Siopa so Makaliktar ed “Agew nen Jehova”?

“Anton nengneng na inkatoo so nepeg yon pagmaliwan ed amin a masantos a panagbilay tan kasimpitan, dia ed panalagar tan pampilalek yo ed isabi agew na Katawan [Jehova, NW]!”​—2 PEDRO 3:11, 12.

1. Siopa so mankikimey a walaan na espiritu tan pakayari nen Elias?

MANLAPUD katooan a pinili nen Jehova a Dios iray indibidual a magmaliw a nakaiban manawir na Anak to, si Jesu-Kristo, diad mangatatawen a Panarian. (Roma 8:16, 17) Legan a wala nira ed dalin, saray alanaan a Kristianos so mankikimey a walaay espiritu tan pakayari nen Elias. (Lucas 1:17) Diad akadkaunan artikulo, naimano tayoray panpareho ed aktibidades da tan ed saramay kinen propeta Elias. Balet komusta so kimey na kasublayan nen Elias, si propetan Eliseo?​—1 Arari 19:15, 16.

2. (a) Anto so unor a milagro nen Elias, tan say inmunan ginawa nen Eliseo? (b) Anto so paneknek a si Elias so agsinmegep ed tawen?

² Say unor a milagron ginawa nen Elias et samay impamelsay ed danum na Ilog Jordan diad impangipaspas to ed opisyal ya aysing to. Lapud saya et akabeltang si Elias tan Eliseo ed amagan dalin. Legan na panaakar da ed bandad bukig a gilig na ilog, si Elias so intekkiab na alimbosabos ya amaarap ed sananey a lugar ed say dalin. (Nengnengen so kahon ed pahina 15 ya apauloan na “Iner a Katawenan so Sinegepan nen Elias?”) Atilak so opisyal ya aysing nen Elias. Sanen inusar itan nen Eliseo ya impamaspas ed Jordan, abelsay lamet so danum to, ya amakayari ed sikaton makapawil ed amagan dalin. Pinalinew na sayan milagro a si Eliseo so nagmaliw a kasublayan nen Elias diad panangiyalibansa na tuan panagdayew diad Israel.​—2 Arari 2:6-15.

Makana Iray Maridios a Kualidad

3. Anto so imbaga di Pablo tan Pedro nipaakar ed kiwawala nen Jesus tan ed “agew nen Jehova”?

³ Pigaran siglo lay linmabas kayari panaon di Elias tan Eliseo, insiglaot di apostol Pablo tan Pedro so onsabin “agew nen Jehova” ed kiwawala nen Jesu-Kristo tan arapen nin ‘balon katawenan tan sakey a balon dalin.’ (2 Tesalonica 2:1, 2; 2 Pedro 3:10-13) Pian naliktaray baleg ya agew nen Jehova​—sano deralen na Dios iray kabusol to tan isalbay totoo to​—nepeg tayon anapen si Jehova tan ipanengneng so kauyamoan tan inkatunong. (Sofonias 2:1-3) Balet nipabitar ni pigaran kualidades legan a konsideraen tayoray agawa nipaakar ed propetan Eliseo.

4. Anto so betang na seseg ed serbisyo ed si Jehova?

⁴ Makana so seseg parad serbisyo ed Dios no labay tayoy niliktar ed “agew nen Jehova.” Di Elias tan Eliseo so maseseg ed serbisyo ed si Jehova. Tekep na mipadparan seseg, say nakdaan ed alanaan a Kristianos natan so mangisasaklang na sagradon serbisyo ed si Jehova tan mangidadaulo ed panangipulong na maong a balita.a Nanlapulad kapegleyan na dekaday 1930, napapaseseg dan amin iramay mangaawat ed mensahe na Panarian tan manilalon manbilay a maando ed dalin ya idedika ray inkasikara ed si Jehova tan manpabautismo. (Marcos 8:34; 1 Pedro 3:21) Minilyon so positibon kinmiwas ed sayan panamaseseg. Dati et wala ra’d espiritual a kabilungetan tan inatey ed kasalanan, balet natan et naamtaan day katuaan na Dios, inabrasa ra so ilalon magnayon a bilay diad mangaraldalin a paraiso, tan siseseseg diad serbisyo ed si Jehova. (Salmo 37:29; Apocalipsis 21:3-5) Diad panamegley na seseg da, pikokoopera, panamarawes, tan arum niran maong a gawa, makapangitatarok ira na baleg ya inawa ed espiritual ya agagi nen Kristo a wala ni’d dalin.​—Mateo 25:31-46.

