Teokratikon Administrasyon Diad Kristianon Panaon

“Unong ed apaabig to a sikato so ninonot to ed sikaton dili, . . . say panagtipon ed saray amin a bengatla ed Kristo, na saray bengatlan wala ed tawen, a singa met saray wala ed tapew na dalin.”​—EFESO 1:9, 10.

1, 2. (a) Panon ya agawa so panagtipon na “saray bengatla a wala ed tawen,” a ginmapo nen 33 K.P.? (b) Panon a nidedemostra na alanaan a Kristianos so awawey nen Moises tan Elias nanlapulad 1914?

SAYAN panagtipon na “saray bengatlan wala ed tawen” so ginmapo nen 33 K.P., sanen “say Israel na Dios” so nianak. (Galacia 6:16; Isaias 43:10; 1 Pedro 2:9, 10) Kayari na inmunan siglo K.P., tinmantan so katitipon legan a saray puron Kristiano (a tinawag nen Jesus a “trigo”) so atalonaan na apostatan “zisanas” ya intanem nen Satanas. Balet bangta manasingger lay “panaon na kasumpalan,” say tuan Israel na Dios so inmapireng lamet tan nen 1919 et aturon mangasikaso ed amin a kayarian nen Jesus.a​—Mateo 13:24-30, 36-43; 24:45-47; Daniel 12:4.

² Legan na inmunan guerra mundial, nanggawa na makapanyarin kimkimey iray alanaan a Kristiano, a singa ginawa di Moises tan Elias.b (Apocalipsis 11:5, 6) Nanlapulad 1919 et nipupulong da so maong a balita ed maramsak a mundo, a gagawaen a singa katepel nen Elias. (Mateo 24:9-14) Tan nanlapulad 1922 et niyaabawag da laray panangukom nen Jehova ed katooan, no panon ya intarok nen Moises iray bakbak na Dios ed kadaanan ya Ehipto. (Apocalipsis 15:1; 16:2-17) Say nakdaan na sarayan alanaan a Kristiano natan so pinagkasentro na sosyedad na balon mundo na Tastasi nen Jehova.

Onkikiwas a Mananguley ya Ulop

3. Antoran ebento so mangipapanengneng a say asasakbay a Kristianon kongregasyon et organisadon tuloy?

³ Nanlapulad inggapo na Kristianon kongregasyon, naorganisa iray alanaan a patumbok nen Jesus. Legan ya ondarakel so bilang na babangatan, nileletneg iray lokal a kongregasyon tan natuturo iray mamatatken. (Tito 1:5) Kayari na 33 K.P., inmakto iray 12 apostol bilang opisyal a pinagkasentron mananguley ya ulop. Bilang ontan, andi-takot dan indaulo so panagtasin kimey. (Gawa 4:33, 35, 37; 5:18, 29) Inorganisa ra so kibunog na tagano ed saray mankakaukolan, tan imbaki ra si Pedro tan Juan ed Samaria pian komustaen iray nireport ya interesado diman. (Gawa 6:1-6, 8:6-8, 14-17) Intagar nen Bernabe si Pablo ed sikara pian paneknekan a sayan datin managpasegsegang et patumbok la natan nen Jesus. (Gawa 9:27; Galacia 1:18, 19) Tan kayari impanpulong nen Pedro ed si Cornelio tan ed sankaabungan to, pinmawil ed Jerusalem pian isalaysay ed saray apostol tan arum niran agagi ed Judea no panon ya impatnag na masanton espiritu so linawa na Dios ed sayan kaso.​—Gawa 11:1-18.

4. Anton panalsalin pamatey so agawa ed si Pedro, balet panon a nisalba so bilay to?

⁴ Kabekta asabin maruksan naataki so mananguley ya ulop. Nipriso si Pedro, tan nisalba labat so bilay to lapud isasalet na anghil. (Gawa 12:3-11) Natan diad sankaunaan a pankanawnawa, nilikud ed 12 apostol et wala so inmapireng a prominentiy posisyon to’d Jerusalem. Sanen nibulos ed inkipriso si Pedro, imbaga to ed grupon nandaragup ed abung na ina nen Juan Marcos: “Ipakabat yo so saya ed Santiago [agi nen Jesus ed ina] tan ed saray agagi.”​—Gawa 12:17.

