Pakiwasen Itayo na Pananisia Tayo a Manggawa na Maabig
1 Pananisia so amakiwas ed si Noe, Moises, tan Rahab. Impaalagey nen Noe so biong. Inkaindan nen Moises iray temporaryon inawa ed bilay diad palasyo nen Faraon. Inyamot nen Rahab iray tiktik tan inunor to ray bilin da, kanian niliktar so sankaabungan to. (Heb. 11:7, 24-26, 31) Antoran maabig a gawa so papakiwasen a pawalaen na pananisia tayo ed kaplesan?
2 Panagpulong: Say pananisia so mamapakiwas ed sikatayon itongtong so makapakelaw a Dios tayo tan saray intarya to parad magnayon a liket. (2 Cor. 4:13) No maminsan, nayarin masuyat itayon manpulong. Balet sano ‘ipasen tayo a naynay si Jehova ed unaan tayo,’ sikatayoy napabiskeg tan naandi so paga tayo. (Sal. 16:8) Diad ontan et dagdagen itayo na pananisia tayo ya inabang so maong a balita ed saray kanayon, kaabay, katrabahoan, kaeskuelaan, tan ed arum diad kada matukoy a kipapasen.—Roma 1:14-16.
3 Panlilimog: Say regular ya iyatendi ed miting et sananey nin maabig a gawa a manlalapu ed pananisia. Panon ya ontan? Ipapanengneng na satan a panisiaan tayon tuloy a si Jesus so kaiba tayo panamegley na masanton espiritu na Dios sano mantitipon itayo diad saray miting na Kristiano. (Mat. 18:20) Ipapatnag na satan so pilalek tayon ‘denglen so ikuan na espiritu ed saray iglesia.’ (Apoc. 3:6) Uunoren tayo so panamilin ed sikatayo lapud panamegley na pananisia tayo et natatalosan tayo a say manbabangat ed sikatayo et say Engranden Managbangat, si Jehova.—Isa. 30:20.
4 Saray Pipilien Tayo: Say sigpot ya inkakombinsido ed agnanengneng iran kapetegan so mamapakiwas ed sikatayon iyuna ed bilay tayo iray espiritual a bengatla. (Heb. 11:1) Mabetbet a lalanoren na saya so pangisakripisyo ed saray materyal. Alimbawa, sakey a matatken so ag-angawat ed atagey a posisyon ed trabaho lapud kabaliksan na satan a sikatoy agmakaatendi ed saray miting, makaarawi ed pamilya to, tan makatunda ed panagpayunir to. Komon ta sigpot a manmatalek itayo met ed panamaseguro na Biblia a si Jehova so mangitarya ed saramay “anapen [da] nin unona so panarian, tan say inkatunong to.”—Mat. 6:33.
5 Say mabiskeg ya impluensya na pananisia ed bilay tayo so peteg a naiimano na arum. On, say panisia tayo so kabkabat ed interon dalin. (Roma 1:8) Komon ta amin tayo sirin so mangipatnag a say pananisia tayo so mabilay diad panamegley na maabig iran gawa tayo.—Sant. 2:26.