5. Akin ya ontanlan importanti so panggawa na maong a bengabengatla ed “agagi” nen Jesus, tan anton alimbawa so wala ed sikatayo ed panaon nen Eliseo?

⁵ Saramay manggagawa na maong a bengabengatla ed “agagi” nen Jesus nisesengeg ed sarayan alanaan so papatumbok to a walaay ilalon makaliktar ed “agew nen Jehova.” Abendisionan a tuloy so sakey a sanasawa diad purok na Sunem lapud inkamapangasi tan inkapamarawes da ed si Eliseo tan ed ayudante to. Andian na anak a laki iyan sanasawa, tan say laki so masiken la. Balet insipan nen Eliseo ed Sunamita a sikato so mananak na sakey a laki, tan talagan agawa iya. Sanen sayan bogtong ya anak so inatey pigaran taon ed saginonor, si Eliseo so linma ed Sunem pian paolien to. (2 Arari 4:8-17, 32-37) Agaylan mayaman a tumang so impamarawes ed si Eliseo!

6, 7. Anton alimbawa so impanengneng nen Naaman, tan anto so pisiglaotan na saya ed kiliktar ed “agew nen Jehova”?

⁶ Nakakaukolan so inkamapaabeba ta pian naawat so nibase’d-Biblian panangiwanwan manlapud “agagi” nen Kristo tekep na ilalon niliktar ed agew nen Jehova. Kaukolan a manpaabeba so akating a hepe na armadan Siriano a si Naaman pian tumbokey suhestion na sakey a kautibon Israelitan manmarmarikit tan manpatambal diad iyakar to’d Israel ya anapey Eliseo. Imbes ya ompaway ed abung to pian abetey Naaman, impaipasabi nen Eliseo iyan mensahe: “Manames ka ed Jordan a maminpito a danay, et say laman mo ompawil ed sika, tan malinis ka naani.” (2 Arari 5:10) Asakitay amor propyo nen Naaman, tan sinmyodot, balet kayari sipaabeban inyakar tan intaksaw ed Jordan ya aminpiton danay, “say laman to pinmawil a singa say laman na melag ya ugaw, et sikato so malinis nensaman.” (2 Arari 5:14) Sakbay na insempet to, pinmawil ni si Naaman ed Samaria pian pisalamatay propeta nen Jehova. Lapud determinadon agmangungguna ed materyal a paraan ed inter-Dios a pakayari, pinmaway si Eliseo pian abetey Naaman aliwan lapud awatey antokaman a regalo. Sipapaabeban imbaga nen Naaman ed Eliseo: “Say aripen mo manlapu ed natan so agmangiyapay na bagat a poolan odino bagat ed saray arum a dirios, noag dia ed Jehova.”​—2 Arari 5:17.

⁷ Diad sipapaabeban impanumbok ed Makasulatan a konseho na saray alanaan, minilyon so daakan a nabebendisionan natan. Sakey ni, lapud pangaagamil na pananisia ed dondon bagat nen Jesus, sarayan matuan impanpuso so alinisan ed espiritual a paraan. Panggagayagaan da natan so pribilihyon pakapagmamaliw a kakaaro nen Jehova a Dios tan si Jesu-Kristo. (Salmo 15:1, 2; Lucas 16:9) Tan say debosyon da ed Dios tan ed serbisyo to so natumangan diad kiliktar da manlapud maandon kadederal a ngalngali la nasagmak na mankinon, agmagbabawi iran managkasalanan diad maples ya onsasabin “agew nen Jehova.”​—Lucas 13:24; 1 Juan 1:7.

