Kasin Nawalaan so Bilay mo na Babaleg a Kabaliksan?
SAY tuan balor so aglawas napatnagan ed walan kantidad na satan. Say sankabalegan a bank note ya impaway diad Estados Unidos et walaan na kantidad a $10,000. Ingen, say papel ya angi-imprintaan ed satan et manbili labat na melag.
Naumameng mo ta la no kasin saray piraso na papel a manbili labat na melag a kantidad so makapangiter na peteg a kabaliksan ed bilay mo? Isipen na dakel a totoo a makapangiter iratan na peteg a kabaliksan ed bilay. Dakerakel so mantratrabahon labi-agew pian baleg so naalmo ran kuarta anggad nayarian da. No maminsan say pangegemtan ed kuarta et kabaliksan toy pangisakripisyo na bunigas, kakaaro, tan anggan say pamilya ra. Diad anton gungguna? Kasin say kuarta—odino say nasaliw na satan—so makapangitarok na peteg tan magnayon a kapenek?
Unong ed saray managsukimat, diad lalon pampilalek tayon napenek ed materyal a kaykayarian, lalon agtayo naromog so inkapnek. Onia so inkuan na dyurnalista a si Alfie Kohn a say “kapenek so agnasaliw. . . . Saray totoo ya ipapasen dan manunaan ed bilay so kayamanan et posiblin makaeksperiensia na nikaduman laknab na kapagaan tan depresyon ontan met ed pirmin pakaapektaan.”—International Herald Tribune.
Anggaman nayarin namoria na saray managsukimat a say makabaliksan a bilay et mankakaukolan na bengatlan nilikud ed kuarta, duma so iisipen na dakel a totoo. Agla pankelawan iya, ta saramay manaayam ed Mamasagur a daldalin so nayarin natatatek la na anggad 3,000 a patalastas ed sanagew. Balanglan patalastas iya nipaakar ed saray kotsi odino kendi, say getma et: ‘Saliw mo iyan produkto, et lalo kan manliket.’
Antoy resulta na sarayan agmanundan panangilagyat ed kaimportantian na materyal? Agayla, mabetbet a nibabaliwala so kaimportantian na espiritual a bengatla! Unong ed report na magasin a Newsweek, say arsobispo na Cologne, Alemanya, so agano nin angiyabawag a “diad sosyedad tayo, agla pantotongtongan so Dios.”
Nayari pa lagin intalagam lan amin lawari so biskeg mo diad panag-anap na pambilay. Nayarin ipasen mon ngalngali anggapo lay panaon mon manggawa na arum nin bengatla. Balet, tunggal paminsan et nayarin naliknam a wala so nagkalalo ni ed bilay nen say tuloytuloy tan apasakey a rotina anggad sano naamper ka la lapud bunigas mo odino edad mo.
Kasin say nagkalalo a pangimano ed espiritual iran pamaakaran et makapangitarok ed sika na nagkalalon kapenek? Antoy makapangiter ed bilay mo na babaleg a kabaliksan?