami dia, anggapo kayo, kanian angitilak kami na onian babasaen. Dinan ed sarayan tepet so labay yon naebatan?”
6. Akin et epektibon usaren ed panagpulong so tract ya Naamtaan so Katuaan?
6 Say tract ya Naamtaan so Katuaan et simpli tan direktan mangipaparungtal ed katuaan. Labay iya na amin, antokaman so relihyon tan kultura ra. Mainomay iyan iparungtal; sarasarag ya iyopresi iya na anggan saray kalangweran tan balon manangipalapag. Kasin uusaren yo iya ed kada matukoy a pankanawnawa?