Mantultuloy a Salitaen so Salitay Dios Tekep na Pakpel
1 Bilang Kristianon ministros, amta tayo ya ag-awaten na amin so ipupulong tayo. (Mat. 10:14) Balet, agtayo aabuloyan so negatibon reaksion da a mangamper ed pangipupulong tayoy maong a balita. (Uli. 29:25) Antoy ontulong ed sikatayon mantultuloy a salitaen so salitay Dios tekep na pakpel?
2 Pinabli nen apostol Pablo so “karlangan na pikakabat ed Kristo Jesus.” Saya so amakiwas ed sikaton ‘masekder’ a mansalita. (Fil. 3:8; 1 Tes. 1:5) Anggaman impasen na arum a makapuy tan kakulangkulangan so impulong ton mensahe, amta to a satan so “pakayari [na] Dios ed kilalaban na balang sakey a manisia.” (Roma 1:16) Kanian anggano napapasegsegang, sikatoy nantultuloy a ‘nansalita a makmakpel’ unong ed impangi-autorisa nen Jehova.—Gawa 14:1-7; 20:18-21, 24.
3 Say Lapuan na Biskeg Tayo: Ayarian nen Pablo ya impulong so maong a balita tekep na pakpel aliwan lapud dilin biskeg to. Oniay insulat to nipaakar ed sikaran dua nen Silas: “Bangta nantepel kami nensaman, . . . ed Filipos, . . . apabayani kami [lapu] ed Dios tayo a mangisalita ed sikayo na ebanghelyo na Dios ed dakel a sumpaan.” (1 Tes. 2:2; Gawa 16:12, 37) Niarum ni, sanen apriso si Pablo ed Roma, kinerew ton sikatoy ipikasi na arum pian nitultuloy ton nipakabat so maong a balita ‘a sitetepel, unong a kanepegan ton isalita.’ (Efe. 6:18-20) Lapud nandependi si Pablo ed si Jehova ya aliwan diad dili to, nitultuloy ton sinalita so salitay Dios tekep na pakpel.—2 Cor. 4:7; Fil. 4:13.
4 Tua met itan natan. Walay sakey ya agin laki a naiirapan a mangipaamta ed saray katrabahoan to a sikatoy sakey a Tasi nen Jehova, kanian impikasi to itan tan inggapo toy mantasi ya impormal. Diad primero, impulisay na sakey a katrabahoan to so impansagpot to, balet sanen arengelan na satan so ilalon kioli, nanresulta itan ed panangiyaral na Biblia. Manlapu la’d saman aanamoten la na agi so amin a pankanawnawa pian mantasi. Diad sinmublay a nantrabahoan to, 34 a katrabahoan to so atulongan ton manpabautismo diad loob na 14 a taon. Makapankompiyansa itayo a pabiskegen itayo met nen Jehova a mantultuloy a ‘salitaen a sipapakpel so salita to.’—Gawa 4:29.