Manalwar ed Saray Managludlurey!

Natan, kasmak iray prediksion, tan say negosyon futurology (panagaral nipaakar ed arapen base’d saray nagagawa natan) so onaadilanta. “Legan a manasingger so taon 2000,” inkuan na The Daily Telegraph na London, “walay bengatlan nikaduman nagagawa ingen ta medyo inilaloan. Nilibon totoo ed sankamundoan so manasagmak na nikadkaduma tan mabetbet a makapakebbiew iran imahinasyon ed arapen.” Parad dakel a manag-obserba sayan pirmin interes ed arapen et kauulit labat na apalabas ya inilaloan iran pananguman ya ag-agawa.

LEGAN ya ompapalaloy trapikoy karomata nen koma-19 siglo, pinalbengan na sakey a too a saray syudad ed Europa so diad kaunoran et napanoy tai kabayo. Siempre, apaneknekan a palso so prediksion to. Kanian, sanen idadanet so kabetbet na isasaew na saray prediksion, onia so inkuan na The Times na London: “Say arapen et sakey labat a bunton na tai kabayo.”

Luludlureyen na arum iramay makakanengneng na kapeligroan ed arapen. Alimbawa, inangat na propesor ed panagnegosyo diad sakey ya unibersidad na E.U. iramay mangipapasakbay na kadederal na kaliberliber a mipustaan no kasin onloor ni kipapasen. Unong a nireport diad magasin a New Scientist, ibabaga ton say “kualidad na bilay tayo et onaaligwas tan mantultuloy ni ed ag-ageteran a panaon.”

Anggaman ed pakawewetwet ed saray ibabaga tan sumlang ed ibabaga, panisiaan na dakel ya amin a bengatla so mansiansian agtalaga nauman. Diad panluludlurey ed antokaman a kanonotan a walay madibinon isasalet ed saray pakurang na too, nipapanengneng day awawey a miulibay ed saray managludlurey nen inmunan siglo K.P.

Kasin Pareho Met Nin Amin so Bengatla?

Onia so impasakbay na komaduan apuyanan a sulat na Kristianon apostol Pedro, a nisulat nen ngalngali 64 K.P.: “Dia ed kaunoran ya agew onsabi so saray managlurey a pati panaglurey, a manakar ira’d dilin lawan da.”​—2 Pedro 3:3.

Panggugunaetan na saray managludlurey ya ompatnag a makapalpalek so puntirya na panaglurey da. Say toon onsuko ed panagludlurey so napelag ed sinisiblet a patit lapud mabetbet a say pilalek na managludlurey et awaten na saramay ondedengel so punto de bista to. Anganko et pigara ed saray managludlurey ya impasakbay nen Pedro et singara onia, “manakar ira’d dilin lawan da.” Diad pamapaalerto ed saray managbasa to, inusar na apostol so empatikon porma na balikas. Impasakbay toy isabi na “saray managlurey a pati panaglurey [da].”

Saraman ya inmunan-siglon managludlurey so anuppiat ed inkapeteg na “sipan a kiwawala” nen Kristo, a nankuan: “Iner so kawalaan na sipan ed idateng [“kiwawala,” NW] to? Ta nanlapu la ed saman so agew ya inkaplag da’d ugip na atateng, ganagana a bengatla, ontutuloy a singa nen gapo na inkapalsa.” (2 Pedro 3:4) Pinmatnag ya ontan ed sikara. Ingen, nen taon 33 K.P., impasakbay nen Jesus so desyang na syudad na Jerusalem. “Onsabi so saray agew ed sika,” inyabawag to, “sano saray kabusol mo liktuben da ka, naani na kuta, tan liktuben da ka, tan ed amin a pasen aposan da ka, et igeba ra ka ed dalin, tan saray anak mo dia ed dalem mo; et agda naani paulyan ed sika so sakey a bato ed tapew na sakey.” Agaylan alingo iraman a nanludlurey ed satan a pasakbay! Nen 70 K.P., niliktub na saray armada na Roma so Jerusalem tan dineral so syudad, tekep na malaknab ya inkaandi na bilay na manaayam to. Akin a say karaklan a manaayam ed syudad et ag-akaparaan ed sayan desyang? Lapud agda atebek a sinuri ira na Dios panamegley na Anak to, si Jesus.​—Lucas 19:43, 44.

Tinukoy nen apostol Pedro so arapen ya isasalet na Makapanyarin-amin a Dios. “Say agew na Katawan [“Jehova,” NW] onsabi a singa matakew,” so impasakbay nen Pedro. (2 Pedro 3:10) Diad satan a panaon et ekalen na Dios iray agmaridios manlapud sankagloboan tan itilak iramay naukom a matunong. Singa mabetbet ya ipapaliwawa na sayan dyurnal, say “kiwawala” nen Kristo Jesus et ginmapo nen 1914. Balet say ikiwas to bilang Manangipaakseb na Dios a mangekal ed karelmengan et diad arapen ni. Lapud satan et say pasakbay na apostol a manalwar ed saray managludlurey so onaaplika natan tekep na babaleg ya inkaganatan.

Nayarin abayag mo lan aalagaren so madibinon isasalet ed saray pakurang na too. Anto so ontulong ed sikan mantultuloy a siaanos a manalagar ya agnapatitan na saray managludlurey? Ipangasin ituloy a basaen.

[Blurb ed pahina 4]

“Onsabi so saray agew ed sika, sano saray kabusol mo . . . liktuben da ka, tan ed amin a pasen aposan da ka, . . . et agda naani paulyan ed sika so sakey a bato ed tapew na sakey.” Agnepeg a ludlureyen itan a pasakbay. Dineral na saray armada na Roma so Jerusalem, tekep na malaknab ya inkaandi na bilay.