Bayuboan so Pakayari Yon Manebek

¹ Say makapagonigon a kaunoran iran agew, a pambibilayan tayo la, so angitarok na pirmin desdes tan nanduruman klase na seryoso iran subok ed totoo na Dios ed inerman a pasen. (2 Tim. 3:1-5) Amin tayo so mankaukolan na panamaseseg pian ontalindeg a malet ed pananisia. (1 Cor. 16:13) Nagawaan tayo itan diad tulong nen Jehova legan ya itutultuloy tayo so pakatagano a regular ed Salita to, manilalo ed espiritu to, tan mansiansian maapit ed organisasyon to.​—Sal. 37:28; Roma 8:38, 39; Apoc. 2:10.

² Tekep na maabig a rason, say teman “Magmaliw a Nagnap ed Pakapanyari na Pakatalos” so atibukel a tema na espisyal ya agew na asamblea nen imbeneg a taon. Nibase itan ed 1 Corinto 14:20, a pakabasaan tayo ed saray salita nen apostol Pablo: “Agagi, agkayo manugaw-ugawan ed isip: anggaman ontan manugaw-ugawan kayo ed kaugsan, et matatken kayo ed isip.” Anto so nibaga yo ed programa?

³ “Agaylan makapaseseg!” “Saya so talagan nakaukolan tayo!” Saratan so duara labat ed saray naawat ya ebat. Anggan say aliwan Tasi ya inmatendi ed espisyal ya agew na asamblea pian onimaton ed pampabautismo na 12 años ya anak ton bii so angikuan a nandinayewan ton maong so programa tan naimano to no panon a makagunggona itan ed pamilya to. Kasin ontan met so nalilikna yo? Repasoen tayo pa so pigaran nipabitar ed programa.

⁴ Nakaukolan so Suston Pikakabat Pian Bayuboan so Pakayarin Manebek: Diad manangilukas a paliwawa, “Bayuboan so Pakayari na Pakatalos Yo Natan,” anto so indanet na espiker a nakaukolan pian natalonaan iray angat natan? Nagkalalo ni nen say mental ya abilidad. Nepeg tayon bayuboan tan paaralemen iray pakayari na pakatalos tayo ed Biblia, ta no andi et natalonaan itayo na amin a kaugsan a kipapaarapan tayo. Sayan pakatalos so mankaukolan na panangidirehi na Dios. Singa say salmista, nepeg a sipipikasi tayon kerewen ed si Jehova pian natalosan tayo iray ganggan tan panonot to ta pian sikatoy napanlingkoran tayo ya interon puso.​—Sal. 119:1, 2, 34.

⁵ Diad tinmumbok a parte, impabitar na manangasikaso na sirkito a si Jehova, diad panamegley na Salita tan organisasyon to, et tataryaan to itayo na “Saray Katulongan Pian Magmaliw a Nagnap ed Pakatalos ed Biblia.” Say pakatalos so naukeran bilang “say abilidad pian talosan so pamaakaran tan natebek so inkatibukel diad panebek ed pisiglaotan na saray kabiangan tan intero, diad ontan et natalosan so kabaliksan na satan.” Siopa so makatulong ed sikatayon nabayuboan iyan abilidad? Si Jehova so angitarya na saray langkap a lalaki pian ontulong ed sikatayon onaligwas ed espiritual. (Efe. 4:11, 12) Papasesegen itayo na organisasyon to a basaen so Salita na Dios ya inagew-agew tan maparanay ya onatendi ed amin a miting ed kongregasyon. (Sal. 1:2) Nababangatan itayo no panon tayon usaren so Biblia tan saray Kristianon publikasyon tayo ed personal tan pamilyan panagaral ontan met ed pamparaan parad saray miting tan lawak na serbisyo. Kasin aanamoten yo irayan amin a probisyon? Kasin pansiasiansiaen yo so regular, personal a programa na panagbasa ed Biblia? Saya so importante no labay tayon nasalimbengan ed patit na saray minumundon kurang, uso, pilosopiya, tan makapalikdo iran impluensya.​—Col. 2:6-8.