5. Panon a nauman so inkatibukel na mananguley ya ulop kayari inkamartir nen Santiago?

⁵ Sakbay na saya, kayari impanbitkel nen Judas Iscariote, say traidor ya apostol, atebek a sikatoy kaukolan a nasalatan ed “betang [to’d] sayan ministeryo” bilang apostol ed sakey ya akaiba la nen Jesus ed ministeryo to tan akatasi ed impatey tan inkioli to. Balet, sanen si Santiago, ya agi nen Juan, so pinatey, anggapo so sinmalat ed sikato bilang sakey ed 12. (Gawa 1:20-26; 12:1, 2) Imbes, say tinmumbok a Makasulatan ya impanukoy ed mananguley ya ulop et mangipapanengneng a satan so pinabaleg. Sanen linmesa so suppiatan no kasin saray Hentil a manutumbok ed Jesus so manpasakop ed Mosaikon Ganggan, satan so nipaarap ed “saray apostol tan ed saray mamasiken [a walad Jerusalem]” parad desisyon. (Gawa 15:2, 6, 20, 22, 23; 16:4) Akin a “saray mamasiken” natan et mabitabitar a kabiangay mananguley ya ulop? Ag-ibabaga itan na Biblia, balet wala so napatnagan a gungguna. Say impatey nen Santiago tan say inkipriso nen Pedro so angipanengneng ya onsabi agew et saray apostol so nipriso odino napapatey. Diad ontan a posibilidad, say presensia na arum niran kualipikadon mamatatken, ya eksperiensiado ed saray totontonen na mananguley ya ulop et mamaseguro ed tuloytuloy ya uksoy ed panangasikaso.

6. Panon a nantultuloy a kinmurang so mananguley ya ulop diad Jerusalem, anggano saray orihinal a membro to et andi la’d saman a syudad?

⁶ Sanen sinmabi si Pablo ed Jerusalem ed ngalngali taon 56 K.P., sikatoy nanreport ed si Santiago tan, kuan na Biblia, “saray mamasiken wadman ira.” (Gawa 21:18) Akin ya ag-asalambit iray apostol ed sayan pantitipon? Lamet, ag-ibabaga na Biblia. Balet say manag-awaran a si Eusebius so angireport ed saginonor a diad sakbay na 66 K.P., “saray nakekeraan ya apostol, a naynay a mamepeligro ed saray pakanan pamatey, so apataynan ed Judea. Balet pian nibangat day mensahe ra sikaray nambiahi ed ngalngali amin a dalin diad pakayari nen Kristo.” (Eusebius, Book III, V, v. 2) Tua, saray salita nen Eusebius so agkabiangan na impuyan a rekord, balet ta saratan so mitunosan ed ibabaga na rekord. Alimbawa, nen 62 K.P., wala’d Babilonia si Pedro​—ya arawi ed Jerusalem. (1 Pedro 5:13) Balet, nen 56 K.P., tan anganko anggad 66 K.P., mabitar ya aktibo so mananguley ya ulop ed Jerusalem.

Administrasyon diad Modernon Panaon

7. Diad pangikompara ed mananguley ya ulop nen inmunan siglo, anton mapatpatnag a pandumaan natan so walad inkatibukel na Mananguley ya Ulop?

⁷ Nanlapud 33 K.P. ya anggad kairapan ed Jerusalem, mabitar a say mananguley ya ulop et tugyopen na Judion Kristianos. Legan na imbisita to nen 56 K.P., abalitaan nen Pablo a dakel a Judion Kristianos diad Jerusalem, anggaman ‘mangaagamil iray pananisia ed Katawan tayo a Jesu-Kristo’ et siansian ‘mapilit niran manumpal ed [Mosaikon] ganggan.’c (Santiago 2:1; Gawa 21:20-25) Nayarin nairapan iratan a Judio a panisiaan so kimembro na sakey a Hentil ed mananguley ya ulop. Anggaman kuan, diad modernon panaon et wala so sakey nin pananguman ed katugyop na sayan ulop. Natan et tugyop itan na alanaan iran Hentil a Kristiano, tan daakan a binindisionan nen Jehova so panangasikaso ra.​—Efeso 2:11-15.

