Say Biblia so Makatulong ed Panamaley Yo

PANAMALEY​—parad arum, sayan salita so makapaliket a nodnonoten. Parad arum, satan so makapasakit ed liknaan. “Liknaen kon singa nisian ak la ed asawak,” so inyey-ey na sakey ya asawan bii. “Liknaen kon siak so pinaulyanan la tan naynay a begtebegtew.”

Akin ya ombebetel so aroan na duaran too a datin nansipanan a manaroan tan pablien da so sakey tan sakey? Say sakey a sengegan et kakulangan na pikakabat ed no anto so lalanoren na panangasawa. “Onloloob itayo ed estado ya anggapo so antokaman a panangipasal,” so inkuan na sakey a dyurnalista ed medisina.

Pigpigara natan so walaan na pikakabat nipaakar ed panangasawa unong ed resulta na panagaral ya inkondukta na The National Marriage Project, sakey a programa na panagsukimat na Rutgers University ed New Jersey, E.U.A. “Base ed sayan impanaral, dakel so binmaleg a walaan na atateng ya agmaliket so panamaley da odino nandiborsyo ira,” so insulat na saray direktor na sayan proyekto. “Kabkabisado ra so kipapasen na agmaliket a panamaley, balet ta agda naseguro no antoy kipapasen na maabig a panamaley. Nideskribe labat la na arum so maabig a panamaley bilang ‘kasunian na panamaley na atateng ko.’”

Kasin nipuera iray Kristiano ed saray problema ed panamaley? Andi. Diad tua et kinaukolan na arum a Kristiano nen inmunan-siglo so direktan simbawa pian ‘agda anapen so kibulos da’ ed asawa ra. (1 Corinto 7:27) Malinew, dinanman a panamaley na duaran ag-ayadyarin too so nawalaan na saray problema, balet walay makatulong ed sikatayo. Napaaligwas na saray sanasawa so relasyon da diad pangiyaplika ed saray prinsipyo ed Biblia.

Tua, say Biblia so aliwa a manual parad panamaley. Balet, lapud impuyan itan na Sakey ya angigapo ed panangasawa, nailaloan tayo a makatulong iray prinsipyo na satan. Oniay inkuan nen Jehova a Dios panamegley nen propeta Isaias: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon. O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.”​—Isaias 48:17, 18.

Kasin ombebetel met la so datin aroan yon sanasawa? Kasin liknaen yo a nidunget kayo ed panamaley ya andiay aroan? Oniay inkuan na sakey ya asawan bii a 26 taon lan akikasamento: “Mairap ya ideskribe so naliliknan ot-ot ed sayan klase na panamaley. Tuloytuloy tan ag-itan naandi.” Imbes ya onsuko kayo la ed agmakapnek a panamaley, akin ta no desidien yoy manggawa na bengatlan nipaakar ed satan? Ipaliwawa na ontumbok ya artikulo ed saray sanasawa no panon a makatulong iray prinsipyo ed Biblia diad sakey ya espesipikon aspekto, salanti, say determinasyon tan pilalek a napansiansia so panamaley.