Manparaan a Maong Sano Manbangat
1. Akin a nepeg tayon tulongan so iyaaralan a naapresya iray nanaaralan to ed Biblia?
1 Sano mangiyaaral itayo na Biblia, nepeg itayon manparaan a maong pian napakiwas tayoy iyaaralan tayo a manlingkor ed si Jehova. Epektibo iray sagpot tayo no natulongan tayoy iyaaralan a naapresya iray nanaaralan to ed Biblia. Tan saya so mamakiwas ed iyaaralan. (Deu. 6:5; Uli. 4:23; 1 Cor. 9:26) Balet panon tayon nagawaan iya?
2. Panon itayon natulongan na pikakasi a manparaan parad panangiyaral?
2 Manpikasi Sano Manpaparaan: Lapud si Jehova so mamapabaleg ed bini na katuaan ed puso na iyaaralan, ipikasi tayo so iyaaralan tan saray espisipikon pankaukolan to antis a manparaan parad pangiyaral. (1 Cor. 3:6; Sant. 1:5) Nayarin ontulong met itan a pikakasi pian naamtaan tayo no panon tayo nin natulongan so iyaaralan a nipapuso toy “kakabatan” ed linawa nen Jehova.—Col. 1:9, 10.
3. Panon tayon manparaan a sankanonot so iyaaralan?
3 Nonoten so Iyaaralan: Amta nen Jesus a kaukolan a nonoten so dumerengel pian epektibo so panagbangat. Diad amiduan inkagawa, oniay intepet ed si Jesus: “Antoy gawaen ko, pian natawir ko so bilay ya andi-anggaan?” Nandumaan so paraan na impangebat to ed sikara. (Luc. 10:25-28; 18:18-20) Kaukolan tayon nonoten so iyaaralan legan tayon manpaparaan. Dinan ed saramay nisitas a teksto so ibasa tayo ed sikato? Kaunongan karakel so isingbat tayo ed sikato? Antoran punto so mairap a talosan odino mairap ya awaten na iyaaralan? No nonoten iray posiblin itepet na iyaaralan, lalo tayon makapanparaan pian epektiboy pangebat tayo ed saratan.
4. Antoy lalanoren na maong a panagparaan?
4 Repasoen so Iyaral: Anggan aminpiga-piga tayo lan inaral so sakey a tema, natan tayo labat itan isingbat ed iyaaralan. Pian nasabi tayoy puso to, importante so maong a panagparaan kada mangiyaral. Diad ontan et nagagawaan tayo itan ya ipapaseseg tayo ed iyaaralan tayo. Repasoen so iyaral, pati saray nisitas a teksto, a sankanonot so iyaaralan, tan nayarin gulisan iray manunan punto.—Roma 2:21, 22.
5. Panon tayon naalig si Jehova?
5 Interesadon maong si Jehova ed iyaligwas na kada iyaaralan na Biblia. (2 Ped. 3:9) Nipatnag tayo met so maaron interes no mangigana tayoy panaon ed panagparaan kada mangiyaral na Biblia.