Agmo Labay a Saewen!
SAEWEN so anto? Say maples-ya-onsasabin “Mensaheros na Maridios a Kareenan” a Distriton Kombension na Tastasi nen Jehova! Diad maslak a paspasen say kombension so onggapo ed 8:30 ed kabuasan na Biernes diad sakey a programa na musika. Kayari italineng ed makapabiskeg-pananisia iran interbio legan na partin “Idedengel Manlapud Saray Maseseg a Manangiyabawag na Kareenan,” panggayagaan mo so makapaseseg a paliwawan “Anto so Kakaukolanen na Dios ed Sikatayo?”
Sakey a pabitar ed ngarem na Biernes et say makapaligsan keynote address a “Say Betang Tayo Bilang Mensaheros na Maridios a Kareenan.” Insan say partin “Pananulong ed Arum a Pian Naaralay Kakaukolanen na Dios” so mangiyopresi na saray suhestion ed panbangat ed saray balo ni. Saya so tumbokan na nipanpanaon a symposium a “Manbantay ed Akaamot Iran Patit na Panliliket.” Mansara so programa ed Biernes diad saray paliwawan “Sumpaen so Diablo—Ag-abuloyan so Laslasan” tan “Sitotoor ya Itandoro so Integridad na Salitay Dios.”
Say programa ed kabuasan na Sabado so mangidanet ed kaimportantian na panaggaway babangatan a kimey diad taloran-partin symposium a “Mensaheros a Mangitatarok na Maong a Balita na Kareenan.” Say sesyon so mansara diad saray diskurson “Maliket a Panangiter ed Loob na Organisasyon nen Jehova” tan “Bilay tan Kareenan ed Panamegley na Dedikasyon tan Bautismo,” a kayari na satan et wala so pankanawnawa a nabautismoan iray balon babangatan.
Say presentasyon ed ngarem na Sabado a “Konsideraen Iray Kanonotan nen Jehova ed Saray Pamaakaran” so mangebat ed tepetepet a ‘Kasin mibibiang iray Kristiano ed panangibiig a kimey natan?’ tan ‘Anto so panmoria na Biblia nipaakar ed capital punishment?’ Panggayagaan mo met so makapaligsay-puson duaran-partin symposium “Say Dios na Kareenan so Mangaasikaso ed Sikayo” tan nagkalalo la ed pansaran paliwawan “Gegemtanen so Maridios a Kareenan ed Bilay na Pamilya.”
Laktipen na programa ed kabuasan na Simba so taloran-partin symposium “Panamidbir ed Suston Klase na Mensaheros” tan say paliwawan “Talinengen tan Sumpalen so Salita na Dios.” Say programa ed kabuasan so mansara diad sakey a kontudo-kawes a drama a mangipabitar ed makana iran leksion manlapud salaysay na Biblia nipaakar ed si Ukom a Gideon.
Say pinal a sesyon na kombension ed ngarem na Simba so mangiparungtal ed publikon diskurso, ya apauloan na “Tuan Kareenan a Siansia!—Manlapud Anton Sengegan?” Kaunoran, say manamakiwas a paliwawan “Onabanti Bilang Mensaheros na Maridios a Kareenan” so mangisara ed kombension.
Manplano la natan pian onatendi. Pian naromog so pasen a sankaasinggeran ed ayaman mo, mitalosan diad Kingdom Hall na Tastasi nen Jehova ed pasen mo odino mansulat ed saray manangipalapag na sayan magasin. Say Disyembre 8 a paway na Awake! so mangilista ed saray address na amin a pasen na kombension ed Pilipinas.