Say Panimon so Ngalngali Aneral ed Bilay Ko

TALAGAN ginmapon inapektaan ak na imon sanen akiasawa ak ed komaduan asawak, si Mark.a Sikamin dua so kaukolan a mangasikaso ed pigaran sioman mi tan datin kaasawaan mi. No maminsan et talagan mairap so kipapasen. Kapiganman a walay komprontasyon ed loob na pamilya, singano agak pipilaan nen Mark. Aliknak la laingen ya inaro to ni datin asawa to. Imbes a pokpokay panimon ko, inabuloyan kon mangontrol itan ed bilay ko. Napapagyaw ak bektaman a wadtan so datin asawa nen Mark.

Lanang kon babantayan si Mark, ya iimanoen ni ingey direksyon na mata to. Iikdan koy kabaliksan iray nanenengneng to. No maminsan et sipaparungtal kon akusaen ya inaro to ni datin asawa to. Aminsan et sikatoy ontanlan nagogonigon ed saya a sikatoy inmalagey tan tinaynan so sakey a Kristianon asamblea. Aliknak ya akapankasalanan ak ed arap nen Jehova. Ginawak a miserable so bilay na pamilyak lapud diad kaunoran et anggan saray anak mi so naaapektoan. Kasyodot koy inkasiak lapud gagawaen ko, pero anggan panon lay gunaet ko et agko talagan nakontrol so panimon ko.

Imbes a tulongan toak, ginmapon ombawi si Mark. Sano akusaen ko, eyagan toak, “Selosa, manseselos ka lambengat.” Gagalaen to ni ingen a panselosen ak. Seguro diad padesir to et naresolbi na saya so panimon ko, balet lalon pinaloor toy kipapasen. Ginapoan toy onlinggis ed arum a bibii, komentoan no panoy kaganggana ra. Lapud saya et aliknak a siak so lalon nipaabeba tan agla kaukolan. Sinmabi’d punton linmesa ed siak so sananey nin makapasyodot a liknaan​—say panbusol. Diad saman et nagugulo ak lan tuloy a labay kon sikato tan say pamilya to so naandi la’d bilay ko.

Sano kuan na Biblia a “say siblet [imon, NW] sikato so inkabolok na saray pukel,” ontan ya ontan so liknaan ko. (Uliran 14:30) Ginmapon naapektoan lay bunigas ko. Awalaan ak na ulser ya abayag ya atambal. Intultuloy kon pinasinagem so bilay ko diad paniinap ed amin a gagawaen nen Mark. Bukaiten koray bulsa to, tan no akaromog ak na saray numeroy telepono, tawagan ko pian amtaen no siopay onebat. Nababaingan ak a tuloy ed inkasiak, onaakis ak lapud nababaingan ak ed si Jehova. Balet agko napokpokay inkasiak. Say kabusol ko et say inkasiak.

Naaapektoay espiritualidad ko anggad punto ya agko la makapanpikasi. Inarok si Jehova tan labay kon talagan gawaen no antoy susto. Kabat kon amin iray tekston nipaakar ed kaasawaan a lalaki tan bibii, balet ta agko iratan niyaaplika. Diad sankaunaan a pankanawnawa ed bilay ko, agko labay lay manbilay, anggaman diad katuaan a walaan ak na maong ya ananak.

Baleg a panamaseseg ed siak iray mamatatken ed Kristianon kongregasyon tan nanggunaetan dan tulongan ak ed anggaay nayarian da. Balet sanen saglawien day panimon ko, imburik iman lapud kababaing, ta agko labay ya aksobien a satan so problemak.

Diad kaunoran, kinmapuy ak diad punton kaukolan koy na-ospital ta pian naoperaan. Legan a wadman ak, amoriak ya agnayarin mantultuloy ya oniay bilay ko. Deneside mi nen Mark a mansian ed loob na taloy bulan pian araley situasyon mi ya agtanton nalalanor so emosyon. Diad saman a panaon et walay marakep ya agawa. Pinmaway ed magasin ya Awake! so sakey ya artikulon apauloan na “Help for Adult Children of Alcoholics.”b

Amta yo, say inak so sakey a mainum na alak. Anggaman agak naabuso ed pisikal, agbalot impanengneng na atateng koy pisikal a panamabli ed kasitsikanan da odino diad siak. Anggapoy nanonotan kon siak so nilakap nen nanay odino imbaga ed siak a siak so inaro to. Kanian diad tua et binmaleg ak ya agko amtan talaga no panoy mangaro odino, kaunongan kaimportanti, no panoy naaro.

Mabetbet ya ibaga ed siak na nanay ko so nipaakar ed panagbii nen amak tan sikatoy agto panmatalekan. Kanian diad padesir ko et binmaleg ak ya agak makapanmatalek ed lalaki ed inkalapagan. Lapud impamabaleg ed siak, naynay kon liknaen ya abebbeba ak ed arum, nagkalautla’d arum a bibii. Diad impakabasa ed saman ya artikuloy Awake! et atulongan ak a talosan so kabaliksan na sarayan bengatla. Diad inmunan pankanawnawa et atalosan koy lamot na problemak ed panimon.

Impanengneng ko so artikulo na Awake! ed asawak, si Mark, tan akatulong met itan ed sikaton lalon talosan ak. Ag-abayag et natutumbok mi la so simbawa na Biblia parad saray sanasawan mannononot a mansian. Akapanpawilan kami. (1 Corinto 7:10, 11) Natan et mas marakep so panuulop mi nen kapiganman. Saniba kamin manggagawa ed maslak a bengatla, nagkalautla ed Kristianon aktibidades. Lalon mas makatalos si Mark. Ngalngali inagew-agew ton ibabaga’d siak ya inad-aro toak, tan natan et talagan sisiaen ko la itan.

Kapiganman a naamtaan kon mannengnengan kami’d datin asawa nen Mark, ipipikasik so panamabiskeg nen Jehova, a kekerewen ed sikaton tulongan toak ya onkiwas ed paraan na sakey a matatken a Kristiano. Tan epektibo itan. Anggan say pansyodot ko’d sikato so kalkalnan naaandi. Agko la momolimolien iray negatibon bengatla odino abuloyay imahinasyon kon mangontrol ed siak.

Siansian naliliknak so pigaran agmanepeg ya imon. Say ayadyari a bilay labat ed balon mundo na Dios so kumpleton makapangekal ed saya ed siak. Kaleganan, naaralan kon kontroley panimon, imbes ya abuloyan itan a mangontrol ed siak. On, ngalngali dineral na imon so bilay ko, balet salamat ed si Jehova tan say organisasyon to, siak natan so talagan maliket, tan akapawil la ed normal a bunigas ko. Awalaan ak lamet na malet a pisiglaotan ed Dios, si Jehova.​—Insulat.

[Saray paimano ed leksab]