Amin so Makapibiang ed Panaggaway Balon Babangatan
1 Say balon babangatan et aliwan bunga na impansagpot na sakey labat a too. Sarag nen Jehova ya usaren so amin a “kakimeyan” to pian tulongan iray iyaaralan na Biblia ya ombulaslas ed espiritual. (1 Cor. 3:6-9) Balang sakey ed sikatayo so ontutulong ed saray balo ni, aliwan dia labat ed impapuson komento tayo diad saray pantitipon noag ontan met ed maabig a kondukta tayo, a pakapatnagan ya onkikiwas so espiritu na Dios ed kabibilay tayo. (Juan 13:35; Gal. 5:22, 23; Efe. 4:22, 23) Anto ni nagawaan pian natulongan iray balo?
2 Bilang Kongregasyon: Nipanengneng tayon amin ya interesado tayo ed saramay mimiaral la diad pangibano tan pitongtong ed sikara antis tan kayari na aral. Legan a momolimolien na sakey a laki so sankaunaan ya impilimog to ed kongregasyon, onia so inkuan to: “Diad loob labat na sanagew et mas dakel ni so akabat kon totoo a peteg a maaro, nen saray akabat ko la ed pimimisaan ko nanlapula’d inkaugaw ko. Talagan aromog koy katuaan.” Sikatoy abautismoan kalabas na pitoy bulan manlapud samay primeron impiaral to.
3 Komendaan so iyaaralan na Biblia diad iyaaligwas to ed espiritual. Kasin susungdoan to so isusumpa? Kasin regular a miaaral? Kasin akapanpakpel la pian mankomento? Kasin nampalista la ed Teokratikon Eskuelaan Parad Ministeryo odino mimila lan manpulong? Komendaan lapud iyaaligwas to. Mamaseseg tan mamabiskeg itan ed sikato.—Uli. 25:11.
4 Bilang Mangiyaaral na Biblia: Arum a manangipalapag so akatulong ed saray iyaaralan da na Biblia a nakabkabat a maong iray membro na kongregasyon diad pangitatagar da ed arum a manangipalapag ed panangiyaral. Tampol ya itagar a miaral so iyaaralan no posible. Sano miaral la, seguroen yon ikabat ed arum. Kasin pambabanikelan ton itunda so makapuy a bisyo, a singa say panagsigarilyo? Kasin walay membro na pamilya to ya onkokontra ed panaaral to? Nayarin sikatoy nagunggonaan no makapitongtong ed manangipalapag ya akaeksperiensya tan akatalona met ed ontan ya situasyon.—1 Ped. 5:9.
5 Saray balo ni so mankaukolan na espiritual a suporta na kongregasyon. Amin so makatulong ed sikaran onaligwas diad pangipatnag na masimoon a personal ya interes.