8, 9. Antoran aligwas so nagagawa ed Mananguley ya Ulop diad modernon panaon?

⁸ Nanlapulad inka-inkorpora na Watch Tower Bible and Tract Society of Pennsylvania nen 1884 ya anggad 1972, baleg so autoridad na presidenti na Sosyedad diad organisasyon nen Jehova, bangta say Mananguley ya Ulop so maapapit a nisisiglaot ed saray board of director na Sosyedad. Saray nangayagaan dan bendisyon ed saraman a panaon so mamaneknek ya aabobonan nen Jehova iman ya uksoyan. Diad baetan na 1972 tan 1975, dinmakel so membro na Mananguley ya Ulop ed 18. Say uksoyan so lalon inmapit ed padron nen inmunan-siglo sanen babaleg ya autoridad so naimatalek ed sayan naarumay bilang ya ulop, ya arum ed sikara et direktor na Watch Tower Bible and Tract Society of Pennsylvania.

⁹ Nanlapulad 1975 pigara ed sarayan 18 sinansakey so akasumpal la’d mangaraldalin a kurso ra. Tinalo ra so mundo tan ‘akiyurong ed [Jesus] dia ed trono to.’ (Apocalipsis 3:21) Nisesengeg ed saya tan ed arum niran rason, say Mananguley ya Ulop natan et walaay samploran membro, pati ed samay niarum nen 1994. Maslak ed sikara so mamasiken la. Balet, sarayan alanaan ya agagi so naiikdan na maabig a pananuporta legan a susumpalen daray ambelat a susumpalen da. Panlalapuan na satan a suporta? Say inengneng ed modernon iyaaligwas ed limog na totoo na Dios so mangebat ed satan a tepet.

Suporta Parad Israel na Dios

10. Siopa so akiulop ed saray alanaan ed serbisyo nen Jehova diad sarayan kaunoran ya agew, tan panon iyan nipropesiya?

¹⁰ Nen 1884 ngalngali amin ed saramay mililimog ed Israel na Dios so alanaan a Kristianos. Balet, kalkalna, sananey a grupo so inmapireng, tan nen 1935 sayan grupo so abidbir bilang say “baleg ya ulop” na Apocalipsis kapitulo 7. Lapud walaan na mangaraldalin ya ilalo, saraya so mangirerepresinta ed “saray wala a bengatla ed dalin” a gagala nen Jehova a tugyopen ed Kristo. (Efeso 1:10) Irerepresinta ra so “arum a karnero” ed parabolo nen Jesus nipaakar ed saray kasimpukokan. (Juan 10:16) Nanlapulad 1935, dinmagsa so arum a karnero ed organisasyon nen Jehova. Sikaray “ontikkiab a singa lurem, tan singa ra malapati ed saray dorongawen da.” (Isaias 60:8) Lapud idaraak na baleg ya ulop tan idaraiset na alanaan a klase legan a dakel so makakasumpal ed mangaraldalin a kurso ra diad ipapatey, napapabtangan so kualipikadon arum a karnero na apadaak a betang ed Kristianon aktibidades. Diad antoran dalan?