“Siopa so Wala ed Abay Ko? Siopa?”

8. (a) Saramay makaliktar ed “agew nen Jehova” so walaan na anton awawey ed panggawa na linaway Dios? (b) Anton asainmin so initer ed si Jehu? (c) Anto so agawa ed si Jezabel?

⁸ Saramay maniilalon makaliktar ed “agew nen Jehova” so nepeg met a magmaliw a desidido diad panggawa na linaway Dios. Sipapakpel ya impasakbay nen Elias so kadederal na managpatey tan managdayew ed Baal a pamilya nen Arin Ahab. (1 Arari 21:17-26) Balet, sakbay na kagawa na saya, kaukolan a kompletoen na kasublayan nen Elias a si Eliseo so agni asumpal a kimey. (1 Arari 19:15-17) Sanen asabi panaon ya inggetar nen Jehova, binilin nen Eliseo so sakey ya ayudante ya onla tan lanaan so hepe na armada a si Jehu bilang say balon ari na Israel. Kayari inyibong so larak ed ulo nen Jehu, imbaga na mensahero ed sikato: “Onia so kuan nen Jehova, a Dios na Israel, ‘Nilanaan taka ya ari ed baley nen Jehova, salanti ed Israel. Et kabilen mo so abung nen Ahab a katawan mo, pian nibales ko so dala na saray ariripen ko a propeta, tan say dala na saray amin ya ariripen nen Jehova, ed lima nen Jezabel. Ta say amin ya abung nen Ahab natawtaw.’” Say marelmeng a Reynan Jezabel so naibuntok ed saray aso tan andian na marakep a ponpon.​—2 Arari 9:1-10.

9, 10. Panon ya asumpal so salita nen Elias ed kaso nen Jezabel?

⁹ Binidbir na totoo nen Jehu so inkapeteg na inkalanaan to tan improklama ra bilang say balon ari na Israel. Desididon kinmiwas, apuradon amaarap si Jehu ed Jezreel pian igapoy pamatey to’d saray papangulo na apostasya ed panagdayew ed Baal. Say inmunan atiray pana na panamatey nen Jehu et say anak nen Ahab, si Arin Joram. Sikatoy pinmaway manlapud syudad pian tepeten no kasin sinmabi si Jehu a walaay misyon na kareenan. “Anto a deen, ed ontan kabayag a pikakalugoran nen Jezabel ya inam tan saray panagmankukulam to sikara so ontan karakel?” inyebat nen Jehu. Kamangta et say pana nen Jehu so tinmanek ed pagew nen Joram.​—2 Arari 9:22-24.

¹⁰ Papaliisan na maridios a bibii so pagmaliw a Jezabel odino siopaman a kaugali to. (Apocalipsis 2:18-23) Sanen akasabi la si Jehu ed Jezreel, nampagangana si Jezabel. Sanen tinmandag ed bintana, imbano toy Jehu tekep na kantiaw. Tinepetan nen Jehu iray ayudante to: “Siopa so wala ed abay ko? Siopa?” Tamtampol a tinmandag so duara odino taloran opisyal na korte to. Kasin sikaray walad dapag nen Jehu? “Sikato so ipelag yo!” inganggan to. Diad saman, kinmiwas iran tampol, ya imbuntok da ed bintana so mauges a Jezabel. Sikatoy ginatingatinan, anganko na saray kabayo. Sanen sinmabi iray totoo pian sikatoy iponpon da, ‘anggapoy aromog da noag say lapislapis to, tan saray sali, tan saray dakulap na saray lima to.’ Talagan dramatikon asumpal so sinalita nen Elias: “Saray aso kanen da so laman nen Jezabel”!​—2 Arari 9:30-37.

