Report na Saray Manangiyabawag na Panarian

Ilulukpos Manlapud Impluensyay Demonyo

ABAYAG lan manodomina ed bilay na minilyon a totoo so panangagamil na espiritismo. Balet ta posibli so pakalukpos! Ontan so agawa ed dakel diad kadaanan a syudad na Efeso. Unong ed salaysay na Biblia, “aliwan daiset ed saray maanito so nantipon na saray libro ra, et pinoolan da ra . . . Dia ed ontan binmaleg so salita na Katawan tan tinmalona.”​—Gawa 19:19, 20.

Ombubulaslas met so Kristianon kongregasyon natan. A singa diad kaso na Efeso, arum ed saramay nagmaliw a mananisia et datin angagamil na demonismo. Iyilustra iya na onggendan ya eksperiensian nanlapud Zimbabwe.

Si Gogo (Bai) Mthupha so bantog ed espiritistikon pakapanyari to. Walaray linma ed sikaton totoon nanlalapud arawin bansa a singa say Zambia, Botswana, tan Abalaten ya Aprika pian manpaalbolaryo. Binangatan met nen Gogo Mthupha so arum pian magmaliw a n’anga, odino managtambal na tanem. Tan no maminsan et sikatoy mantanem!

Aminsan a kabuasay Simba et si Gogo Mthupha so binisita na Tastasi nen Jehova a mankakabkaabungan. Nanggayagaan ton tuloy so impitongtong ed sikara nipaakar ed sipan na Dios a balon mundo na inkatunong, mundon bulos ed amin a marelmeng ya impluensya. Inawat toy libron Makapambilay Kayo na Ando lan Ando ed Paraiso diad Dalina tan impaiyaralan na Biblia diad abung. Kayari taloran panagaral, sikatoy lay inmatendi ed saray miting.

Diad panaaral toy Biblia, naamtaan nen Gogo Mthupha a say nikaduman pakapanyari to so manlalapud marelmeng iran espiritun pinalsa a nanrebildi’d inkasoberano nen Jehova. (2 Pedro 2:4; Judas 6) Naamtaan to met a sarayan demonyo so determinadon mamabeneg ed amin sumpad si Jehova tan ed puron panagdayew. Lapud say pambibilay to et mandidipindi’d panagmadyik na sarayan marelmeng ya espiritun pinalsa, antoy gawaen to?

Imbalikas nen Gogo Mthupha so pilalek ton ibantak so amin a galing tan espiritistikon uusaren to. Laktipen na saya so espisyal a sakbong to tan “makasalita iran saklor na kalakian a baka,” ya inusar to ed n’anga a panagtambal to. Labay nen Gogo Mthupha ya ibantak ya amin iratan ta pian sikatoy makapanlingkor ed alenleneg a tua tan mabilay a Dios, si Jehova.

Balet, pigara ed kakanayon to so kinmontra lapud sikaray susuportaan to ed pinansyal. Akikaskasi ra ed sikaton iyalis toray garegaret to ed sikara, pati say makapakelaw a pakapanyari to ta pian nituloy day makalmo. Ag-inmabobon si Gogo Mthupha.

Diad tulong na kongregasyon na Tastasi nen Jehova diman, akolekta toy taloran ankabaleg a bag na espiritistikon garegaret tan pinoolan itan ya amin. Legan ya ondadayabdab iray instruminto ton panagdayew ed demonyo, inkelyaw nen Gogo Mthupha: “Nengneng yo! Agniliktar na saklor so inkasikato.”

Asabi panaon, sigagayagan insimbolo nen Gogo Mthupha so dedikasyon to ed si Jehova diad bautismo ed danum. Antoy anapan to la natan? Manlalakoy pisipising. On, diad panamegley na pakayari na Salitay Dios, makalukpos so sakey manlapud panagdayew ed demonyo. Oniay imbaga nen Gogo Mthupha: “Agkon balot aliknay onia lan inkibulos.”

[Paimano ed leksab]