⁶ Nepeg a Nipasal so Pakayari Tayon Manebek: Diad unonan paliwawa to, ya apauloan na “Salimbengan so Espiritualidad diad Pangipasal ed Pakayari Yon Manebek,” impaliwawa na bisitan espiker a saramay kabiangan na mundo so agmakapangibiig ed duga tan aliwa. (Isa. 5:20, 21) Makasengeg iya ed agda pamibidbir tan agda panutumbok ed saray matunong ya estandarte na Dios. Diad pidumaan, sikatayo a makakaawat na espiritual a panangipasal ed organisasyon nen Jehova so mamibidbir ed saray estandarte na Dios, ya onkakanan giya ed saray aktibidad tan kondukta tayo. Diad ontan et sikatayo so walad kipapasen a paneknekan ed inkasikatayo no anto so maong tan makapaliket ed imaton nen Jehova tan no anto so mitunosan ed naspot a linawa to.​—Roma 12:2.

⁷ Pian napaliisan so awetwet a kanonotan na mundo tan say pansumpalan a mauges a bunga, nepeg tayon itultuloy ya ipasal so pakayari tayon manebek. Panon iyan nagawaan? Singa nikurit diad Hebreos 5:12-14, indanet nen apostol Pablo so pankaukolan a natagano a nagkalalo nen say basta labat “gatas” na salita. Kaukolan tayo so anawet ya espiritual a tagano, a singa say nagagamoran tayo ed panaaral tayo ed propesiya nen Isaias diad Panagaral na Kongregasyon ed Libro. Insan nepeg a mabulos tayon iyaplika ed bilay tayo iray nanaaralan tayo. No ontan so gawaen tayo, kombinsido itayo ed inkapeteg na saray prinsipyo tan estandarte nen Jehova. Saya so mangipasal ed pakayari tayon manebek pian nibiig a malinew so duga tan aliwa.

⁸ Makapaermen, arum so kinmapuy ed espiritual. Akin? Agda inyapasakey so imano ra ed no anto so maong tan maptek ed imaton nen Jehova. Bilang resulta, abiktima ira ed saray talk show ed radio tan telebisyon a susuppiaten na Kasulatan, ed mabanday a musika, odino ed mauges iran impluensya ed computer chat rooms. Diad ikiwas a makabat, napaliisan tayo so impluensya na imoral, makulangkulang, odino marelmeng a totoo.​—Uli. 13:20; Gal. 5:7; 1 Tim. 6:20, 21.

⁹ Saray Kalangweran so Nepeg a “Magmaliw ya Ugaw Nipaakar ed Kaugsan”: Say programa so walaan na duaran parte ya espesipikon amaseseg ed saray kalangweran pian bayuboan so pakayari ran manebek. Impabitar na saray espiker a say pagmaliw a ‘manugaw-ugawan ed kaugsan’ so mankabaliksan na pansiansian ag-eksperiensyado, salanti, inosente a singa ugugaw, no nipaakar ed saray bengatlan marutak ed imaton nen Jehova. (1 Cor. 14:20) Amin tayo so apaseseg a mansiansian akabantay ed no panon so pangusar tayo ed panaon tayo pian naresistian so kidunget ed amin a klase na kaugsan tan napaliisan so pakaimpluensyaan ed satan. (Efe. 5:15-17) Apaseseg itayon mangalkula no kaunongan a panaon so uusaren tayo ed panagbasa ed materyal ya agdirektan ontulong ed ibubulaslas tayo ed pakatalos ed saray espiritual a bengatla. Kasin ginawa yo itan? Anto so imparungtal na saray resulta? Niarum ed panagbasa ed Biblia ya inagew-agew, magmaliw a determinadon makapibansag ed babasaen a materyal ya itatarya na organisasyon. Say panggawa ed saya so ontulong ed sikatayon amin, pati saray kalangweran, pian ‘nagamoran so pakatalos.’​—Uli. 4:7-9.

¹⁰ “Gunggona ed Pangiyaplika ed Saray Prinsipyo Tekep na Pakatalos”: Satan so tema na pansaran paliwawa ed programa ed espisyal ya agew na asamblea. Impaliwawa na bisitan espiker a si Jehova so Lapuan na manangiter-bilay a pakatalos, a lawas superyor nen say pakatalos na amin a katooan. Isipen pa so pankanawnawan makaasol na pakatalos nen Jehova! Mabunlok ton ipapagamor itan ed saraman so masimoon a manaanap tan onkekerew ed satan tekep na pananisia. (Uli. 2:3-5, 9; 28:5) Kasin sigpot yon aanamoten so iyoopresi to?