11. Antoran pribilihyo, a diad inmuna et limitado labat ed alanaan a Kristianos, so niiter ed arum a karnero?

¹¹ Say panangiyabawag ed saray karlangan nen Jehova ed daldalin so lawas espisyal ya obligasyon na “masantos a nasyon” na Dios. Sinaglawi itan nen Pablo bilang bagat ed templo, tan saramay kabiangay “peteg ya inkasaserdote,” ya initer nen Jesus so ganggan ya ipulong tan ibangat itan. (Exodo 19:5, 6; 1 Pedro 2:4, 9; Mateo 24:14; 28:19, 20; Hebreos 13:15, 16) Anggaman kuan, nagkalalo lan ipapaseseg na Agosto 1, 1932, paway na The Watchtower iramay iyaalagey day Jonadab a mibiang ed sayan aktibidad. On, gagawaen la itan na dakel ed arum a karnero. Natan, ngalngali amin a panagpulong so gagawaen na arum a karnero bilang prominentin kabiangan na “panlingkoran da [so Dios] ed agew tan labi ed templo to.” (Apocalipsis 7:15) Mipadpara, diad bandad unaan na modernon awaran na totoo nen Jehova, saray mamatatken ed kongregasyon so alanaan a Kristianos, ‘bibitewen’ diad nikawanan a lima nen Jesu-Kristo. (Apocalipsis 1:16, 20) Balet inyabawag na Mayo 1, 1937, a paway na The Watchtower a saray kualipikadon arum a karnero so nayarin magmaliw a company servants (manangimaton iran manangasikaso). Anggano wala niray alanaan a lalaki, nausar iray arum a karnero no agla nasakbat na saray alanaan a lalaki iyan responsabilidad. Natan et ngalngali amin ed mamatatken na kongregasyon so arum a karnero.

12. Antoran akauna lan agawa unong ed Kasulatan so wala parad kualipikadon arum a karneron mangaawat na ambelat a tuloy iran responsabilidad ed organisasyon?

¹² Lingo ta so pangipabtang ed saratan ya ambelat a responsabilidad ed arum a karnero? Andi, tutumboken to labat so inmuna lan agawa ed awaran. Arum a sankailin proselitas (sankailin residenti) so walaan na atagey iran posisyon ed kadaanan ya Israel. (2 Samuel 23:37, 39; Jeremias 38:7-9) Kayari inkadakep ed Babilonia, apabtangan iray kualipikadon Netineo (aliwan-Israelitan ariripen ed templo) na saray pribilihyo ed serbisyo’d templo a datiratin parad saray Levita labat. (Esdras 8:15-20; Nehemias 7:60) Niarum ni, si Moises, ya anengneng ed transpigurasyon a pasingawey a kaibay Jesus, so angawat ed maabig a konseho nen Midianitan Jethro. Saginonor, impaigiya ira ed ilalak nen Jehthro a Hobab ed kalawakan.​—Exodo 18:5, 17-24; Numeros 10:29.

13. Diad sipapaabeban pangimamatalek na responsabilidad ed kualipikadon arum a karnero, siopa so maabig a panuliranan ya aaligen na saray alanaan?

¹³ Diad pansamposampot na 40 taon diad kalawakan, si Moises, diad impakaamtan agmakaloob ed Insipan a Dalin, so nampikasi’d Jehova a mangiter na kasublayan to. (Numeros 27:15-17) Imbaga ed sikato nen Jehova a turoen toy Josue ed arap na amin a totoo, tan onman so ginawa nen Moises, anggaman sikato so mabiskeg ni’d saman ed pisikal tan agto nin tampol tinmundan nilingkoran so Israel. (Deuteronomio 3:28; 34:5-7, 9) Tekep na mipadparan inkamapaabeba, inanatnat la na saray alanaan so dakel a pribilihyo ed saray kualipikadon lalaki ed limog na karnero.