Impapuson Pananuporta ed Tuan Panagdayew

11. Siopa si Jehonadab, tan panon ton impanengneng so pananuporta to parad tuan panagdayew?

¹¹ Saramay maniilalon makaliktar ed “agew nen Jehova” tan manbilay a maando ed dalin so nepeg ya intiron puson manuporta ed tuan panagdayew. Nepeg a magmaliw iran singa si Jehonadab, odino Jonadab, sakey ya aliwan-Israelitan managdayew nen Jehova. Legan a mantultuloy si Jehu a siseseseg ed asainmin to, labay nen Jehonadab ya ipanengneng so panangabobon tan suporta to. Kanian sikatoy pinmaway pian abetey balon ari na Israel, a mamapaarap ed Samaria pian pateyey nakekeraan ed sankaabungan nen Ahab. Sanen anengneng toy Jehonadab, intepet nen Jehu: “Say pusom sikato so maptek, singa say pusok maptek ed pusom?” Say positibon kiwas nen Jehonadab so amakiwas ed si Jehu ya iyawat so lima to tan imbitaan si Jehonadab ya onlugan ed karwahen pibabakal to, a kuanto: “Mila ka ed siak, tan nengnengen mo so seseg ko nipaakar ed Jehova.” Andi-abalan inawat nen Jehonadab so pribilihyo ya ipanengneng so suporta to parad alanaan a manangipaakseb nen Jehova.​—2 Arari 10:15-17.

12. Akin a si Jehova et makanepegan ya onkerew na nikabkabiig a debosyon?

¹² Seguradon matukotukoy met so impapuson pananuporta ed tuan panagdayew, ta si Jehova so Manamalsa tan Sankatalbaan a Soberano, a makanepegan ya onkerew tan kanepegan toy nikabkabiig a debosyon tayo. Ginanggan toray Israelita: “Agka manggawa na nipaakar ed sika na pinanday a talintao, odino say kapadpara na antokaman a nengneng na wala ed tawen ed tagey, odino wala dia ed dalin ed leksab, odino wala dia ed danum ed leksab na dalin. Agka ondakmomo ed sikara, nisay manlingkor ed sikara, ta siak si Jehova a Dios mo a sakey ak a maimon [mankakaukolan na nikabkabiig a debosyon, NW] a Dios.” (Exodo 20:4, 5) Saramay maniilalon makaliktar ed “agew nen Jehova” so nepeg a mandayew ed sikato a nikabkabiig, a gagawaen itan “dia ed espiritu tan katuaan.” (Juan 4:23, 24) Nepeg iran magmaliw a mapekder ed tuan panagdayew, singa di Elias, Eliseo, tan Jehonadab.

13. No panon a say puso nen Jehonadab et walad si Jehu, siopa so mamibidbir ed Mesianikon Ari, tan panon dan ipapatnag iya?

¹³ Kayari impamagit ed sankaabungan nen Ahab, nanggawa si Arin Jehu na arum niran kundang pian ipabidbir iray managdayew nen Baal tan ekalen iyan palson relihyon ed Israel. (2 Arari 10:18-28) Natan, say mangatatawen ya Arin Jesu-Kristo so aturo lan mamatey ed kakabusol nen Jehova tan iyalangon so inkasoberano To. No panon a say puso nen Jehonadab et wala ed si Jehu, say “baleg ya ulop” na “arum a karnero” nen Jesus natan so intiron puson mamibidbir ed Kristo bilang say Mesianikon Ari tan mikokoopera ed agagi to’d espiritual dia ed dalin. (Apocalipsis 7:9, 10; Juan 10:16) Nipapatnag da iya diad pangaagamil na tuan panagdayew tan maseseg a pibibiang ed Kristianon ministeryo, a papasakbayan iray kakabusol na Dios ed manasingger lan “agew nen Jehova.”​—Mateo 10:32, 33; Roma 10:9, 10.

Asingger lay Dramatiko Iran Ebento!

