Say Libron Ibabangat na Biblia—Manunan Katulongan Tayo ed Panagaral na Biblia
1 Agaylan makapaliket so impakaimaton tayo ed inkipaway na libron Anto so Peteg ya Ibabangat na Biblia? diad “Maridios a Katutulok” a Distriton Kombension! Aliketan iray inmatendi ed impakaawat da na kopya ra diad impanampot na programa ed Sabado. Panon a nausar iyan balon katulongan ed panagbangat? Adesinyo iya bilang manunan katulongan tayo ed panagaral na Biblia. Anggaman say balon libro so diad primero et iparungtal ni bilang opresin literatura ed Marso, papasesegen iray manangipalapag ya igapo da lan usaren iyan tampol ed pangigapo tan pangikondukta na saray panangiyaral na Biblia.
2 Peles Iran Panangiyaral na Biblia: Nepeg a tebeken na saray manangipalapag a mangikokondukta na saray panangiyaral na Biblia ed libron Pikakabat odino brosyur a Kakaukolanen no panon tan no kapigan dan gapoan ya usaren so balon publikasyon legan na panagaral. No agano nin inggapo so panangiyaral, nayari yo lan gapoan so balon libro. No arawi lay kawalaan yo ed libron Pikakabat, nayari yon ituloy so panagaral diad mipetekan a kapitulo na libron Ibabangat na Biblia. No ngalngali yo la nasumpal so libron Pikakabat, nayari yon desidien a sumpalen la itan a publikasyon.
3 Seguradon dakel so kabat tayon totoo a nagunggonaan ed panaral ed libron Ibabangat na Biblia. Akin ya ag-iyopresi ed balang sakey ed sikara so panagaral na Biblia ya usaren iyan katulongan ed panagaral a sistematikon mangiprepresenta ed katuaan na Biblia? Alimbawa, saramay niyaralan la na brosyur a Kakaukolanen odino libron Pikakabat balet ta agnantultuloy anggad dedikasyon tan bautismo so nayarin malabay a paiyaralan lamet ya usaren so balon libro. Nayarin desidien na saray atateng ya usaren so libro diad pangipaslep da na suston kakabatan nipaakar ed linawa na Dios ed ananak da.—Col. 1:9, 10.
4 Panagaral ed Komaduan Libro: Wala tay probisyon a pangiyaral na komaduan libro ed iyaaralan na Biblia no asumpal lan inyaral so Anto so Peteg ya Ibabangat na Biblia? On, wala. No mapatnag ya onaaligwas so iyaaralan, anggaman matantan, tan ipapatnag toy panamabli ed nanaaralan to, nayarin ituloy so panangiyaral na Biblia ed sikato diad pangusar ed libron Dayewen so Alenleneg a Tuan Dios. Matalek kami a say libron Ibabangat na Biblia et epektibon uusaren a walad sikatayo, legan tayon susumpalen so kimey a panaggawa na babangatan.—Mat. 28:19, 20.