14. Antoran propesiya so mangituturo ed ombabaleg a betang na arum a karnero ed organisasyon?

¹⁴ Say ombubulaslas a betang na arum a karnero ed organisasyon so nisisiglaot met ed propesiya. Impasakbay nen Zacarias a saray aliwan-Israelitan Filisteo so magmaliw a “singa sakey ya uloen ed Juda.” (Zacarias 9:6, 7) Saray uloen so hepe ed tribu, ibabaga sirin nen Zacarias a say datin kalaban na Israel so mangadapta na tuan panagdayew tan magmaliw a singa hepe na tribu na Insipan a Dalin. Niarum ni, sanen mitotongtong ed Israel na Dios, inkuan nen Jehova: “Saray sankaili manalagey ira naani tan pakanen da naani so saray ay-ayep yo, et saray sankaili magmaliw ira naani a panbakaen yo tan mangimaton ed kaubasan yo. Balet sikayo ningaran kayo naani a saserdote nen Jehova; saray totoo tawagen da kayo naani na katangbayan na Dios tayo.” (Isaias 61:5, 6) “Saray sankaili” tan “saray taga biek-taew” so arum a karnero. Saraya so apabtangan na responsabilidades ta pian dakel so nasakbat da legan a saray ontatatken ya alanaan a nakdaan et nasumpal day mangaraldalin a kurso ra tan makapanserbi ed sigpot a pantalos bilang mangatatawen iran “saserdote nen Jehova,” ya akapaliber ed marlang a trono nen Jehova bilang “katangbayan na Dios [tayo]”.​—1 Corinto 15:50-57; Apocalipsis 4:4, 9-11; 5:9, 10.

“Kailalakan . . . [ya] Onsabi”

15. Diad sayan panaon na anggaan, dinan a grupo na Kristianos so akasabi’d ‘inkamasiken la,’ tan dinan a grupo so mangirerepresinta ed ‘kailalakan ya onsabi’?

¹⁵ Sigugunaet a nipapasal na saray alanaan a nakdaan so arum a karnero parad apadaak a responsabilidades. Kuan na Salmo 71:18: “Natan met nen masiken ak la tan ubanen la so ulok, O Dios, agmo ak ikaindan, angga ed nipanengneng ko so biskeg mo ed onsublay a kailalakan, tan say pangipanengneng ko na pakayarim ed balang sakey ya onsabi.” Diad pangokomento ed sayan bersikulo, say Disyembre 15, 1948, a Watchtower et indanet ton say kongregasyon na alanaan a Kristianos so talagan mamasiken la ra. Intuloy to nin inkuan a saray nakdaan et sililiket a “maniilalo diad liwawa na propesiyay Biblia tan nanengneng so balon kailalakan.” Nagkalautlan siopa so tutukoyen na saya? Inkuan na Say Panag-Bantayan: “Sinaglawi ira nen Jesus bilang say ‘arum a karnero to.’” ‘Say kailalakan ya onsabi’ so manutukoy ed totoon manbilay ed silong na balon mangaraldalin ya administrasyon ya uleyan na Panarian ed katawenan.

16. Diad antoran bendisyon so sigugunaet ya iilaloan na saramay ‘kailalakan ya onsabi’?

¹⁶ Ag-ispisipikon ibabaga na Biblia no kapigan a taynan na amin ya alanaan a Kristianos so agagi ra ed sayan ‘kailalakan ya onsabi’ tan ontuloy lan niglorian kaibay Jesu-Kristo. Balet sarayan alanaan so matalek a say panaon na saya et manasingger la. Saray nipasakbay ya ebento ed baleg a propesiya nen Jesus nipaakar ed “panaon na kasumpalan” so onsasabin onlabas nanlapulad 1914, a mangipapanengneng a say kadederal na sayan mundo so asingger la. (Daniel 12:4; Mateo 24:3-14; Marcos 13:4-20; Lucas 21:7-24) Agmabayag, ilukas nen Jehova so balon mundo a ‘say kailalakan ya onsabi’ et ‘manawir ed panarian [say mangaraldalin a pasen] a niparaan ed sikara nanlapud inkiletneg na mundo.’ (Mateo 25:34) Maliket dan iilaloan so kipawil na Paraiso tan kikioli na minilyon ya inaatey manlapud Hades. (Apocalipsis 20:13) Kasin saray alanaan et wadtan ira a mangabrasa ed sarayan apaoli? Sani nen 1925, say Mayo 1 a Watch Tower et kuanto: “Agtayo mapeget ya ibabagan say Dios et gawaen odino agto gawaen. . . . [Balet] nipapalikas ed sikatayo a saray membro na Iglesia [alanaan a Kristianos] so nigloria sakbay na kioli na saray manepeg ed inmuna [matoor a tastasi sakbay na panaoy Kristiano].” Diad pangisisingbat met no kasin arum ed saray alanaan so wadtan lan mangabrasa ed saray apaoli, oniay kuan na Setyembre 1, 1989 a Watchtower: “Agla kaukolan iya.”d