14. Anto so manatalaran ed palson relihyon?

¹⁴ Kinmiwas si Jehu pian panganggaen so panagdayew ed si Baal diad Israel. Diad agew tayo, diad panamegley na Babaleg a Jehu, si Jesu-Kristo, itarok na Dios so kadederal na Babilonia a Baleg, say imperyo na palson relihyon. Agla manbayag et nanengneng tayo so kasumpalan na saray salita na anghel ed si apostol Juan: “Saray samploran saklor ya anengneng mo, tan say ayep, busolen da so balangkantis [Babilonia a Baleg], tan sikato so gawaen da a maermen tan labos-lakseb, tan kanen da so laman to, tan sikato so lablabasen dan poolan ed apuy. Ta say Dios inyan to ed saray kapusoan da so panggawa ed kinaliktan to, tan say pannononong, tan pangiter na panarian da ed ayep, angga ed agnasumpal so saray salita na Dios.” (Apocalipsis 17:16, 17; 18:2-5) Ililitrato na “samploran saklor” so militaryan politikal iran pakayari a manguuley ed dalin. Anggaman sikaray mikakalugoran natan ed espiritual ed Babilonia a Baleg, antiktikey lay panaon to. Sayan politikal ya elemento na mundo so maneral ed palson relihyon, tan ‘say atap ya ayep’​—say Nasyones Unidas​—so walaan na manunan betang ed “samploran saklor” diad paneral ed sikato.b Agaylan okasyon ed pakapangidayew ed si Jehova!​—Apocalipsis 19:1-6.

15. Anto so nagawa sano salien a deralen so mangaraldalin ya organisasyon na Dios?

¹⁵ Kayari impangataki nen Arin Jehu sumpad panagdayew ed si Baal, say maarin pamilya to so binmaling ed politikal iran kabusol na Israel. Say Arin Jesu-Kristo so mangala na mipadparan kiwas. Mansiansia iray politikal a pakayari kayari kaderal na singa-Baal a palson relihyon. Diad silong na impluensia nen Satanas a Diablo, sarayan kabusol na inkasoberano nen Jehova so palanit a mangataki diad panalin deralen met so mangaraldalin ya organisasyon na Dios. (Ezequiel 38:14-16) Balet paderal ira nen Jehova ed Arin Jesu-Kristo diad Armagedon, say “bakal na baleg ya agew na Dios, a Makapanyarin-amin,” a diad satan nakompletoy pakapangiyalangon ed inkasoberano nen Jehova.​—Apocalipsis 16:14, 16; 19:11-21; Ezequiel 38:18-23.

Panaglingkor Tekep na Seseg a Singa ed si Eliseo

16, 17. (a) Panon tayon amta a si Eliseo so maseseg ya anggad kasampotay bilay to? (b) Anto so kaukolan a gawaen tayo ed saray pana na katuaan?

¹⁶ Anggad panganggaen na “agew nen Jehova” so intiron marelmeng a sistema na bengabengatla nen Satanas, kaukolan a manpakpel tan maseseg iray ariripen na Dios a singa si Eliseo. Nilikud ed kimey to bilang ayudante nen Elias, nanlingkor a bukor si Eliseo bilang propeta nen Jehova ed loob na masulok a 50 taon! Tan maseseg si Eliseo ya anggad mismon kasampotay bilay to. Sakbay na impatey to, sikatoy binisita na apo nen Jehu a si Arin Joaz. Binagaan nen Eliseo a mangipana ed bintana. Atira na pana so puntirya to, tan kinmelyaw si Eliseo: “Pana na pananalo nen Jehova, pati say pana na pananalo ed Sirya; ta kabilen mo so saray Sirio ed Afec, angga ed naupot mo ra.” Diad kerew nen Eliseo, insan insesegkal nen Joaz so pana to ed dalin. Balet ta ginawa to itan ya agtanton maseseg, ya insegkal labat ya amitlon danay. Insan inkuan ed satan nen Eliseo, bilang resulta, si Joaz so napagamoran na taloran pambiktorya labat ed Sirya, tan ontan so agawa. (2 Arari 13:14-19, 25) Agsigpot a nigeba nen Arin Joaz iray Siryano, ‘angga’d kaupot da.’