¹¹ Apaseseg tayon aralen no panon a bidbiren iray prinsipyo legan tayon babasaen so Biblia. (2 Tim. 3:16, 17) Maalwar ya aralen iratan pian nawalaan na suston pakatalos ed ibabaga nen Jehova. Mangigana na panaon a dalepdepen irayan prinsipyo tan ipaslep iratan ed nonot tan puso yo. Saya so mangipasal ed pakayari yon manebek ta pian ontalona kayo sano manggawa na saray desisyon ed bilay. (Jos. 1:8) Usisaen tayo so pigaran situasyon a kipapaarapan na dakel tan imanoen no panon a say panangiyaplika ed saray prinsipyo na Biblia so makatulong ed sikatayon ontalona.

¹² ‘Nepeg ko kasin tumboken so sakey ya estilo na panagkawes tan panag-ayos?’ Say uso ed mundo nipaakar ed panagkawes tan panag-ayos so mabetbet a pakapatnagan na espiritu na rebelyon. Say ontan ya espiritu so mangiimpluensya ed totoo pian mankawes na malakulakob tan akulastay odino pian makaayat ed sekso. Antoran matukoy a prinsipyo na Biblia so ontulong ed sikatayon naresistian iratan a tendensia? Lapud nipasal so pakayari tayon manebek, ikonsidera tayo so prinsipyon naromog diad 1 Timoteo 2:9, 10, unong ed New World Translation, a mankawes “tekep na kasimpitan tan kalakal ed nonot . . . , ed paraan a matukoy ed [totoo a] mankuan ya ontatakot ed Dios.” Arum a prinsipyo ya onaplika so mangilaktip ed saraman so asalambit diad 2 Corinto 6:3 tan Colosas 3:18, 20.

¹³ ‘Anto so nagawaan ko pian napansiansia so mabiskeg a siglaotan na pamilyak?’ Makana so maabig a komunikasyon ed limog na saray membro na pamilya. Ibabaga ed sikatayo na Santiago 1:19: “Amin a too masiglat komon ya ondengel, mapalna ed pansalita, mairap a manpasnok.” Kaukolan na saray membro na pamilya so ontalineng ontan met ed pitongtong ed sakey tan sakey lapud say komunikasyon na pamilya et manbalesan. Anggano tua so ibaga tayo, no nibaga itan ed masebeg, mapaatagey, odino aliwan sensitibo a paraan, satan so nayarin makapasakit imbes a makatulong. Kanian balanglan asawan laki odino bii itayo, ateng odino anak, nepeg a say panagsalita tayo so “natekepan lawas na liga, alaokan na asin.”​—Col. 4:6.

¹⁴ ‘Kasin naapektaan ak na materyalismo?’ Say materyalismo so minumundon desdes a mangokomplikado ed bilay na sakey. Ag-itan ontulong ed pakadampot na sakey ed tuan liket. (Ecl. 5:10; Luc. 12:15; 1 Tim. 6:9, 10) Pian tulongan itayon napaliisan so patit na materyalismo, imbangat nen Jesus ed sikatayo iyan importantin prinsipyo: Pansiansiaen a simpli so mata. Say pambilay a balanse, aliwan komplikado so manasaglawi ed pangiyapasakey tayoy mata tayo ed intereses na Panarian, a gawaen a segundaryo labat iray amin a bengatla.​—Mat. 6:22, 23, 33.

¹⁵ No Anto so Nepeg a Gagala Tayo: Walaan itayo nanapanmatalkan a lapuan na matunong iran prinsipyo diad Salita na Dios a mangigiya ed sikatayo diad panagdesisyon. Kaukolan tayon aralen irayan prinsipyo, dalepdepen, tan talosan no panon ya iyaplika iratan ed bilay tayo. Kanian diad ‘pangipasal ed pakayari tayon manebek pian nibiig so duga tan aliwa,’ nagunggonaan tayoy inkasikatayo tan nigalang si Jehova.​—Heb. 5:14, NW.