17. Antoran makapakelkelaw a pribilihyo so pibiangan na saray alanaan bilang grupo ed nitronon Ari, si Jesu-Kristo?

¹⁷ Tua, agtayo amta no antoy nagawa ed kipapasen na kada alanaan a Kristiano. Balet say kiwawala nen Moises tan Elias a kaibay Jesus ed pasingawey a transpigurasyon so mangipapatnag a saray apaolin alanaan a Kristiano et ilaloan a kaiba nen Jesus sano onsabi la ed gloria pian “tumangan so balang sakey unong ed walna to” legan a nipaakseb tan nagawa so panangukom to. Niarum ni, nanonotan tayo ni so sipan nen Jesus a saray alanaan a Kristiano ya ‘analo’ so kaiba ton ‘uleyan [so nasyones] ed setro na balatyang’ diad Armagedon. Sano onsabi Jesus ed gloria, miyurong ira ed sikato a “mangukom ed saray labinduan kailalakan na Israel.” Kaiba si Jesus, ‘imedmer da si Satanas ed lepsag na kasalian da.’​—Mateo 16:27–17:19; 19:28; Apocalipsis 2:26, 27; 16:14, 16; Roma 16:20; Genesis 3:15; Salmo 2:9; 2 Tesalonica 1:9, 10.

18. (a) Anto so situasyon no nipaakar ed ‘katitipon na saray bengatla a wala ed tawen ed Kristo’? (b) Anto so nibaga tayo nipaakar ed ‘katitipon na saray bengatla a wala ed dalin ed Kristo’?

¹⁸ Diad pamasiansia to’d kikukurang na bengabengatla, progresibon ‘titiponen [lamet nen Jehova] iray amin a bengatla ed Kristo.’ No nipaakar ed “saray bengatla a wala ed tawen,” asingger lan nakompletoy gagala to. Say pikasakey nen Jesus ed amin a 144,00 ed tawen parad “bansal na Kordero” so asingger la. Kanian, ondarakel ya abayag laran, matatken ya agagi ed arum a karnero, a mangirerepresinta ed “saray bengatla a wala ed dalin,” so kaukolan a nipabtang ed sikara iray ambetbelat a responsabilidad bilang pananuporta ed alanaan ya agagi ra. Agaylan makapalikliket a panaon so panbibilayan tayo! Agaylan liket so pakanengneng ed kasusumpal na gagala nen Jehova! (Efeso 1:9, 10; 3:10-12; Apocalipsis 14:1; 19:7-9) Tan agaylay panggagayaga na arum a karnero a manuporta ed alanaan ya agagi ra bilang namparan grupo a saniban manlingkor bilang “sakey a pulok” ed silong na “sakey a pastol” a manpapasakop ed Ari, si Jesu-Kristo, tan diad kigloriaan na baleg a Sankatalbaan a Soberano, si Jehova a Dios!​—Juan 10:16; Filipos 2:9-11.

[Saray paimano ed leksab]

Kasin Nisalaysay Yo?

◻ Panon a say organisasyon na Dios so inmabanti nen inmunan siglo?

◻ Panon a say Mananguley ya Ulop et atibukel ed modernon awaran na Tastasi nen Jehova?

◻ Antoran Kasulatan so manguutorisa ed panangipabtang ed arum a karnero diad loob na organisasyon nen Jehova?

◻ Panon a “saray bengatla a wala ed tawen” tan “saray bengatla a wala ed dalin” et natitipon a saniba ed Kristo?

[Litrato ed pahina 16]

Anggano saray orihinal a membro to et andi la’d Jerusalem, sakey a mananguley ya ulop so nantultuloy a nipapakurang diman

[Saray litrato ed pahina 18]

Saray matatken lan alanaan a Kristiano so bendisyon ed totoo nen Jehova

C. T. Russell 1884-1916

J. F. Rutherford 1916-42

N. H. Knorr 1942-77

F. W. Franz 1977-92

M. G. Henschel 1992-