¹⁷ Balet tekep na seseg a singa ed si Eliseo, saray alanaan a nakdaan so mantutultuloy ed pibabakal da sumpad palson relihyon. Ontan met so gagawaen na saray kaiba ran walaay mangaraldalin ya ilalo. Niarum ni, marakep parad amin a maniilalon makaliktar ed “agew nen Jehova” a nodnonoten iray maseseg a salita nen Eliseo nipaakar ed panegkal ed dalin. Alaen tayo sirin iray pana na katuaan tan siseseseg ya ipuntirya iratan​—a maminpiga​—on, anggad pangibaga nen Jehova ya akompleto lay kimey tayo ed panamegley na saratan.

18. Panon so ikiwas tayo ed saray salita ed 2 Pedro 3:11, 12?

¹⁸ Agla mabayag et panganggaen na “agew nen Jehova” so kaplesan a marelmeng a sistema na bengabengatla. Abuloyan tayo sirin so inkasikatayo a sagyaten na makatenyeg iran salita nen apostol Pedro: “Et diad inengneng a saraya ya amin a bengatla naderal ira naani,” inkelyaw nen Pedro, “anton nengneng na inkatoo so nepeg yon pagmaliwan ed amin a masantos a panagbilay tan kasimpitan, dia ed panalagar tan pampilalek yo ed isabi agew na Dios!” (2 Pedro 3:11, 12) Sano amin a kabiangan na sayan sistema et tunawen na apuy na sanok na Dios a nibalikas diad panamegley nen Jesu-Kristo, saraman labat so walaan na rekord na maptek a kondukta tan maridios a debosyon so makabatik. Say inkadalisay ed moral tan espiritual so makanakana. Ontan met ed aro ed kaparan totoo, ya ipapanengneng diad ikiwas ed saray pankaukolan da, nagkalalo la diad espiritual a dalan panamegley na Kristianon ministeryo.

19. Anto so nepeg tayon gawaen pian makaliktar ed “agew nen Jehova”?

¹⁹ Kasin saray salita tan gawam so mangipabidbir ed sika bilang sakey a matoor tan maseseg ya aripen na Dios? No ontan, naeksperiensiam so ilalo ed kililiktar ed “agew nen Jehova” a mamaarap ed insipan a balon mundo na Dios. On, naeksperiensiam so kililiktar no manggawa ka na maong ed espiritual ya agagi nen Kristo lapud sikaray papatumbok to, a singa ed samay sanasawan Sunamita a maparawes ed si Eliseo. Pian makaliktar nepeg a magmaliw ka met a singa si Naaman, a sipapaabeban angawat ed madibinon instruksion tan nagmaliw a managdayew nen Jehova. No kaliktanen mo so pambilay a maando diad mangaraldalin a paraiso, nepeg mon idemostra so impapuson suporta parad tuan panagdayew, a singa ginawa nen Jehonadab. Et sika so napibilang ed saray matoor ya ariripen nen Jehova, ya agla mabayag et makaeksperiensia ed kasumpalan na saray salita nen Jesus: “Galidia, sikayo bendito nen Amak, tawiren yoy panarian ya imparaan ed sikayo a nanlapu ed inletneg na mundo.”​—Mateo 25:34.

[Saray paimano ed leksab]

Panon Yon Ebatan?

◻ Antoray pigaran kualidad a nakakaukolan ta pian makaliktar ed “agew nen Jehova”?

◻ Anton alimbawa so impanengneng na sanasawan Sunamita ed panaon nen Eliseo?

◻ Anton leksion so naaralan tayo manlapud si Naaman?

◻ Panon tayon natumbok so alimbawa nen Jehonadab?

◻ Panon itayon naapektaan na 2 Pedro 3:11, 12?